د طالبانو حکومت ویاند ذبیح الله مجاهد وايي، له ټولو هېوادونو سره غوره اړیکې غواړي او دا د دوی د ازادۍ تقاضا هم ده.
هغه ویلي، له هیچا سره د نورو پر سر دوښمني نه کوي.
مجاهد زیاتوي، له ټولو ګاونډیو هېوادونو سره د دوی اړیکې ښې دي.
هغه د طالبانو حکومت د څلورمې کالیزې په مناسبت یو ټویټر سپیس کې ویلي، چې د سیمې له هېوادونو سره اړیکې د پخوا په پرتله ښې شوې دي.
د طالبانو حکومت ویاند ذبیح الله مجاهد وايي، د منځنۍ او جنوبي اسیا ترمنځ د وصل یوازینۍ نقطه افغانستان دی او دواړه لوري اړتیا لري، چې له افغانستان سره غوره تعامل کړي.
د هغه په خبره، د سیمې هېوادونه د خپلو ګټو لپاره هم افغانستان سره غوره اړیکې غواړي او د افغانستان جیوپولیټک ارزښت د دې سبب شوی، چې دا سیمه اوس په ارزښتناکې سیمې بدله شي.
نوموړی وايي، دوی هڅه کوي، چې افغانستان د سیمې هېوادونو د وصل په نقطه بدل کړي.
د طالبانو حکومت ویاند ذبیح الله مجاهد وايي، په خلکو باید داسې کار وشي، چې خپله په ځان باندې شرعي احکام عملي کړي.
هغه د طالبانو حکومت د څلورمې کالیزې په مناسبت ویلي، چې په ټول افغانستان کې باید دې ته کار وشي، چې خلک له فشار پرته شرعي احکام ومني.
مجاهد وايي، د خلکو له لوري په خپله د شرعي احکامو منل تر دې غوره دي، چې په هغوی دا احکام په زوره ومنل شي.
ټاکل شوې امریکایي ولسمشر ډونالډ ټرمپ د خپل روسيي سیال ولادیمیر پوتین سره د امریکا په الاسکاي کې وګوري.
ولسمشر ټرمپ سپینې ماڼۍ کې خبریالانو ته وویل چې ۲۵ سلنه ددې چانس شته چې خبرې په ښه شکل مخته لاړې نه شي.
ولسمشر ټرمپ وویل که د ولسمشر پوتین سره یې خبرې ښې مخې ته لاړې شي؛ نو د راتلونکې ناستې لپاره به د اکراین ولسمشر ولادیمیر زلنسکي، د اروپايي هیوادونو د یو شمیر مشرانو او د بریتانیا د لومړي وزیر په ګډون په الاسکای کې دوهمه ناسته وکړي.
الاسکای د روسیې سره شاوخوا ۶۰ کیلو متره فاصله لري.
د خیبرپښتونخوا په کورمې ولسوالۍ د علیزۍ په سیمه کې د نامعلومو وسلهوالو په برید کې درې پولیس وژل شوي دي.
چارواکي وايي، برید کوونکو لومړی د پولیسو پر موټر لاسي بم وغورځاوه او وروسته یې پر هغوی ډزې وکړې.
د پېښې وروسته په سیمه کې د شکمنو د نیولو عملیات پیل شوي دي.
پخواني ولسمشر حامد کرزي پر نورستان د پاکستان بریدونه وغندل.
کرزي پر خپله ایکسپاڼه لیکلي، چې پاکستان باید د افغانستان ملي حاکمیت ته درناوی وکړي.
د کرزي يه خبره، اسلام اباد باید له کابل سره نیکو اړیکو جوړولو ته را ودانګي.
د یادونې ده، چې وړمه ورځ د پاکستان له لوري پر نورستان بریدونه شوي وو؛ خو د طالبانو حکومت چارواکو یې په اړه څه ونه ویل.
بل لورته ټولنیزو رسنیو کې د یادو بریدونو په اړه خبرونه لاس په لاس شوي وو.
