د ملګرو ملتونو لپاره د قطر دايمي استازې، عاليه احمد بن سيف آلثاني ويلي، چې هېواد به يې له افغانستان سره د سولې او ثبات د تأمين په برخه کې خپل منځګړي رول ته دوام ورکړي.
هغې د ملګرو ملتونو د امنيت شورا غونډې ته ويلي، دا هڅې د ملګرو ملتونو په مشرۍ د «دوحې بهير» کوربتوب هم شاملوي، چې موخه يې افغانستان بېرته نړيوالې ټولنې ته ورګډول دي.
په کاناډا کې د جرمني سفير ويلي، برلين طالبان د افغانستان د مشروع حکومت په توګه نه پېژني، او له دې ډلې سره تعامل د رسميت مانا نه لري.
متياس لوتنبرګ دا څرګندونې د اتاوا په يوه غونډه کې وکړې، چې پکې يو افغان فعال اعجاز ملکزاده له طالبانو سره د جرمني د برخورد په اړه انتقاد وکړ او دا يې د بشري حقونو له ارزښتونو سرغړونه وبلله.
دغه څرګندونې وروسته له هغه کېږي چې راپورونه خپاره شول، چې جرمني د طالبانو حکومت دوه ديپلوماتان منلي، څو د مهاجرو د بېرته لېږد اسانتياوې برابرې کړي.
راپورونه وايي، طالبانو سيد مصطفی هاشمي او نبراسالحق د خپلو استازو په توګه جرمني ته معرفي کړي، او دا کسان به په برلين او بُن کې د افغانستان په سفارت او قونسلګرۍ کې فعاليت کوي.
سرچینې وايي، یو پخوانی افغان سرتېری په ایران کې د لوړ منزل څخه له لوېدو وروسته مړ شوی دی.
دغه سرتېری “کاکا جان کوهبندی” نومېده او تېره اوونۍ یې په تهران کې ژوند له لاسه ورکړی.
هغه د کاپیسا ولایت د کوهبند ولسوالۍ د درنامه کلي اوسېدونکی و، چې د پخواني حکومت له سقوط وروسته ایران ته تللی و.
نږدې یوه اوونۍ مخکې هم یو بل پخوانی سرتېری په ورته ډول په تهران کې مړ شوی و.
د افغانستان د ملي امنیت پخوانی رییس محمد معصوم ستانکزی وایي، ولس د کلونو راهیسې د لویو قدرتونو او سیمهییزو هېوادونو د ګټو قرباني شوی، او اوس د بشري معیارونو تر پښو لاندې کولو له امله مهاجرین له یوې سترې فاجعې سره مخ دي.
نوموړی زیاتوي چې باید له تېرو ناخوالو زده کړه وشي، او یوازې د یووالي او ګډو هڅو له لارې دا ناورین بدلېدای شي.
هغه ټینګار کړی، چې د یو بل منل بریا راولي، خو نفاق بیا ناکامي زېږوي.
د طالبانو حکومت اقتصادي کمېسیون تأیید کړې چې د ابو نصر فراهی بندر د بارولو او ښکته کولو فعالیتونو پراختیا لپاره به ۴۰۰۰ جریبه ځمکه ځانګړې شي.
د طالبانو حکومت د رئیسالوزرا اقتصادي معاونیت په یوه اعلامیه کې ویلي، چې دا پرېکړه د چهارشنبې په ورځ د اقتصادي کمېسیون په غونډه کې شوې.
یاد کمېسیون د ښار جوړونې وزارت ته دنده سپارلې چې د بندر پراختیا نقشه او ډیزاین جوړ او په ټاکلي وخت یې اړوندو ادارو ته وسپاري.
همداراز، د مالیې وزارت ته ویل شوي چې د دې بندر د پراختیا پروژه د راتلونکي مالي کال په بودجه کې د اړوندو وزارتونو له برخې څخه شامله کړي.
د رئیسالوزرا اقتصادي دفتر زیاتوي، دا پرېکړه د منظورۍ لپاره د طالبانو حکومت د مشر شیخ هبتالله اخندزاده دفتر ته لېږل شوې ده.
