پاکستان او ایران د خپلې دوه اړخیزې سیاسي اجنډا د پیاوړتیا په موخه د سیاسي سلا مشورو ۱۳م پړاو پای ته ورساوه.

دغه ناسته په اسلام‌اباد کې ترسره شوه چې مشري یې د پاکستان د بهرنيو چارو منشي آمنه بلوچ او د ایران د سیاسي چارو مرستیال وزیر مجید تخت‌روانچي کوله.

په غونډه کې دواړو هېوادونو د اړیکو ټول ابعاد ارزول شوي او له اقتصادي او سوداګریزو همکاریو نیولې تر انرژۍ، ټرانسپورټ نښلېدونې، تعلیم او ولسي تبادلو پورې خبرې کړي.

په دې پړاو کې، د سیمې او نړۍ پر مهمو جیوپوليټيکي تحولاتو هم بحث شوی.

پاکستان او ایران هوکړه کړې، چې ګډ اقتصادي کمېسیون (JEC) او ګډ تجارتي کمېټه (JTC) به په منظم ډول فعالې ساتي ترڅو د ګډو ګټو په برخو کې همغږي نوره هم زیاته شي.

د غونډې ګډونوالو په ملګرو ملتونو، اسلامي همکاریو سازمان (OIC) او اقتصادي همکاریو سازمان (ECO) کې د ګډ دریځ او متقابل ملاتړ پر اهمیت ټینګار کړی.

په دې ناسته کې پرېکړه شوې، چې د سیاسي سلا مشورو راتلونکی پړاو به په تهران کې د دواړو لورو په خوښه نېټه ترسره شي.

د طالبانو حګومت د سرحدونو، قومونو او قبایلو چارو وزیر او د سرحدونو د تثبیت کمېسیون مشر ملا نورالله نوري د تاجکستان د امنیتي ادارې د سرحدي ځواکونو له لوړپوړي پلاوي سره په کابل کې مهمې خبرې کړي چې د تاجکستاني پلاوي مشري د دغه هېواد د سرحدي ځواکونو لومړي مرستیال میرزا زاده عبدالواحد کوله.

دواړو لورو په دې لیدنه کې د امنیتي همکاریو، د اړیکو د پراخېدو، سرحدي ستونزو او د ګډ سرحد د کره تثبیت په اړه مفصل بحث کړی.

ملا نوري ویلي، چې افغانستان او تاجکستان د اړیکو په پیاوړتیا کې مثبت ګامونه اخیستي، او “اسلامي امارت” هڅه کوي له ټولو هېوادونو سره اقتصادي، سیاسي او دوستانه اړیکې ولري.

هغه زیاته کړې، چې ا”سلامي امارت” د مخدره موادو او انساني قاچاق د مخنیوي لپاره جدي اقدامات کړي او د “امیرالمؤمنین” ملا هبت الله له لوري په دې تړاو فرمانونه صادر شوي دي.

تاجکستاني پلاوي چې مشري یې عبدالواحد کوله هیله څرګنده کړې، چې دواړه هېوادونه به د تفاهم له لارې د سرحد په اوږدو کې شته ستونزې حل کړي او په دې برخه کې به ګډې هڅې دوام ومومي.

د اوکراین ولسمشر ولادیمیر زېلېنسکي وايي، له فرانسې سره یې د ۱۰۰ رافال جنګي الوتکو د ترلاسه کولو هوکړه لیک لاسلیک کړی، څو د روسیې پر وړاندې د خپل هېواد اوږدمهاله پوځي ځواک پیاوړی کړي.

زېلېنسکي دا تړون پاریس ته د خپل سفر پر مهال د ولسمشر امانوېل مکرون په حضور کې لاسلیک کړ او ورته یې د نړۍ له سترو دفاعي هوایي تړونونو څخه یادونه وکړه.

سرچینې وایي، دغه الوتکې به د لس کلن ستراتیژیک تړون برخه وي؛ ځینې به له فرانسوي زېرمو ورکړل شي، خو ډېرې به د اوږدمهاله پلان له مخې تولید او سپارل کېږي.

د الوتکو لېږد وخت غواړي، ځکه د پیلوټانو لپاره سختې روزنې تر سره کېږي.

فرانسې مخکې ژمنه کړې وه چې اوکراین ته به نورې میراژ الوتکې او د استر–۳۰ توغندي هم وسپاري.

د کابل د طالبانو حکومت امنیې قوماندانۍ ویاند خالد ځدراڼ په خپله ایکس پاڼه کې لیکلي چې هغه نجلۍ، چې د مړیني په اړه یې مشکوکې خبرې شوي، د مغزي سکتې له امله مړه شوې ده.

د ځدراڼ په وینا، پېښه دوه ورځې مخکې شوې وه او دغه معلومات د نجلۍ کورنۍ له لوري پولیسو ته ورکړل شوي دي.

