د فرانسې ولسمشر امانوئل مکرون، د اسرائیل له لومړي وزیر بنیامین نتانیاهو سره د تلیفوني تماس پر مهال، د غزې پر ضد د بریدونو د درولو او اوربند ته د بېرته ستنېدو غوښتنه وکړه.

مکرون ویلي، چې بشري مرستې باید سمدستي بېرته پيل شي او هر ډول جبري بې‌ځایه کول یا نیواک د سولې پر ضد عمل دی.

مکرون په خپله ایکس‌پاڼه لیکلي، چې د ټولو برمته شویو کسانو ازادول او د اسرائیل امنیت د فرانسې له لومړیتوبونو څخه دي.

نوموړي زیاته کړې، چې له نتانیاهو سره یې د سوریې د ثبات او د دې هېواد د حاکمیت د بېرته راګرځولو په اړه هم خبرې کړې دي او فرانسه به د دغو مسایلو په ټولو برخو کې له اسرائیلي چارواکو سره نږدې همغږي وساتي.

هغه دغه راز ویلي، چې منځني ختیځ کې ثبات ته اړتیا ده، او یوازې یوه عادلانه او دوامداره سوله کولای شي، چې ټولو ته خوندي راتلونکی برابر کړي.

د ایران د بهرنیو چارو وزارت د امریکا د ولسمشر ډونالډ ټرمپ له لوري ایران ته د بمبارۍ ګواښ غندلی او دا یې د نړیوالو اصولو ښکاره نقض بللی دی.

د دې وزارت ویاند اسماعیل بقایي، خبرداری ورکړی، چې تاوتریخوالی، تاوتریخوالی زېږوي او سوله، سوله رامنځته کوي.

هغه ټینګار کړی، چې دا انتخاب د امریکا په لاس کې دی او پایلې به یې هم هماغې ته متوجه وي.

دا په داسې حال کې ده، چې تېره ورځ د امریکا ولسمشر ایران ته ګواښ وکړ چې یا توافق وکړئ او یا به بمبار شئ.

د ایران په فیروز آباد سیمه کې د ټرافیکي پېښې له امله درې افغان اتباعو خپل ژوند له لاسه ورکړی.

ایراني چارواکو ویلي، دا پېښه د موټر د اصلي سړک څخه د انحراف او له یو ونې سره د سخت ټکر له امله رامنځته شوې ده.

ایراني رسنیو د ځایي چارواکو له قوله ویلي، چې د ژغورنې ټیم د دوی د ژغورلو هڅه کړې؛ خو بریالي شوي نه دي.

د ایران مذهبي مشر علي خامنه‌یي ویلي، چې په سیمه کې یوازې یو نیابتي ځواک شتون لري، او هغه اسرائیل دی، چې د استعمارګرو په استازیتوب جنایتونه کوي.

هغه د ډونالډ ټرمپ او د اسرائیلي چارواکو د وروستیو ګواښونو له یادولو پرته ویلي، موږ ته ګواښونه کوي، چې بمبار به وکړي؛ خو موږ ډاډه نه یو چې دوی به دا کار وکړي، خو که یې وکړ؛ نو متقابل سخت ځواب به وویني.

نوموړي زیاته کړې، که دوی دا فکر ولري، چې زموږ په هېواد کې فتنه جوړه کړي؛ نو ملت به خپله هغوی ته ځواب ورکړي.

علي خامنه‌یي دا څرګندونې داسې مهال کوي، چې تېره ورځ د امریکا ولسمشر ایران ته ګواښ وکړ چې یا توافق وکړئ او یا به بمبار شئ.

له رفح سره نږدې د یوې ډله‌ییزې هدیرې څخه د ۱۵ ژغورونکو د مړو تر موندل کېدو وروسته، د ملګرو ملتونو د بشري چارو د همغږۍ دفتر ویلي، چې دا پېښه هېڅکله باید نه وای شوې.

د دې ادارې په وینا، د قربانیانو په منځ کې اته تنه د فلسطیني سرې میاشتې غړي، شپږ تنه د فلسطین د ملکي دفاع غړي، او یو د ملګرو ملتونو کارکوونکی شامل دي.

دا مرستندویه کاروان د مارچ د ۲۳مې د سهار په لومړیو ساعتونو کې په رفح کې د درنو ډزو هدف ګرځېدلې وه.

د سره صلیب نړیوالې کمېټې ویلي، چې په هماغه وخت کې یې د فلسطیني سرې میاشتې له ټیم سره تماس بایللی و.

