ملګرو ملتونو اعلان کړی چې د افغانستان مشهوره سندرغاړې او د ښځو حقونو فعاله آریانا سعید د ۲۰۲۵ کال د “های نوت” نړیواله جایزه ګټلې ده.
دا جایزه هغې ته د « ما به امید باور داریم» سندرې له کبله ورکړل شوې، چې د هیلو نړیوالې ورځې په مناسبت خپره شوې وه.
په همدې حال کې اریانا سعید ویلي، چې دا پر دغې جایزې فخر کوي.
یوې باوري سرچینې چې نه یې غوښتل نوم یې واخیستل شي، حماسه میډیا ته د طالبانو حکومت په معادن وزارت کې د شوي پراخ مالي فساد معلومات شریک کړي.
په دې اسنادو کې لیدل کیږي چې د کانونو وزارت د تفتیش رئیس چې د لوګر ولایت اصلي اوسیدونکی دی او حافظ احمد نومیږي په پراخ اداري او مالي فساد کې لاس لري.
سرچینه وایي، حافظ احمد په تېرو دوو کالو کې په ۶۰ زره افغانۍ د کابل په چهاراسیاب ولسوالۍ کې ۸ جریبه ځمکه في جریب په ۶ لکه افغانۍ اخیستې.
یادې سرچینې ویلي چې نوموړی کابل کې دوه درملتونونه لري او په همدې معاش یې دوهم واده هم کړی.
ویل کیږي نوموړي یوازې ۱۳ لکه افغانۍ ولور هم ورکړی.
حماسه میډیا هڅه وکړه، چې په دې اړه د کانونو وزارت او یا حافظ احمد نظر واخلي؛ نو له پرلپسې هڅو د وزارت مسولینو له ځواب ورکولو ډډه وکړه.
د ایران د کورنیو چارو وزارت د کډوالو چارو رییس، نادریار احمدي، ویلي چې د ۱۴۰۳ لمریز کال له پیل څخه د سرطان تر یوولسمې پورې شاوخوا ۷۷۲ زره افغانان بېرته افغانستان ته ستانه شوي دي.
د احمدي په وینا، دغه کسان د دوغارون، میلَک او ماهِیرود د پولو له لارې بېرته ستانه شوي دي.
نوموړي دغه کډوال غیر قانوني بللي دي.
که څه هم ایراني چارواکي وايي چې ډېری مهاجرین داوطلبانه وځي؛ خو د ملګرو ملتونو د کډوالو عالي کمېشنري وايي، تر ۷۰ سلنه ډېر کډوال په زور شړل کېږي.
د اسراییل لومړي وزیر بنیامین نتانیاهو ویلي چې ایران باید لهمنځه یووړل شي، ځکه چې دا هېواد د اټوم بم ترلاسه کولو پر لور روان دی او له دې وسلې څخه به د اسرائیل د لهمنځه وړلو لپاره کار واخلي.
نوموړي فاکس نیوز ته ویلي، چې د ایران سپاه پاسداران هڅه کوي تر حزبالله وروسته ژر تر ژره یورانیم غني کړي او اټوم بم جوړ کړي.
هغه اندېښنه څرګنده کړه، چې یران به د اټومي وسلې له ترلاسه کولو وروسته، د نورو ځواکمنو هېوادونو خلاف، دا وسله عملي وکاروي.
لومړي وزیر د امریکا ولسمشر ډونالډ ټرمپ دریځ وستایه او ویې ویل چې د هغه لیدلوری “تازه او هیلهورکوونکی” و، او ټرمپ باور درلود چې باید له ایران سره معامله نه، بلکې مقابله وشي.
د طالبانو حکومت د پوهنې وزارت وايي، له ایران څخه د را اېستل شویو افغانانو ماشومان به په ښوونیزو بنسټونو کې شامل کړي.
له یاد وزارت څخه په خپره شوې خبرپاڼه کې راغلي، چې د را اېستل شویو افغانانو ماشومانو لپاره به په ټولو رسمي ښوونځیو، دارالعلومونو، مدرسو او نورو دولتي او خصوصي تعلیمي بنسټونو کې د زده کړو زمینه برابرېږي.
خبرپاڼې زیاته کړې، چې دا چاره له ځنډ او خنډ پرته د افغان ماشومانو د زدهکړو لپاره ترسره کېږي.
د غزې روغتیايي سرچینو ویلي چې د شنبې په ورځ لږ تر لږه ۱۱۰ فلسطینیان د اسراییلي بریدونو کې وژل شوي دي.
