د پخواني حکومت لومړی مرستیال، امرالله صالح د زلمي خلیل‌زاد د میرمنې، چیرل بینارد، له لوري د عزیزي بانک د ملاتړ په غبرګون کې ویلي چې دا بانک یوه “کلاه‌برداره مالي پروژه” ده، او سقوط یې یوازې د وخت خبره ده.

صالح ویلي، عزیزي بانک د درواغو، مالي درغلیو، مبهمو پانګونو، پیسو مینځلو او ترهګرۍ د مالي تمویل یوه مجموعه ده، چې د امریکا د مشهوره کلاه‌بردار برنارد میډوف له پانزي‌طرحې سره ورته والی لري.

صالح تور پورې کړی چې زلمي خلیل‌زاد او نږدې کسانو یې له دې مالي طرحې له دوه لسیزو راهیسې ګټه اخیستې ده.

هغه د خلیلزاد مېرمن چیرل بینارد یې د طالبانو لابي‌ګره بللې او په وینا یې د ښځو د حقونو پر ځپلو او بشري وضعیت چوپ پاتې ده؛ خو د عزیزي بانک دفاع کوي.

د کډوالو نړیوال سازمان (IOM) وايي، چې د یکشنبې په ورځ د یمن د ابین ولایت سواحلو ته نږدې یوه کښتۍ ډوبه شوې، چې له امله یې لږ تر لږه ۶۸ پناه‌ غوښتونکي مړه شوي او ۷۴ تنه نور لا هم ورک دي.

یاد سازمان زیاتوي، چې کښتۍ د ۱۵۴ ایتهوپیايي کډوالو سره له افریقا څخه د یمن له لارې سعودي عربستان ته روانه وه.

تر دې دمه ۵۴ مړي د خنفر ساحلي سیمه کې او ۱۴ نور په بله سیمه کې موندل شوي دي.

د ایران د بهرنیو چارو وزارت ویاند اسماعیل بقایي ویلي، چې تهران به د طالبانو د حکومت په پېژندلو کې خپلواکه پریکړه کوي او دا به د هېواد د ملي ګټو پر اساس وي.

بقایي په دې اړه څرګنده کړې چې د ایران او پاکستان چارواکو ترمنځ د افغانستان پر وضعیت خبرې شوې دي او دواړه هېوادونه په افغانستان کې د ثبات په اړه ګډه اندېښنه لري.

د یادونې ده، چې پاکستان هم ویلي و، چې لاهم د طالبانو حکومت د رسمیت پېژندنې وخت نه دی را رسېدلی.

د طالبانو حکومت د ټولګټو وزارت وایي، چې د روانې زمري میاشتې له درېیمې تر نهمې نېټې پورې د هېواد له بېلابېلو بندرونو څخه د اوسپنې پټلۍ له لارې نږدې ۹۸ زره مټریک ټُنه توکي لېږدول شوي دي.

د یاد وزارت ویاند، محمد اشرف حق‌شناس، پر خپله اېکس پاڼه لیکلي، چې له حیرتان بندر څخه څه باندې څلور شپېته زره ټنه، له اقینې بندر څخه شاوخوا یوسل او څلور دېرش زره ټنه، له تورغونډۍ بندر څخه نږدې یوسل او درې زره ټنه او د خواف–هرات اوسپنې پټلۍ له لارې څه باندې اووه نوي زره ټنه توکي انتقال شوي دي.

یاد وزارت وايي، د اوسپنې پټلۍ دا انتقالات نه یوازې اقتصادي پلوه مؤثر دي، بلکې د ترانسپورت په برخه کې د چټکتیا او خوندیتوب سبب هم ګرځي.

حماس اعلان کړی چې که اسرائیل ځینې شرطونه ومني؛ نو دوی چمتو دي له سره صلیب سره د هغو یرغمل کسانو د مرستې همغږي وکړي چې د دوی په ولکه کې دي.

دغه څرګندونې وروسته له هغې شوې چې حماس یوه ویډیو خپره کړه چې پکې یو سخت کمزوری یرغمل ښکاري، او دې اقدام د لوېدیځو هېوادونو له خوا تند غبرګونونه را وپارول.

حماس ویلي، له سره صلیب سره هر ډول همکاري به هغه مهال ممکنه وي چې که اسرائیل د بشري مرستو لارې پرانیزي او د مرستو د وېش پر مهال خپل هوايي بریدونه بند کړي.

د اسرایلي چارواکو په وینا، دا مهال ۵۰ یرغمل کسان لا هم په غزه کې دي، چې یوازې د ۲۰ تنو د ژوندي پاتې کېدو امکان شته.

د اسرائیل له ۶۰۰ څخه زیاتو پخوانیو امنیتي چارواکو، په شمول د استخباراتي ادارو پخوانیو مشرانو، د امریکا ولسمشر ډونالډ ټرمپ نه په یوه لیک کې غوښتنه کړې چې پر بنیامین نتانیاهو فشار راوړي څو د غزې جګړه پای ته ورسوي.