اسراییلو تر اوسه په دې اړه څه نه دي ویلي.

د امریکا ولسمشر ډونالډ ټرمپ، پلان لري چې د خپلې دویمې دورې د ولسمشرۍ په لومړي بهرني سفر کې د مې میاشتې په منځ کې سعودي عربستان ته ولاړ شي.

اکسیوس د دوو امریکایي چارواکو او د ټرمپ د سفر له پلانونو څخه د یوه باخبره سرچینې له قوله راپور ورکړی، چې دا احتمالي سفر د امریکایي لوړپوړو چارواکو او د سعودي عربستان د سیالانو ترمنځ، په ځانګړي توګه د اوکراین د جګړې په اړه د وروستیو اونیو خبرو اترو کې مطرح شوی دی.

په راپور کې راغلي، چې سعودي عربستان ته د ټرمپ د سفر پرېکړه د خلیج د هیوادونو، په ځانګړي ډول د اقتصادي همکارۍ او پانګونې په برخه کې، د ټرمپ د ادارې د نږدې اړیکو ښکارندویي کوي.

دا راپور داسې مهال خپور شو، چې سعودي عربستان هڅه کوي د روسیې او اوکراین ترمنځ د اوربند د منځګړیتوب لپاره امریکا سره مرسته وکړي.

د سره صلیب چارواکو میانمار کې د ۷.۷ درجې زلزلې له امله د بشري بحران خبرداری ورکړی.

یاده زلزله، چې تر ۱۶۰۰ زیات کسان یې وژلي، د میانمار مهمې زېربناوې یې هم ویجاړې کړې دي.

د سره صلیب نړیوال فدراسیون وایي، دا یوه پیچلې بشري فاجعه ده چې عاجلو مرستو ته اړتیا لري.

د دغه زلزله ځپلو سره د مرستې لپاره سره صلیب او هلال احمر نړیوال فدراسیون د ۱۱۳ میلیونه ډالرو د راټولولو غږ پورته کړی دی.

د یادونې ده چې نړیوالې مرستندویه ډلې میانمار ته رسېدلي، ترڅو له زلزله‌ځپلو سره بیړنۍ مرستې وکړي.

د امریکا ولسمشر ډونالډ ټرمپ، د ان‌بي‌سي نیوز سره په مرکه کې خبرداری ورکړی، که ایران د خپل اټومي پروګرام په اړه موافقه ونه کړي، سخت به بمبار شي.

هغه ویلي، چې دا بمبار به داسې وي چې مخکې یې هیڅ ډول ساری نه وي لیدل شوی.

د یادونې ده چې ټرمپ له دې وړاندې د ایران د مذهبي مشر علي خامنه‌ای په نوم لیک هم استولی و.

د تهران چارواکي وایي، د دې لیک ځواب یې د عمان له لارې امریکايي چارواکو ته رسولی دی.

د ایران ولسمشر مسعود پزشکيان ویلي، چې علي خامنه‌ای د ټرمپ لیک ته په ځواب کې ویلي، له امریکا سره د غیرمستقیمو مذاکراتو لاره خلاصه ده.

د مقاومت په نوم جبهې مشر احمد مسعود وایي، چې د حق او آزادۍ لپاره مبارزه تر ټولو ستر عبادت دی.

هغه د کوچني د اختر په مناسبت په خپل پیغام کې لیکلي، چې د عدالت په لاره کې درېدنه، د لوړ اخلاقي تعهد، انساني ارزښتونو او د وجدان د بیدارۍ تر ټولو لوړه بڼه ده.

نوموړي پرته له دې چې د طالبانو نوم واخلي، خپل پلویان د عدالت د تامین لپاره مبارزې ته هڅولي دي.

د طالبانو حکومت مشر شیخ هبت‌الله اخوندزاده ویلي، چې حکومت او ملت باید سره جلا نشي.

نوموړي خپله د اختر د لمانځه وروسته وینا کې پر اتحاد، اتفاق او د اسلامي نظام پر ساتنې ټینګار کړی.

هغه ویلي، چې اسلامي نظام یوازې د اتحاد او اتفاق له لارې بریا ته رسېږي او ټول ولس، د حکومت غړي او نظام سره یو دي.

هبت الله دغه راز ویلي، چې دی د خلکو تر منځ د «امارتي او غیرامارتي» نومونو ایښودو مخالف دی.

نوموړي په خپله وینا کې زیاته کړې چې د جهاد مقصد وساتئ، ځکه شیطانان هڅه کوي چې افغانستان بیا د جګړې او شخړو لور ته بوځي.