ابونصر فراهی بندر د افغانستان او ایران ترمنځ له لویو سوداګریزو بندرونو څخه دی چې په فراه ولایت کې موقعیت لري.
پخوانۍ دیپلوماته اصیلا وردګ وايي چې په ایټالوي سنا او پارلمان کې یې د هغو افغان کډوالو د خراب وضعیت په اړه خبرې کړې، چې له ایران څخه په زور شړل کېږي.
نوموړې ویلي، د دغو کډوالو د عاجل ملاتړ او ساتنې اړتیا ډېره ده.
هغې زیاته کړې چې د ایټالیا حکومت کولای شي د دوی په مرسته او اړتیاوو پوره کولو کې مهم رول ولوبوي.
د طالبانو حکومت او پاکستان چارواکو نن چهارشنبه په اسلامباد کې د سوداګرۍ ترجیحي هوکړهلیک لاسلیک کړ، چې موخهیې د دواړو هېوادونو ترمنځ د سوداګرۍ اسانتیا او اقتصادي تبادلاتو پراخول دي.
دغه هوکړهلیک د طالبانو حکومت د صنعت او سوداګرۍ وزارت مرستیال احمدالله زاهد او د پاکستان د سوداګرۍ وزارت مرستیال جاوېد پاول ترمنځ لاسلیک شوی دی.
دا هوکړه به د ۲۰۲۵ کال د اګست له لومړۍ نېټې نافذه او یو کال به اعتبار ولري؛ خو د دواړو لورو په توافق سره تمدیدېدای شي.
د هوکړې له مخې، د ګمرکي تعرفو کچه له ۶۰ سلنه نه ۲۷ سلنه ته راټیټیږي، چې اته صادراتي توکي پکې شامل دي.
د طالبانو حکومت د بهرنیو چارو سرپرست وزیر امیرخان متقي د روسیې د بهرنیو چارو له وزیر سرګي لاوروف سره ټلیفوني خبرې کړې دي.
دواړو لوریو له رسمیت پېژندنې وروسته د سیاسي، اقتصادي او سیمهییزو همکاریو پر پراخېدو بحث کړی دی.
متقي د روسیې له دې پرېکړې مننه وکړه او دا یې له نړۍ سره د بېرته نښلېدو لپاره مهم ګام وباله.
لاوروف وویل، رسمیت پېژندنه به نوې همکارۍ رامنځته کړي، او متقي ته یې د مسکو فارمټ غونډې د ګډون رسمي بلنه ورکړه.
پخوانی لومړی مرستیال امرالله صالح وایي، جمهوریت په افغانستان کې د خلکو د پراخ او موثر ګډون لپاره واضح لارې درلودې؛ خو د طالبانو جوړښت یوازې واک ته متوجه دی او د خلکو ګډون نه مني.
هغه ټینګار کوي چې جمهوریت یو منل شوی اصل دی او طالبان هېڅکله مشروع حکومت نه شي جوړولی.
صالح ویلي، چې دی له پنجشیر څخه دی او خپل هویت ته ژمن دی.
د سي اېن اېن یوې تازه څېړنې ښودلې چې د امریکا د بشري مرستو کمښت، په ځانګړي ډول د روغتیا په برخه کې، د زرګونو افغان ماشومانو او ښځو ژوند له خطر سره مخ کړی دی.
راپور وايي، د ننګرهار په ولایتي روغتون کې د درملو، طبي پرسونل او خوړو نشتوالي له امله د ماشومانو مړینه لوړه شوې ده.
په دغه راپور کې د روغتون ډاکټرانو له قوله ویل شوي، له هغه وروسته چې امریکا خپلې مالي مرستې بندې کړې، د ماشومانو د مړینې کچه له ۳ څخه تر ۴ سلنې لوړه شوې ده او ناروغان اړ دي چې خپله درمل واخلي، خو ډېری کورنۍ دا توان نه لري.
امریکا تر دې وړاندې د روغتیايي خدماتو لګښتونه او د ډاکټرانو معاشونه ورکول، خو د ۱.۷ میلیارده ډالرو مرستې بندېدو، د روغتیا ترڅنګ، د زدهکړو، ماین پاکۍ، ښځو پیاوړتیا او کرنې پروژې هم اغېزمنې کړې دي.