راپورونه وایي چې ۳۴ تنه د رفح په سويل کې هغه مهال ووژل شول، کله چې د امریکا لخوا ملاتړ کېدونکي خیریه بنسټ نه د مرستې اخیستو په کتار کې ولاړ وو.
الجزیرې د عیني شاهدانو له قوله ویلي چې اسراییلي ځواکونو په مستقیم ډول د رفح په الشکوش سیمه کې پر خلکو ډزې کړي.
په یادو کسانو کې ډېری وژل شوي هغه دي، چې له خیریه بنسټونو د مرستو تر لاسه کولو لپاره راغلي وو.
اسرائیلي چارواکي وايي چې د ۶۰ ورځني اوربند او د بندیانو د خوشې کولو وړاندیز یې منلی؛ خو حماس هغه رد کړی.
رویټرز د فلسطیني او اسرائیلي سرچینو په حواله راپور ورکړی چې د اسرائیلي ځواکونو د شاتګ پر سر اختلاف، د اوربند د خبرو خنډ شوی.
سرچینې زیاتوي چې خبرې اترې به د امریکا د ۶۰ ورځني اوربند د طرحې په اړه دوام ومومي.
د مقاومت په نوم جبهې د بهرنيو اړیکو مشر علي میثم نظري ويلي، موثق راپورونه شته چې چين د بګرام هوايي اډه کې حضور لري.
نوموړي طالبان تورن کړي چې د بهرنيو ځواکونو د مخالفت دعوهیې درواغ ده او په عملي توګه د نورو هېوادونو د مداخلې وسيله ګرځېدلي دي.
نظري دا څرګندونې په خپل ایکس کې کړي او ويليیې دي طالبان د هېواد د حاکميت لپاره نه، بلکې د افراطي ايډیولوژۍ او شخصي ګټو لپاره جنګېدلي دي.
هغه خبرداری ورکړی چې د افغان خاورې، شتمنیو او منابعو استفاده د هر بهرنۍ ادارې لخوا، د افغانانو له رضا پرته، د منلو نه ده.
د طالبانو حکومت تېرکال د چين حضور رد کړی و او ويليیې و چې بګرام د دوی تر کنترول لاندې دی؛ خو تازه راپورونه وايي، چې چين دا پخوانۍ امريکايي پوځي اډه اداره کوي.
بل لورته تېره ورځ د افغان سولې لپاره د امریکا پخواني ځانګړي استازي زلمي خلیلزاد د چين د حضور راپورونه ناسم بللي دي.
فارس خبري اژانس وایي، چې د جون ۱۵مه اسراییلو په تهران کې د ایران د ملي امنیت شورا پر غونډې هوایي برید کړی و، چې د ایران ولسمشر مسعود پزشکیان پکې د وتلو پر مهال په پښه ټپي شوی دی.
فارس لیکلي، چې دا برید د اسراییلي جنګي الوتکو لهخوا د شپږو بمونو یا توغندیو په واسطه ترسره شوی، څو د ودانۍ د ننوتو او وتلو لارې بندې کړي.
سرچینه زیاتوي، ولسمشر پزشکیان او نور مشران د اضطراري لارې لهخوا وتلي؛ خو ځینې یې برسېرن ټپیان شوي دي.
فارس د پزشکیان د دفتر له قوله ویلي، چې دا برید د ولسمشر د وژنې هڅه وه.
تر اوسه اسراییلو د دغو ادعاوو په اړه څه نهدي ویلي.
د ۲۰۲۵ کال په لومړۍ نیمایي کې د افغانستان او پاکستان ترمنځ سوداګري ۹۸۹ میلیونه ډالرو ته رسېدلې ده، چې ۲۷۷ میلیونه یې د افغان صادراتو برخه ده.
د دواړو هېوادونو د سوداګرۍ ګډې خونې ویلي، چې افغانستان پاکستان ته پنبې، سکاره، پياز، رومي، ممپلي، کشمش، ماش او تالک ډبره صادره کړې ده، او له هغه هېواده یې د ۷۱۲ میلیونه ډالرو واردات کړي، چې پکې سیلا وریجې، درمل، بوره، د پنبې ټوکر او صنعتي مواد شامل دي.
د سوداګرۍ خونې چارواکي له پاکستان سره د دوامدارو سوداګریزو او دیپلوماتیکو اړیکو پر اړتیا ټینګار کوي.