د اسراییلو ځواکونو په خپلو تازه هوايي بریدونو کې په غزه کې ۵۳ فلسطینیان وژلي او ۱۶ ودانۍ یې نړولې دي.
الجزیرې راپور ورکړی، چې یوازې د یکشنبې په ورځ لږ تر لږه ۳۵ تنه په غزې ښار کې وژل شوي او دوه نور فلسطینیان د خوارځواکۍ له امله مړه شوي دي.
د غزې د روغتیا وزارت د معلوماتو له مخې، د اسراییلو د جګړې له پیله راهیسې د لوږې له امله د وژل شویو کسانو شمېر ۴۲۲ ته رسېدلی.
په همدې حال کې بیا د اسراییلو پوځ د غزې ښار په رمال سیمه کې د «الکوثر» برج په بشپړ ډول نړولی دی.
پاکستانۍ رسنۍ وايي، د طالبانو له لوري د پاکستاني طالبانو تحریک یا ټيټيپي پر ضد د اقداماتو نهکول، او د یادې ډلې د بریدونو زیاتوالي، د اسلاماباد او کابل اړیکې تر ټولو ټیټې کچې ته رسولې دي.
د “ډان” ورځپاڼې د راپور له مخې، پاکستان څو ځله له طالبانو غوښتي چې د ټيټيپي غړي بېوسلې او فعالیتونه یې محدود کړي؛ خو طالبانو عملي ګام نه دی پورته کړی.
د طالبانو حکومت بیا ویلي چې پاکستان د خپل امنیتي ضعفونو پټولو لپاره، پړه پر دوی اچوي.
د پاکستان لومړي وزیر شهباز شریف تازه د طالبانو له حکومت غوښتي، چې یا پاکستان یا د ترهګرو ملاتړ غوره کړي او خبرداری یې ورکړی چې له افغان خاورې بریدونه د اسلاماباد لپاره د منلو وړ نه دي.
یوې باوري سرچینې چې نه غوښتل نوم یې واخیستل شي، حماسه میډیا ته وویل چې د طالبانو حکومت مشر شیخ هبت الله اخوندزاده په امر د دې حکومت د اوبو او بريښنا وزارت سلاکار ډاکتر فاروق اعظم نیولی او نظامي محکمې ته یې سپارلی.
سرچینې ویلي چې نوموړی یې « د غیر مسولانه» څرګندونو له امله نیولی دی.
فاروق اعظم په خپل وروستي فیسبوکي پوست کې په طالبانو نیوکه کړې وه که د ښوونځیو او پوهنتونو دروازې خلاصې وای اوس به د کونړ د ټپیانو درملنه افغان ښځینه ډاکترانو کړی وی.
په کراچۍ کې د سند ایالت پر عرفات سړک د وسلهوالو غلو په برید کې یو پولیس عسکر تښتول شوی دی.
د امنیتي چارواکو په وینا، پېښه هغه مهال رامنځته شوه چې پولیس د تالاشۍ پر مهال د یوه موټر له خوا تر برید لاندې راغلل.
بریدګرو له ډزو وروسته یو پولیس له ځانه سره وړی.
چارواکي وايي، که څه هم پولیسو د غلو پر وړاندې ډزې کړې؛ خو ونه توانېدل چې د خپل ملګري د تښتونې مخه ونیسي.
اوس مهال د امنیتي ادارو له خوا د لټون عملیات روان دي څو د تښتول شوي پولیس ځای وټاکل شي او ژر تر ژره خوشې شي.
د قطر پلازمېنې دوحې ته د عربي او اسلامي هېوادونو د بېړنۍ غونډې لپاره د ګڼو مشرانو تر څنګ د پاکستان لومړی وزیر شهباز شریف او د هغه د بهرنیو چارو وزیر اسحاق ډار هم روان شوي دي.
په دې غونډه کې به پر قطر د اسراییلو وروستي بریدونه او د فلسطین پر روان وضعیت بحث وشي.
تمه ده ګډونوال هېوادونه د یوه ګډ پرېکړهلیک له لارې د اسراییلو پر ضد خپل دریځ څرګند او د دوحې پر ضد شوي بریدونه وغندي.
تېره اوونۍ اسراییلو په دوحه کې د حماس د مشرانو پر یوه غونډه هوايي برید وکړ چې د ډلې دوه غړي پکې ووژل شول او څو تنه نور ټپیان شول.
دا برید د ګڼو هېوادونو له لوري د قطر پر ملي حاکمیت تېری بلل شوی دی.
