یوناما په کابل کې د مېرمنو او نجونو د نیولو په اړه اندېښنه څرګنده کړې.
یوناما ویلي، چې د چادري د نه رعایت له امله د جولای له ۱۶مې تر ۱۹مې نېټې پورې په کابل کې څو ښځې او نجونې نیول شوې دي.
دوی دا کار د اندېښنې وړ بللی او ویلي یې دي چې له واکمنو سره یې د موضوع په تړاو خبرې پیل کړې دي.
دغې ادارې له طالبانو غوښتي چې د ښځو او نجونو پر ازادیو محدودیتونه لرې کړي.
د طالبانو حکومت تر اوسه په دې اړه څه نه دي ویلي.
د ایران د ښوونې او روزنې وزیر ویلي چې حکومت د اسراییلو سره د ۱۲ ورځنۍ جګړې په اړه یو ځانګړی ضمیمه چمتو کړی، چې راتلونکي ښوونیز کال کې به ښوونځیو کې د تدریس لپاره شامل شي.
نوموړي زیاته کړې چې اوس مهال ایران له ۱۳۰ څخه تر ۱۴۰ زرو ښوونکو ته اړتیا لري.
هغه همداراز وویل، سږ کال کتابونه چاپ شوي؛ نو ځکه د جګړې موضوع پکې نشي ورګډولی؛ خو دا هڅه کېږي چې زدهکوونکو ته د جګړې په اړه دقیقه پوهه ورکړل شي.
د طالبانو حکومت د ریاستالوزراء اداري مرستیال مولوي عبدالسلام حنفي د اسلامي نړۍ د پیوستون سازمان له مشر شیخ محمد بن عبدالکریم العیسي سره په ارګ کې لیدلي.
په دې لیدنه کې عبدالسلام حنفي ویلي چې «اسلامي امارت» د هر ډول فساد، ناامنۍ او بهرني تهدید پر وړاندې په پیاوړي دریځ ولاړ دی.
نوموړي له مرستندویو بنسټونو وغوښتل چې د کډوالو په برخه کې خپل انساني مسؤلیت ادا کړي او له افغان ولس سره د زغم، مرستې او همکاریو نوی فصل پرانیزي.
شیخ العیسي ویلي، د اسلامي نړۍ د پیوستون سازمان د امت د یووالي، علمي همغږۍ او ګډو اسلامي ارزښتونو لپاره کار کوي.
نوموړي د طالبانو له حکومت سره د ښو اړیکو دوام یقیني وباله او ډاډ یې ورکړ چې دا سازمان به د افغانانو ترڅنګ ولاړ وي.
د خوراک او کرنې سازمان (فائو) وايي چې د وروستیو سیلابونو له امله په ټول هېواد او په ځانګړي ډول په میدان وردک کې ۱۸۲۰۰ کسان متضرر شوي دي.
دغه سازمان وايي چې له ۵۰ زیاتو کانالونو او ۸۸۵ هکتاره کرنیزو ځمکو ته زیان رسیدلی دی.
فائو زیاتوي چې د سیلابونو د اغېزو ارزونه کوي.
د یادونې ده، چې تېره اوونۍ په بېلابېلو ولایتونو کې سیلابونو ځمکې او خلک زیانمن کړي دي.
د طالبانو حکومت د کار او ټولنيزو چارو وزارت وياند په يو ويډيويي پيغام کې ويلي، چې قطر ته د افغان کډوالو د لېږلو هوکړه شوې.
سميع الله ابراهيمي ويلي، لومړي پړاو کې به ۷۰۰ افغان کارګر د قطر ګډ دولتي شرکت او د افغانستان د چارو موندنې دولتي شرکت له لوري استول کيږي.
دغې وزارت ويلي، د کارګرو نوم ليکنه به له هېواده بهر د کارګرو اعزام رياست له لوري ترسره کيږي.
د بشر حقونو سازمان «حالوش» راپور ورکړی چې د ایران په سراوان کې د سپاه پاسداران د یو عملیاتي ټیم لږ تر لږه ۱۰ غړي د وسلهوالو په برید کې وژل شوي او ۲ نور ټپیان دي.
راپور وایي، وژل شوي کسان د ایران، افغانستان او پاکستان اتباع وو، او دا برید د شنبې سهار د سپاه قدس سیمهییزې قرارګاه پورې اړوند ټیم باندې شوی.
د راپور له مخې، لږ تر لږه پنځه وژل شوي افغانان دي، او یو افغان او دوه پاکستانیان ټپیان شوي دي.
حالوش ادعا کړې چې دا کسان له پخوا افغان نظامیان وو، چې د طالبانو له واکمنېدو وروسته ایران او پاکستان ته تللي او سپاه د مخالفینو پر ضد کارولي.
تر اوسه هیڅ ډلې د برید مسؤلیت نه دی منلی؛ خو د سراوان سیمه ډېری وخت د جیش العدل او نورو بلوڅو وسلهوالو د بریدونو شاهد وي.
د ډیلي میل ورځپاڼې د راپور له مخې، وروسته له دې چې د طالبانو لاس ته د شاوخوا ۱۹،۰۰۰ هغو افغانانو معلومات ورغلي چې له بریتانوي ځواکونو سره یې همکاري کړې او د پناه غوښتنې غوښتنه یې کړې وه، په تېرو څو ورځو کې لږ تر لږه ۱۰ کسان د طالبانو له لوري وژل شوي دي.
په دې وژل شویو کې څلور کسان په بدخشان کې په ډلهییزه توګه اعدام شوي او څلور نور بیا له ایران څخه د جبري بیرته ستنیدو وروسته وژل شوي دي.
ویل کېږي چې دا کسان ښایي د افغان ځانګړو ځواکونو پخواني غړي وي چې د طالبانو حکومت پر وړاندې یې د بریتانوي ځواکونو ملاتړ کاوه.
د اسراییل د لومړي وزیر دفتر اعلان وکړ چې بنیامین نتانیاهو د خوړو له مسمومیت سره مخ شوی او په راتلونکو درې ورځو کې به خپلې دندې له کور څخه ترسره کړي.
دفتر وايي چې د هغه روغتیایي وضعیت په ښه کېدو دی.
۷۵ کلن نتنیاهو د خرابو خوړو له امله د کولمو له التهاب او د بدن د اوبو له کمښت سره مخ شوی.
د یادونې ده، چې نتنیاهو تر دې وړاندې هم سالم روغتیايي حالت نه درلود.
خراسان ډایري وایي، د افغانستان په شمال بدخشان ولایت کې د سرو زرو په کان اخ و ډب کې د څلورو چنایانو په ګډون ۸ تنه وژل شوي دي.
دغې رسنۍ لیکلي چې یاده پیښه د بدخشان د شهر بزرګ ولسوالۍ د سرو زرو په یو کان د شخړې له امله رامنځته شوې.
د بدخشان سیمه ایز چارواکي پیښه تایید کړې خو د پیښې د څرنګوالي په اړه یې څه نه دي ویلي.
روسي رسنۍ وایي، طالب ځواکونو د هیواد په شمال کندز ولایت کې یو روسي څیړونکی نیولی او د پوښتنو ګرویږونو لپاره یې منتقل کړی دی.
یادې رسنۍ ویلي چې سویاتوسلاو کاورین نومیږي او روسي کلتور پیژندونکی دی چې د روسیې د علومو اکاډمۍ د ختیځ پیژندنې اسنټیتوت او لرغونې قوم پیژندنې مرکز سره کار کوي.