د ایټالیا د لامپدوسا ټاپو ته نېږدې د کډوالو دوه کښتۍ ډوبې شوي چې له امله یې لږ تر لږه ۲۶ کسان مړه او ۶۰ نور ژغورل شوي دي.
د ملګرو ملتونو د کډوالو د ادارې په وینا، په دواړو کښتیو کې شاوخوا ۹۵ کسان سپاره وو چې له لیبیا نه یې اروپا ته سفر کاوه.
د ژغورل شویو کسانو له ډلې ۵۶ نارینه او څلور ښځې دي.
چارواکي وايي، ښايي نور کسان لا هم ورک وي.
د یادونې ده چې د روان کال له پیل راهیسې په منځني مدیترانه کې د اروپا پر لور د تګ پر مهال لږ تر لږه ۶۷۵ کسان ژوند له لاسه ورکړی دی.
د هرات ولایت د کرخ ولسوالۍ پاشدان بند نن د طالبانو حکومت د ریاستالوزراء اقتصادي مرستیال ملا عبدالغني برادر اخوند له لوري ګټې اخیستنې ته وسپارل شو.
نوموړي ویلي، دغه بند د وچکالۍ د کمېدو، د کرنیزو ځمکو د خړوبولو او د بزګرانو د ستونزو د حل لپاره مهم دی.
پاشدان بند د ۵۴ میلیونه متر مکعب اوبو د زېرمه کولو، ۱۳ زره هکټاره ځمکو د خړوبولو او دوه میګاواټه برېښنا د تولید وړتیا لري.
ملا برادر د ملي او سیمهییزو پروژو ملاتړ ته د طالبانو د حکومت ژمنتیا څرګنده کړه او پر پانګوالو یې غږ و
کړی چې په بېلابېلو سکټورونو کې پانګونه وکړي.
د طالبانو حکومت د بهرنیو چارو وزارت پاکستان ته د ازادۍ د ورځې مبارکي ورکړې.
د طالبانو حکومت د بهرنیو چارو سرپرست وزیر امیرخان متقي د پاکستان د بهرنیو چارو وزیر اسحاق ډار ته په یو لیک کې لیکلي، چې دوی د پاکستان ورور ولس ته د دغې ورځې مبارکي ورکوي.
لیک کې راغلي، چې د طالبانو حکومت له پاکستان سره د ښو اړیکو غوښتونکی دی.
امیرخان متقي دغه راز اسحاق ډار ته د ښه صحت غوښتنه کړې.
د افغانستان د پخواني ولسمشر مرستيال امرالله صالح ويلي چې دی د پرسونل ضد او د وسايطو ضد ماينونو د پېرلو او د طالبانو پر لارو د پراخ ښخولو پلوي و.
نوموړي افغانستان انټرنیشنال ته په يوه ليکنه کې ليکلي چې د جمهوريت پر مهال د امنيتي ځواکونو له سترو کمزورتياوو يو د ماينونو نه کارول وو، ځکه افغانستان د ماين د نه کارولو تړون لاسليک کړی و.
صالح زياته کړې، د ماينونو کارولو وړانديز يې د ناټو له مخالفت سره مخ شو او له بهره د ماين پېرلو هڅې يې ناکامې شوې؛ خو د سقوط لس ورځې مخکې پخواني ولسمشر غني ورته وويل چې د ماين جوړونې وړانديز شوی ماشين فعال کړي.
د ده په وينا، هغه وخت پېښې چټکې شوې او د پلان بشپړېدل پاتې شول.
نوموړي ټينګار کړی چې غوښتل يې د ماين جوړونې کارخانې جوړې کړي؛ خو وخت او شرايطو يې اجازه ورنه کړه.
د جمهوري نظام د پرځیدو او په افغانستان کې د طالبانو حکومت د واک ته رسېدو د څلورمې کلیزې په درشل کې ښاغلي صالح په دې لیکنې کې د افغان سیاستوالو، د خلیلزاد په رول او واشنګټن ته د پخواني ولسمشر اشرف غني د سفر په اړه ډېرې ناویلې خبرې کړي.