د غزې د روغتیا وزارت اعلان کړی چې د مې له ۲۷مې نېټې راهیسې، د اسراییلي ځواکونو لهخوا په غزه کې د مرستو د وېش پر ځایونو بریدونو کې ۵۸۳ فلسطینیان وژل شوي او ۴۱۸۶ نور ټپیان شوي دي.
وزارت وايي، چې دغه کسان هغه مهال هدف وګرځېدل، کله چې د بشري مرستو ترلاسه کولو لپاره صفونو کې ولاړ ول.
د جګړې له پیل راهیسې د ملکي وګړو پر وړاندې د تاوتریخوالي دوام د نړیوالې ټولنې جدي اندېښنې راپورته کړې دي.
د هند د تیلنګانه ایالت د سنګارېډي ولسوالۍ په یوه کیمیاوي فابریکه کې زوروره چاودنه شوې، چې له امله یې لږ تر لږه ۳۴ کسان وژل شوي دي.
چارواکي وايي، ګڼ شمېر ټپیان روغتونونو ته لېږدول شوي، او له تېرو ۲۴ ساعتونو راهیسې د ژغورنې عملیات روان دي.
که څه هم د چاودنې دقیق لامل لا نه دی معلوم؛ خو د پېښې د څېړنې لپاره یوه ځانګړې پلټونکې ډله ټاکل شوې ده.
چارواکي وایي، د پېښې بشپړ جزئیات به له څېړنو وروسته اعلان شي.
د امریکا ولسمشر ډونالډ ټرمپ یو اجرایي فرمان لاسلیک کړی چې له مخې یې د سوریې پر وړاندې لګول شوي اقتصادي بندیزونه لغوه شول.
د رویټرز د راپور له مخې، د دې بندیزونو له منځه وړل به سوریې ته د نړیوال مالي انزوا نه د وتلو زمینه برابره کړي او همدارنګه د امریکا لهخوا د سوریې د بیا رغونې لپاره شوي ژمنې عملي کېدلی شي.
په همدې حال کې د سوریې د بهرنیو چارو وزیر ویلي، د بندیزونو لغوه کېدل به د بیا رغونې او پراختیا دروازې پرانیزي او د اقتصادي ودې پر وړاندې به خنډونه لرې کړي.
د قزاقستان ولسمشر قاسم جومارت توکایف تازه قانون لاسلیک کړی چې له مخې یې د خلکو لهخوا د مخ پټول په عامه ځایونو کې منع کېږي.
د رویټرز خبري آژانس د راپور له مخې، دا قانون هغه لباسونه محدودوي چې د چهرې پېژندنه له ستونزو سره مخ کوي.
قزاقستان د منځنۍ آسیا له هغو هېوادونو دی چې د عامه نظم او امنیت په موخه دا ډول قوانین تصویبوي.
د یادونې ده، چې په وروستیو کلونو کې څو نورو هېوادونو هم ورته اقدامات کړي دي.
په آذربایجان کې د طالبانو حکومت سفارت اعلان کړی، چې له څلور کلن ځنډ وروسته یې په دغه هېواد کې مېشتو افغانانو ته د پاسپورټونو د وېش لړۍ بیا پیل کړې ده.
سفارت ویلي، دا بهیر به له مخکې ثبت شویو نوملړونو سره سم پر مخ ولاړ شي، څو افغان وګړي وکولای شي د اسنادو له ستونزو پرته خپل قانوني چارو ته ادامه ورکړي.
د کډوالو نړیوال سازمان (IOM) وايي، چې یوازې د جون په میاشت کې له ایران څخه له ۲۵۶ زرو زیات افغان مهاجر بېرته افغانستان ته راستانه شوي دي.
یاد سازمان دا شمېرې “بېسابقه” بللي دي.
د IOM مشرې، ایمي پاپ، د دې وضعیت په اړه ژوره اندېښنه ښودلې او ویلي یې دي چې ډېری کورنۍ یوازې له خپلو جامو سره راستنې شوې او بېړنیو لومړنیو مرستو ته اړتیا لري.
هغه زیاتوي چې د بودجې کمښت د دوی او د دوی د همکارو ادارو د مرستې وړتیا محدوده کړې ده.
