د طالبانو حکومت د امربالمعروف او نهې عن المنکر وزارت ویاند سیف السلام خیبر ویلي، چې هلمند کې د اووه کلنې نجلۍ پلار او د هغې ۴۵ کلن خاوند ونیول شول.
د نوموړي په خبره، پلار یې دا ماشومه د پیسو په مقابل کې ورکړې وه؛ خو ورسپارل کېدو سره سم پرې مسؤلین خبر شوي او دواړه یې نیولي.
خیبر زیاتوي، چې یاد کسان محکمې ته سپارل شوي دي.
د آلبانیا لومړي وزیر ادی راما ویلي چې هېواد یې له ټولنې څخه د افغان ښځو د ایستلو پر وړاندې چوپ نه پاتې کېده؛ نو ځکه یې خپلې دروازې د فعالو او ورزشکارو افغان ښځو پر وړاندې پرانېستې.
د افغانستان د ستراتیژیکو مطالعاتو انستیتوت ویلي چې راما ته «د سولې لپاره د کلتورونو همکارۍ- ابن سینا نړیواله جایزه» ورکړل شوې.
راما د جایزې د اخېستلو پر مهال ویلي، چې د افغان ښځو مبارزه یوازې د دوی لپاره نه ده، بلکې زموږ لپاره هم ده او په وینا یې دا د انسانیت د روح مبارزه ده.
د اسرائیل پوځ اعلان کړی چې د ایران د وروستیو توغندیزو او ډرون بریدونو له امله لږ تر لږه ۲۹ اسرائیلي وګړي وژل شوي او ګڼ شمېر نور ټپیان او بېکوره شوي دي.
د دوی په وینا، ایران ۵۳۰ توغندي او ۱۱۰۰ ډرونونه توغولي چې ډېری یې شنډ شوي دي.
د اسرائیلي پوځ ویاند کمال پنحاسي ویلي چې د اسرائیلي هوایي ځواکونو ځوابي بریدونو کې د ایران د وسلو زېرمې، توغوونکي، او تولیدي مرکزونه په نښه شوي دي.
یاد پوځ وايي چې دې بریدونو کې یې د ایران “ستر پلان شوی برید” شنډ کړی دی.
نیویارک ټایمز د امریکايي چارواکو له قوله راپور ورکړی چې له څو ورځنیو ارزونو وروسته هم دا نهده روښانه چې د امریکا له بریدونو وروسته د ایران د غنيشوي یورانیمو برخلیک څه ډول دی.
راپور زیاتوي چې د اروپایي چارواکو د لومړنیو ارزونو له مخې، ایران ښايي د لوړې کچې غنيشوي یورانیم زېرمتونونو ته انتقال کړي وي؛ خو دا معلومات لا هم لومړني دي او د یورانیمو دقیق ځای معلوم نه دی.
دغهراز، لوېدیځ چارواکي وايي ښايي کلونه وخت ونیسي چې د ایران زیانمن شوي اټومي تاسیسات بېرته فعاله شي.
امریکایي میلیاردر ایلان ماسک د ایران د مذهبي مشر علي خامنهاي د یو ګواښونکې پوسټ په غبرګون کې په کنایه ویلي: «امریکا شیطان بزرگ ده، که تر ټولو لوی شیطان؟»
دا څرګندونې ماسک هغه مهال کړي، کله چې خامنهاي په ایکس کې اسراییل ته خبرداری ورکړی و، چې که پر ایران حمله وکړي، درنه بیه به پرې کړي.
د «شیطان بزرگ» اصطلاح لومړی ځل د ایران بنسټګر آیتالله خمیني د امریکا لپاره کارولې وه.
د طالبانو حکومت ویاند ذبیحالله مجاهد په یوه تازه ټویټ کې د امریکا د استازو جرګې لهخوا هغه شوې ادعاوې په کلکه رد کړې، چې ګواکې په افغانستان کې بهرنۍ وسلهوالې ډلې شتون لري یا له هغه ځايه نورو ته ګواښ متوجه دی.
