د ننګرهار پخوانی والي ضیاءالحق امرخېل وایي، د افغانستان لپاره د بریتانیا له ځانګړي استازي ریچارډ لیندسي سره په لیدنه کې یې د هېواد د روان وضعیت ترڅنګ، د پاکستان له لوري پر افغان خاورې د بریدونو په اړه د خلکو اندېښنې شریکې کړې دي.
امرخېل زیاته کړې چې بریتانیا له پاکستان سره تاریخي اړیکې لري او پر هغه هېواد اغېز هم لري؛ نو ځکه کولای شي اسلاماباد ته د افغانانو پیغام ورسوي، څو د دغه ډول خونړیو بریدونو او بشري جنایتونو مخه ونیول شي.
امریکایي رسنیو راپور ورکړی، چې د امریکا ولسمشر ډونالډ ټرمپ د عراق د لومړي وزیر کیدو لپاره د علي الزیدی د نوماند کېدو هرکلی کړی او هغه یې واشنګټن ته د سفر لپاره بللی دی.
ټرمپ ویلي چې واشنګټن غواړي په عراق کې داسې حکومت وویني چې له ترهګرۍ پاک وي او وکولای شي د خلکو لپاره یو روښانه راتلونکی رامنځته کړي.
هغه زیاته کړې چې د امریکا او عراق ترمنځ د اړیکو لپاره د یوې نوې او قوي دورې پیل مهم دی.
په ورته وخت کې، علي الزیدی ویلي چې له ټرمپ سره یې ټیلیفوني خبرې کړې دي او هغه ورته د سپینې ماڼۍ بلنه ورکړې ده، څو د نوي حکومت له جوړېدو وروسته لیدنه وکړي.
د عراق د سیاسي سرچینو په وینا، دا نوماند د پارلماني ټاکنو له ترسره کېدو شاوخوا پنځه نیم میاشتې وروسته د سختو سیاسي اختلافاتو په ترڅ کې د توافق له لارې ټاکل شوی دی.
الزیدی چې د سوداګرۍ شالید لري، که وټاکل شي؛ نو د ۲۰۰۳ کال وروسته به د عراق تر ټولو ځوان لومړی وزیر وي.
د یادونې ده چې په عراق کې د واک وېش د فرقهیي توازن پر بنسټ دی، چې له مخې یې ولسمشر کرد، لومړی وزیر شیعه او د پارلمان مشر سني وي.
د ایرنا د راپور له مخې، ایران د امریکا سره د مذاکراتو وروستی وړاندیز د پنجشنبې په ماښام د پاکستاني منځګړي له لارې سپارلی دی.
د ایران د بهرنیو چارو وزارت ویاند اسماعیل بقایي په یوه ټلوېزیوني مرکه کې ټینګار کړی چې د جګړې پای او د دوامدارې سولې ترلاسه کول د تهران اساسي لومړیتوب دی.
دا په داسې حال کې ده چې د تهران د جمعې امام چې د پارلمان د ملي امنیت کمېسیون غړی دی، مخکې ویلي وو چې د اټومي پروګرام او د هرمز تنګي په اړه خبرې پای ته رسېدلې دي.
الجزیرې راپور ورکړی چې د امریکا او اسرائیل له لوري د ایران پر ضد د روانې جګړې لګښت شاوخوا ۵۰ میلیارد ډالرو ته رسېدلی دی.
الجزیرې ویلي چې دا شمېرې د پخوانیو اټکلونو نږدې دوه چنده دي.
په راپور کې ویل شوي چې د لګښتونو د محاسبې بشپړ جزئیات لا له رسمي سرچینو نه دي خپاره شوي.
جګړې تر اوسه پراخ زیانونه اړولي، د زیربناوو ویجاړۍ ترڅنګ زرګونه کسان، چې ځینې یې لوړپوړي ایراني چارواکي هم دي، وژل شوي دي.
په همدې حال کې، د هرمز تنګي کې د تاوتریخوالي زیاتوالي د اقتصادي او امنیتي اندېښنو کچه نوره هم لوړه کړې ده.
بلومبرګ راپور ورکړی، د ایران جګړه، چې د امریکا د ولسمشر ډونالډ ټرمپ له لوري پیل شوې، د امریکا د پخوانیو اسانه پوځي بریاوو لړۍ ماته کړې او اوس د هغه د راتلونکې پوځي تګلارې په اړه جدي پوښتنې راپورته شوي دي.
د راپور له مخې، کارپوهان په دې باور دي چې دا جګړه ښايي د ټرمپ پر چلند اغېزه وکړي—یا به هغه نور محتاط شي او یا به لا ډېر تند او چټک پوځي اقدام ته مخه کړي.
همدارنګه ویل کېږي چې ټرمپ دا جګړه تر ډېره د خپل زیات غرور او د پخوانیو بریاوو د تصور له امله پیل کړې وه؛ خو د ایران د جګړې پیچلتیاوې د امریکا لپاره ستراتیژیکه ننګونه ګرځېدلې ده.
د ترکیې په استانبول کې د iHH مرستندویه ادارې په کوربهتوب د افغانستان او پاکستان ترمنځ د «ټریک ۱.۵» غیر رسمي خبرې پای ته رسېدلې دي.
د راپورونو له مخې، دواړو لورو پر یو شمېر مهمو موضوعاتو د همکارۍ او تفاهم هوکړې کړې دي.
سرچینې وایي چې دا خبرې د باور جوړونې او د اړیکو د ښه کېدو په موخه ترسره شوې وې او تمه ده چې دا بهیر به په راتلونکې کې هم دوام ومومي.