پاپ ټینګار کړی چې د بېرته راستانه شویو کډوالو شمېر اندېښمنوونکی دی او دا وضعیت ژر او پیاوړي نړیوال غبرګون ته اړتیا لري.
جمهوري حکومت کې د ملي دفاع وزارت سرپرست شاه محمود میاخېل په تازه څرګندونو کې ادعا کړې چې ایران د افغانستان په ورانولو، جنګونو او بېثباتۍ کې د پاکستان نه هم ژور او دوامدار نقش درلودلی دی.
نوموړي په خپله ایکسپاڼه لیکلي، چې د ایران استخباراتي، اقتصادي او سیاسي مداخلو د هېواد ملي حاکمیت ته جدي زیانونه اړولي دي.
میاخېل ادعا کوي چې د ایران د جنګونو له برکته دغه هېواد د لرې واټن توغندیو ته لاسرسی وموند او د افغانستان د جګړو له لارې یې خپلې دفاعي وړتیاوې لوړې کړې.
نوموړي د ارین بانک یادونه کړې چې، په وینا یې، په میلیاردونو ډالر افغانستان نه ایران ته قاچاق کړل، او همدارنګه د ایران د تیلو قراردادیانو له لوري قاچاقي نفت افغانستان ته واردېدل.
نوموړي ویلي چې د افغانستان د جنوبلوېدیځې حوزې ځیني پخواني وکیلان هم د دې غیرقانوني فعالیتونو برخهوال ول.
میاخېل زیاته کړې، چې په افغانستان کې د ایران قونسلګرۍ د جاسوسۍ مرکزونه ول او ځیني ایرانپلوه افغان مشران د ایران د ګټو لپاره ښکاره دریځونه نیول.
د ننګرهار پخواني والي ضیاالحق امرخیل د ایران له خاورې د افغانانو جبري ایستل “په ټپي روحونو د چاقو راکښل” بللي دي.
امرخیل په خپله ایکسپاڼه لیکلي، چې میندې له خپلو زامنو او ماشومان له خپلو میندو څخه بېلېږي، او دا جلاوالی د افغان ټولنې زړونه داسې ټوټه ټوټه کوي چې غږ یې تر اسمانونو رسېږي.
هغه د تېرو څو ورځو په ترڅ کې له ایرانه د سلګونه زره افغانانو د ایستلو په تړاو اندېښنه څرګنده کړې او ویلي یې دي، چې بیکاري او فقر د خلکو شپې نا ارامه کړي دي.
نوموړي نړیوالې ټولنې ته په خطاب کې ویلي، چې شتمن او پرمختللي هېوادونه دې د دغو “ناچاره وطنوالو” غم وخوري، ځکه دوی له څښاک اوبو، سرپناه، بیړنۍ ډوډۍ او دوامدار کار پورې، ټولو اساسي اړتیاوو ته اړتیا لري.
امرخیل د خپل پوسټ په پای کې د ملي یووالي، همدردۍ او پراخ لید لوري پر اړتیا ټینګار کړی او ویلي یې دي: «تر هغې چې دا سوچ بدل نه کړو، نه به د زړونو ارام وموندل شي، نه به د یووالي نعمت را نصیب شي، او نه به د عزت تاج زموږ پر سر کېښودل شي.»
د سره صلیب نړیوال فدراسیون له ایرانه افغانستان ته د راستنېدونکو افغانانو د لوړې شمېرې په اړه اندېښنه څرګنده کړې او د نړیوالو مرستو غوښتنه یې کړې ده.
د فدراسیون یوه لوړپوړي پلاوي د دوشنبې په ورځ د اسلامقلعه بندر کې له راستنېدونکو سره کتلي او ویلي یې دي چې دغه کسان له خوړو، اوبو او سرپناه پرته راستانه شوي دي.
د دوی په وینا، یوازې په ۲۰۲۵ کال کې له ایرانه شاوخوا ۸۰۰ زره افغانان راستانه شوي دي.
د افغانستان لپاره د پاکستان ځانګړي استازي محمد صادق، د چین او روسیې له ځانګړو استازو سره په دوحه کې لیدلي دي.
محمد صادق پر خپله ایکسپاڼه لیکلي چې په دې لیدنه کې د افغانستان په تړاو د سیمهییزو همکاریو د پیاوړتیا په اړه خبرې شوې دي.