مجاهد لیکلي چې افغانستان یو «واحد او قوي حکومت» لري، چې پر ټول هېواد بشپړ واک او کنټرول لري او هیچاته اجازه نه ورکوي چې د افغانستان له خاورې د بل هېواد پر ضد کار واخیستل شي.
دا څرګندونې داسې مهال کېږي چې د امریکا کانګرس ځینو غړو تازه ادعا کړې وه چې ګواکې افغانستان کې لا هم د ترهګرو ډلو فعالیت شته.
د اسراییل د پوځ ویاند دانیال هاګاري ویلي، چې ایران سره “۱۲ ورځنۍ جګړه” کې یې بشپړه هوایي برتري ترلاسه کړې وه.
د هاګاري په وینا، اسراییلي ځواکونو په دې عملیاتو کې له ۳۵ زیات توغندیز مرکزونه او ۲۰۰ د توغندیو توغولو مېدانونه بمبار کړي.
خبرپاڼه کې راغلي، چې تر ۸۰ ډېر د هوايي دفاع سیستمونه، ۱۵ الوتکې او ۶ پوځي هوايي ډګرونو باندې بریدونه تر سره کړي.
د معلوماتو له مخې، سلګونه تنه نظاميانو په شمول ۳۰ لوړپوړي قومندانان، په نښه او له منځه وړل شوي.
د جرمني په جنوبي ښار وانګن کې یو ۲۷ کلن افغان کډوال هغه مهال ووژل شو، چې د راپورونو له مخې، هڅه یې کوله پر پولیسو د چړې برید وکړي.
نړۍوالو رسنیو د جرمني د پولیسو په حواله ویلي، چې دا پېښه هغه مهال رامنځته شوه، کله چې دوه پولیس افسران دغه افغان د یو شمېر تورونو له امله زندان ته لېږدول.
پولیسو ویلي، چې د برید پر مهال یو افسر سخت ټپي شوی دی او دا مهال تر درملنې لاندې دی.
د پېښې نور جزئیات تر دې دمه نهدي خپاره شوي، خو پلټنې روانې دي.
د افغانستان لپاره د ازبکستان ځانګړي استازي، عصمت الله ارګاشیف په تاشکند کې د سویس له سفیر کنستانتین اوبولنسکي سره لیدنه کړې ده.
د ازبکستان د بهرنیو چارو وزارت په یوه خپره شوې خبرپاڼه کې ویلي، چې دواړو لوریو د افغانستان په تړاو د همکاریو پر امکاناتو او د منځنۍ آسیا د اوبو د سرچینو د مدیریت پر موضوعاتو مفصلې خبرې کړې دي.
دا لیدنه په داسې حال کې ترسره شوې چې سیمه ییز هېوادونه د افغانستان د وضعیت، بشري مرستو او امنیتي مسائیلو په اړه وخت ناوخت اندېښنې شریکوي.
په ننګرهار کې د طالبانو تر واک لاندې د عامې روغتیا ریاست ډاکټرانو یو ژوندی ټپي ځوان چې د مړي ګمان يې پری کړی د بې پروایې له امله یوه شپه د مړو په یخچال کې ساتلی، او په سبا یې ژوندی جسد د هغه کورنۍ ته سپارلی دی.
د ایاز کورنۍ چې کله جسد کور ته راوړي د هغه زړه او بدن ولړزیږي، او کورنۍ یې بیا ژوندی جسد عامې روغتیا ریاست ته انتقالوي، چې دا ځل ایاز د ډاکترانو د بې پروایي له امله ساه ورکوي.
ځوان ایاز د لفظي شخړې وروسته په چاقوانو ټپي شوی و.
دهغه کورنۍ وایي:«کله مو چې جسد کور ته راوړ، سترګې او د بدن غړي یې په حرکت راغلل؛ له ژغورنې وروسته چې بېرته روغتون ته وړل شوی، د ډاکټرانو د نهپاملرنې له امله یې په روغتون کې ساه ورکړه.»
کورنۍ یې او د ټولنیزو رسنیو فعالان دا پېښه د ډاکترانو بېپروايي بولي.