نوموړي زیاته کړې چې پولیسو لومړنۍ څېړنې ترسره کړي؛ خو د فرخندې کورنۍ نه پر چا عریضه کړې او نه یې په کوم کس شک څرګند کړی دی.

د تاجکستان یو پلاوي په کابل کې د طالبانو حکومت له بهرنیو چارو وزیر امیرخان متقي سره په لیدنه کې د اړیکو د پیاوړتیا په تړاو، په ځانګړي ډول د ډیپلوماټیکو اړیکو او اقتصادي همکاریو پر زیاتولو خبرې کړې دي.

په دې ناسته کې امیرخان متقي ویلي، کابل هڅه کوي له دوشنبې سره د ښه ګاونډیتوب او مثبتو اړیکو پراختیا ته دوام ورکړي، او دا اړیکې په بیلابیلو برخو کې د پراختیا په حال کې دي.

د طالبانو حکومت د بهرنیو چارو وزارت څخه په خپره شوې خبرپاڼه کې ویل شوي، تاجک پلاوي د دې اړیکو پر لا پیاوړتیا باور څرګند کړی او ټینګار یې کړی چې افغانستان او تاجکستان کولی شي په ګڼو برخو کې نږدې او اغېزمنې همکارۍ ولري.

د بنګلدیش ځانګړې محکمې په غیاب کې ګوښه شوې لومړۍ وزیره، شیخ حسینه، چې اوس په تبعید کې ده، د انسانیت ضد جنایتونو په تور د اعدام حکم پرې کړی.

د حکم اورولو لړۍ نن (دوشنبه) د پلازمېنې ډاکه له محکمې په ژوندۍ بڼه خپره شوه.

اسوشیټېډ پرېس خبري اژانس وايي، د بنګلدیش لنډمهالي حکومت د حکم د اورېدو پر مهال د ډاکه ښار امنیت د نورو ورځو په پرتله خورا ټینګ کړی و.

شیخ حسینه، چې اوس په هند کې په جلاوطنۍ کې ژوند کوي، په غیاب کې محاکمه شوې ده.

د طالبانو حکومت د صنعت او سوداګرۍ وزیر نورالدین عزیزي وايي، اوس‌مهال د دوی حکومت د نړۍ له ۸۰ هېوادونو سره سوداګریزه راکړه ورکړه لري.

هغه زیاته کړې، چې افغانستان اوس په غوره اقتصادي خوځښت کې دی.

عزیزی وايي، باید د ټولو ګاونډیو هېوادونو او سيمې تر منځ د سوداګرۍ لارې خلاصې وي.

هغه د امام ابو حنیفه د څلورم نړیوال نندارتون د پرانستې په مراسمو کې، د افغانستان او پاکستان تر منځ د سوداګرۍ ستونزو ته اشاره کړې او د هېواد له خصوصي سکتور څخه یې غوښتنه کړې چې د ځان بساینې په لور حرکت وکړي.

د پاکستان د کورنیو چارو وزیر محسن نقوي په اسلام‌اباد کې د چین له سفیر جیان ځېدونګ سره د ترهګرۍ ضد هڅو د لا پیاوړتیا لپاره خبرې کړي.

په دې لیدنه کې د چین سفیر د اسلام‌اباد وروستی ځانمرګی برید غندلی او پاکستان ته یې د ترهګرۍ پر ضد جګړه کې د خپل هېواد د بشپړ ملاتړ ډاډ ورکړی.

دواړه لوري د استخباراتي معلوماتو د شریکولو، ګډو عملیاتو د همغږۍ او د امنیتي همکارۍ د پراخولو پر اړتیا سره هم توافق ته رسیدلي.

راپورونه وایي چې په کابل کې فرخنده نومې یوه نجلۍ، چې شاوخوا یو نیمه میاشت وړاندې د حاجي ملنګ نومي کس زوی عمادالله ته واده شوې وه، په مشکوک ډول وژل شوې ده.

د خپرو شویو معلوماتو له مخې ویل کېږي چې قضیه د کورني تاوتریخوالي له امله د کابل ښار په ګلبهار سنټر کې د دوی په استوګنځي کې رامنځته شوې ده.

په ټولنیزو شبکو کې د دې پېښې په اړه بېلابېل روایتونه خپریږي؛ خو تر اوسه په دې تړاو دقیق جزئیات نه دي خپاره شوي.

د طالبانو حکومت هم تر اوسه په دې اړه څه نه دي ویلي.

د یادونې ده چې پر حاجي ملنګ د قاچاق تور دی او نوموړی خلک مشهور قاچاقبر یادوي.

د پاکستان د بهرنيو چارو وزارت وايي چې د کابل او اسلام اباد تر منځ د ايران د منځګړتيا وړانديز هرکلی کوي.

د دې وزارت وياند، طاهر حسین اندرابي رسنيو ته ويلي، موږ باور لرو چې ايران کولی شي مهم رول ولوبوي.

هغه زیاته کړې، چې دوی به د ايران له منځګړتيا څخه هېڅ ډول انکار ونکړي.