په لیک کې ویل شوي چې حماس نور د اسرائیل لپاره ستراتیژیک ګواښ نه دی، او د جګړې پای ته رسېدو سره به د حماس له لوري پاتې برمته شوي کسان هم آزاد شي.

د ۱۲ ورځني جګړې له پای ته رسېدو نږدې شپږ اوونۍ وروسته، د ایران چارواکو د «دفاع شورا» په نوم د یوه نوي ارګان د جوړېدو اعلان وکړ.

د ایران د ملي امنیت عالي شورا ویلي چې دا شورا به د پوځ د دفاعي طرحو او د وسلوالو ځواکونو د پیاوړتیا وړاندیزونه په متمرکز ډول ارزوي.

د دې شورا مشري به د ایران ولسمشر کوي او د قواوو مشران، د وسلوالو ځواکونو قوماندانان او اړوند وزارتونه به پکې شامل وي.

دا اعلان په داسې حال کې شوی چې د ایران او اسرائیلو ترمنځ د نوې احتمالي نښتې په اړه اندېښنې راپورته شوې دي.

د اسرائیلو ۱۲ تلویزیوني کانال ویلي چې که څه هم اوربند شوی؛ خو دواړه لوري د احتمالي بلې جګړې لپاره چمتووالی نیسي.

همدارنګه، د ایران د پوځ لوی قوماندان امیر حاتمي خبرداری ورکړی چې د اسرائیلو ګواښونه لا هم پر ځای دي او باید په کمه سترګه ورته ونه کتل شي.

د واشنګټن پوسټ د راپور له مخې، د امریکا د کورنۍ امنیت وزارت په کنیکټیکټ او سن ډیاګو کې دوه پخواني افغان ژباړونکي د امنیتي ګواښونو په تور نیولي دي.

دغه کسان، سره له دې چې قانوني د کډوالۍ اسناد یې لرل او ټول مهاجرتي بهیرونه یې بشپړ کړي وو، ونیول شول.

چارواکو ویلي چې یو یې جدي ګواښ ګڼل کېږي؛ خو هېڅ ثبوت یې نه دی وړاندې کړی.

دغه نیونې د امریکا د پوځ پخوانیو سرتېرو او د مهاجرو د ملاتړ ډلو له سختو نیوکو سره مخ شوې دي.

د نیول شوو کسانو وکیلان وايي، دواړو د امریکا له پوځ سره بشپړ همکاري کړې او خپل نظامي ریکارډونه، قراردادونه او د سپارښت لیکونه یې سپارلي دي، خو اوس د شړلو له خطر سره مخ دي.

د غزې د روغتيا وزارت ویلي، چې په تېرو ۲۴ ساعتونو کې د لوږې او د تغذيې د کموالي له امله شپږ نور کسان مړه شوي چې ورسره د دې بحران د قربانيانو شمېر ۱۷۵ تنو ته رسېدلی، چې لږ تر لږه ۹۳ يې ماشومان دي.

په ورته وخت کې اسرائيلو له نږدې دوو کلونو جګړې وروسته د غزې سيمې ته د سون توکو د لېږد اجازه ورکړې ده.

د القاهره نيوز د راپور له مخې، دوه لارۍ چې لسګونه ټنه سون توکي وړي، ټاکل شوې غزې ته داخل شي.

د اسرائيلو د حکومت د فعاليتونو د همغږۍ اداره وايي چې د تېرې اوونۍ په ترڅ کې له ۲۳ زرو ټنو زياته مرسته په ۱۲۰۰ لاریو کې غزې ته رسېدلې؛ خو سلګونه لارۍ لا هم د وېش مرکزونو ته نه دي رسېدلي.

د غزې روغتيايي چارواکي وايي چې د سون توکو کمښت روغتيايي خدمات سخت اغېزمن کړي او ډاکټران اړ کړي چې يوازې د سختو ناروغانو او ټپيانو درملنه وکړي.

د امريکا ولسمشر دونالد ترمپ د روسيې ولسمشر ولادیمیر پوتین سخت‌دریځه او په بندیزونو کې ماهر بللی.

ټرمپ ویلي، چې د اوکراین د جګړې د پای ته رسولو لپاره پخوانۍ خبرې نتیجې ته نه دي رسېدلي.

ترمپ د نیوزمکس شبکې سره په مرکه کې ویلي، درې ځله نږدې وو چې موافقه وشي؛ خو پوتین ناڅاپه خپل بریدونه بیا پیل کړل.

هغه ټينګار کړی، که جګړه دوام وکړي، واشنګټن به پر مسکو نوي بندیزونه ولګوي.

ترمپ مخکې هم روسيې ته ۱۲ ورځنی مهلت ورکړی و چې د اوکراین د جګړې د پای لپاره اقدام وکړي، که نه له سختو بندیزونو سره به مخ شي.