دا په داسې حال کې ده چې څو ورځې وړاندې د چین په ارومچي ښار کې هم د دواړو لورو ترمنځ رسمي مذاکرات شوي وو، چې د افغانستان او پاکستاني استازو له لوري مثبت ارزول شوي دي.
سياېناېن په یو راپور کې ویلي، چې پاکستاني منځګړي تمه لري چې ایران به د سولې د پخوانۍ طرحې تر رد وروسته یوه نوې او بدله شوې طرحه وړاندې کړي.
راپور وايي چې دا ځواب ښايي تر راتلونکې جمعې پورې اعلان شي.
د امریکا ولسمشر ډونالډ ټرمپ ویلي چې د ایران سره د خبرو اترو بشپړ جزئیات یوازې دی او څو محدود کسان یې په اړه معلومات لري.
هغه زیاته کړې چې که څه هم خبرې په ښکاره توګه درېدلې ښکاري، خو په پټه توګه روانې دي.
ټرمپ همدارنګه ویلي چې د ایران سره ځینې خبرې د ټیلیفوني اړیکو له لارې ترسره کېږي، او د هر نوي وړاندیز په اړه به د امریکا پرېکړه د ایران پر اټومي پروګرام د محدودیتونو په کچه پورې اړه ولري.
راپور زیاتوي چې د ایران له خوا وړاندې شوې پخوانۍ طرحه کې لومړی د هرمز تنګي پرانیستل او وروسته د اټومي موضوعاتو حل شامل و؛ خو هغه طرحه رد شوې وه.
د ګارډین ورځپاڼې راپور ورکړی، چې د امریکا ولسمشر ډونالډ ټرمپ یو ځل بیا د جرمني پر لومړي وزیر فریدرتش مرتس توندې نیوکې کړې او هغه ته یې ویلي چې د خپل هېواد ستونزو ته پام وکړي او په امریکا دې نېوکې نه کوي.
ټرمپ ویلي چې جرمني باید د روسیې او اوکراین جګړې د پای ته رسولو لپاره هڅې زیاتې کړي او د ایران په چارو کې له لاسوهنې ډډه وکړي.
نوموړي همدارنګه اشاره کړې چې ښايي له جرمني، ایټالیا او هسپانیا څخه د امریکايي ځواکونو شمېر کم کړي.
هغه ویلي چې ځینې اروپايي هېوادونو د ایران په جګړه کې له امریکا سره مرسته نه ده کړې.
ګارډین ویلي چې د جرمني چارواکو هڅه کړې چې دا لانجه کمه وښيي او ویلي یې دي چې دا ډول څرګندونې نوې نه دي او مخکې هم شوې دي.
راپور زیاتوي چې د امریکا او جرمني ترمنځ دا لفظي شخړه وروسته له هغې زیاته شوې چې مرتس ویلي وو، امریکا د ایران په موضوع کې کمزورې شوې او روښانه تګلاره نه لري.
فاکس نیوز په یو راپور کې وایي، چې د امریکا د جګړې وزیر پیټ هګسټ او د پوځ لوی درستیز ډن کېن د سنا مجلس ته حاضر شوي او د ایران جګړې، پوځي لګښتونو او د ۲۰۲۷م کال بودجې په اړه تر سختو پوښتنو لاندې راغلي دي.
راپور وايي، د ایران پر ضد روانو عملیاتو کې امریکا تر اوسه شاوخوا ۲۸ میلیارده ډالر لګښت کړی او پنټاګون د راتلونکي کال لپاره ۱.۵ ټریلیون ډالرو بودجه غوښتې ده.
بل لور ته، د امریکا ولسمشر ډونالډ ټرمپ ویلي چې ښايي له ایټالیا او هسپانیا څخه امریکايي ځواکونه وباسي، او دا پرېکړه لا تر غور لاندې ده.
د راپور له مخې، که څه هم د ایران او امریکا ترمنځ اوربند اعلان شوی؛ خو لا هم سیمه کې تاوتریخوالی موجود دی.
بل لورته د اسراییلو دفاع وزیر یسراییل کاتز خبرداری ورکړی چې ښايي ژر بیا پر ایران پوځي بریدونه پیل شي.
فاکس نیوز ویلي، چې د هرمز تنګي کړکېچ د نړۍ د تېلو بازارونه اغېزمن کړي، او د ایران اقتصادي وضعیت هم خراب شوی، چې د دې هېواد د اسعارو ارزښت تر ټولو ټیټې کچې ته رسېدلی دی.
راپور زیاتوي چې امریکا د ایران پر وړاندې اقتصادي او پوځي فشار ته دوام ورکوي، خو په عین حال کې د سولې خبرو ته هم لاره پرانستې ساتي.
د اېنبيسي نیوز د راپور له مخې، تمه ده چې د امریکا ولسمشر ډونالډ ټرمپ په نږدې ورځو کې د ایران په اړه یوه مهمه پرېکړه وکړي.
راپور وايي، سره له دې چې د ایران او امریکا ترمنځ اوربند لا هم روان دی؛ خو امریکايي چارواکي باور لري چې ایران خپل پوځي فعالیتونه بیا زیات کړي دي.
د معلوماتو له مخې، ایران هڅه کوي توغندي او مهمات له پټو او زیانمنو سیمو څخه وباسي او د ډرونونو او توغندیو ځواک بېرته ورغوي.
راپور کې ویل شوي چې واشنګټن اندېښنه لري چې دا اقدامات ښايي د راتلونکو احتمالي جګړو لپاره چمتووالی وي، تر څو ایران وکولای شي په سیمه کې بیا بریدونه ترسره کړي.