د کډوالو د حقونو د څار نړیوال بنسټ د طالبانو حکومت هغه پرېکړه غندلې چې د ملګرو ملتونو د کډوالو عالي کمېشنرۍ په دفترونو کې یې د افغان ښځو پر کار بندیز لګولی دی.
یاد بنسټ ویلي، دغه اقدام د ښځو بنسټیز حقونه تر پښو لاندې کوي او د ستنېدونکو کډوالو او زیانمنو کورنیو لپاره د اړینو خدمتونو وړاندې کول له ستونزو سره مخ کوي.
د دوی په وینا، د ښځینه کارکوونکو له ګډون پرته ښځې او نجونې مرستو او اړینو مرکو ته لاسرسی نه لري، چې دا د زرګونو کورنیو ژوند ګواښي او د بشري اصولو ښکاره سرغړونه ده.
دغه بنسټ له کورنیو او نړیوالو اړخونو غوښتنه کړې چې د طالبانو حکومت پر دې پرېکړه جدي دریځ خپل کړي او د افغان ښځو د کار حق تضمین کړي.
کارپوهان وايي، د ښځو پر کار بندیز یوازې د بشري حقونو موضوع نه ده، بلکې پراخې ټولنیزې او اقتصادي پایلې لري او د بشري مرستو د تطبیق بهیر له ستونزو سره مخ کوي.
د قطر لومړي وزیر شیخ محمد بن عبدالرحمن آل ثاني د اسراییلو وروستی برید “وحشیانه عمل” بللی او ویلي یې دي چې هېڅکله به بې ځوابه پاتې نه شي.
هغه په دوحه کې د عربو او اسلامي هېوادونو د بهرنیو چارو وزیرانو غونډې ته وویل، قطر به د خپل حاکمیت د دفاع لپاره قانوني او نړیوال اقدامات وکړي.
په برید کې د حماس پنځه غړي او یو قطري امنیتي افسر وژل شوي وو، چې دغه برید د غزې د اوربند پر خبرو نږدې ترسره شوی و.
قطر د عربو او اسلامي هېوادونو د ملاتړ ستاینه وکړه او ټینګار یې وکړ چې نړیواله ټولنه باید اسراییل د خپلو کړنو لپاره حسابورکولو ته اړ کړي.
د عربي اتحادیې او د اسلامي همکاریو سازمان استازو اسراییل په “دولتي تروریزم” تورن کړ.
د افغان سولې لپاره د امریکا پخواني ځانګړي استازي، زلمي خلیلزاد ویلي، چې د پاکستان د پوځ او د تحریک طالبان پاکستان ترمنځ نښتې د پوځیانو او ملکي وګړو د مرګژوبلې سبب شوې دي.
هغه په خپلو څرګندونو کې زیاتوي چې اوس وخت رارسېدلی چې د جګړې پر ځای سیاسي تګلاره بدله شي او دواړه لوري د خبرو مېز ته کېني.
خلیلزاد پر خپله ایکس پاڼه لیکلي چې که د پاکستان پوځ د پوځي حل په لټه کې وي، دا به یوه لویه تېروتنه وي.
هغه ټینګار کړی چې د افغانستان حکومت هم باید په دې برخه کې له پاکستان سره د حل لارې موندلو کې مرسته وکړي.
د اسیا جام په روانو سیالیو کې د هند او پاکستان سیالي د هند په بریا پای ته ورسېده.
پاکستان په دې لوبه کې د نهه لوبغاړو په سوځېدو سره ۱۲۸ منډې جوړې کړې.
هند دغه هدف د درېیو لوبغاړو په سوځېدو په ۱۶م اور کې بشپړ کړ او سیالي یې د ۷ وېکټو په توپیر وګټله.
ټاکل شوې چې د افغانستان ملي لوبډله به د خپلې دویمې سیالۍ لپاره د وږي پر ۲۵مه د سه شنبې په ورځ د بنګله دېش پر وړاندې ډګر ته ښکته شي.
د مقاومت په نوم جبهې ویلي، تېر ماښام یې د هرات ولایت د ګذره ولسوالۍ په مربوطاتو کې د طالبانو پر یو ګزمه برید کړی دی.
دغه جبهه وایي، په دې برید کې درې طالبان وژل شوي، دوه میله وسلې او یوه موټرسايکل د مقاومت جبهې لاس ته ورغلي دي.
دوی ویلي، چې وژل شوي کسان د طالبانو حکومت د الفاروق قول اردو د کشف له قطعې څخه وو.
یادې جبهې زیاته کړې چې دا نښته د ماښام ۸:۳۰ بجې د هرات–پشتون زرغون پر لاره د پولیسو د تربیوي مرکز څنګ ته رامنځته شوې ده.