د امریکا ولسمشر ډونالډ ټرمپ ویلي چې اوکراین باید د جګړې د پای ته رسېدو لپاره له روسیې سره هوکړې ته ورسېږي، ځکه په وینا یې «روسیه ستر ځواک دی؛ خو اوکراین داسې نه دی.»
د رویټرز د راپور له مخې، دغه څرګندونې هغه مهال وشوې چې ټرمپ په الاسکای کې د روسیې له ولسمشر ولادیمیر پوتین سره ولیدل.
رویټرز وایي، پوتین د اوکراین د لا نورو سیمو غوښتنه کړې او ټرمپ د هغه غوښتنې د اوکراین ولسمشر ولادیمیر زېلېنسکي ته هم رسولي دي.
ویل شوي پوتین ټوله ډونېتسک سیمه غواړي او غواړي چې زېلېنسکي یې ومني.
د رویټرز د راپور له مخې، د اسرایيلو پوځ د غزې د شمالي برخې د تخلیې لپاره چمتووالی نیسي.
چارواکو اعلان کړی چې له نن یکشنبې څخه به د سیمې اوسېدونکو ته خېمې او د لنډمهالي مېشتېدو نور وسایل ورکړي او د غزې سویل ته به یې انتقال پیل کړي.
غزه چې نږدې ۲.۲ میلیونه وګړي لري، د اسرایيلو په خبره د دې لپاره خالي کېږي چې ولسي وګړي خوندي پاتې شي.
په ورته وخت کې د اسرایيلو لومړي وزیر بنیامین نتنیاهو د ټولې غزې د نیولو او لاندې کولو پلان هم پر مخ وړي.
د طالبانو حکومت د کار او ټولنیزو چارو وزارت اعلان کړی چې د ۱۴۰۴ لمریز کال د زمري ۲۸مه، د سې شنبې په ورځ د هېواد د خپلواکۍ د بېرته ترلاسه کولو د ورځې په مناسبت، په ټول هېواد کې عمومي رخصتي ده.
یاد وزارت په یوه خپره شوې خبرپاڼه کې لیکلي چې دا ورځ د انګریزانو د ښکېلاک پای او د خپلواکۍ د ۱۰۶مې پرتمینې کلیزې سره برابره ده.
د ولسي جرګې پخوانۍ غړې، فوزیه کوفي په پاکستان کې د طالبانو د مخالفو سیاستوالو د ناستې جوړېدل یو مثبت ګام بللی دی.
نوموړې وايي که د سیمې هېوادونه د داسې خبرو زمینه برابروي، باید د خلکو ترمنځ د باور جوړولو لپاره یې هرکلی وشي.
ټاکل شوې دا غونډه د اګست په ۲۵ او ۲۶ وشي چې پکې د ښځو ډلې او د سیاسي ـ مدني ټولنې استازي د افغانستان د راتلونکي او د ښځو پر وضعیت بحث وکړي.
د افغان سولې لپاره د امریکا پخواني ځانګړي استازي زلمي خلیلزاد که څه هم د دې ناستې د ترسره کېدو خبر تایید کړی؛ خو د پاکستان کوربهتوب یې ناسم کار بللی او خبرداری یې ورکړی چې ځینې ګډونوال د طالبانو حکومت د پرځولو ټینګار لري.
په پاکستان کې د ولسمشر اصف علي زرداري د احتمالي استعفا او د پوځ مشر عاصم منیر د ولسمشر کېدو په اړه وروستۍ اوازې د پوځ مشر پخپله رد کړې دي.
عاصم منیر دا ګنګوسې “توطیه” بللې او ویلي یې دي چې دا د حکومت او چارواکو د مخالفو ډلو کار دی.
هغه په بروکسل کې ویلي: «زه د هېواد د ساتنې لپاره جوړ شوی یم، هېڅ بل مقام نه غواړم، ستره هیله مې شهادت دی.»
منیر ویلي، سیاسي پخلاینه یوازې د رښتینې بښنې په صورت کې ممکنه ده، چې ګومان کېږي اشاره یې د تحریک انصاف بنسټګر عمران خان ته وه.
نوموړي همداراز ډاډ ورکړی چې پاکستان به د امریکا او چین په اړیکو کې توازن وساتي، هند ته یې د نیابتي جګړې د هڅو په اړه خبرداری ورکړی او د طالبانو حکومت ته یې ویلي چې پاکستاني طالبان دې دغه هېواد ته نه اړوي.
د یادونې ده چې د طالبانو حکومت بیا تل ټینګار کړی چې د پاکستاني طالبانو موضوع د پاکستان کورنۍ ستونزه ده.
د فرانس پرېس خبري اژانس ویلي، چې په افغانستان کې د وچکالۍ او ناڅاپي سېلابونو له امله د خلکو د بېځایه کېدو کچه لوړه شوې ده.
د ملګرو ملتونو د معلوماتو له مخې، یوازې د روان کال له پیل راهیسې تر پنځه میلیونه زیات افغانان د اقلیم د بدلونونو له امله اغېزمن شوي او شاوخوا ۴۰۰ زره کسان بېکوره شوي دي.
راپور زیاتوي چې ډېری افغانان په خټو کورونو کې ژوند کوي او د کرهڼې او مالدارۍ له لارې ځانونه ساتي چې دې وضعیت یې د طبیعي پېښو پر وړاندې ډېر زیانمن کړي دي.
بل لورته د طالبانو حکومت د اوبو د مدیریت ځینې پروژې اعلان کړي، خو د وچکالۍ د حل لار یې د خداي اراده بللې ده.
یو لوړپوړی لویدیځ ډیپلومات وایي چې د طالبانو حکومت د کورنیو چارو وزیر سراجالدین حقاني له شیخ هبتالله اخندزاده څخه د لنډ مهال واټن اخیستو سره ستر سیاسي تاوان وکړ او دې کار د طالبانو د یو اړخ موقف ته صدمه ورسوله.
دغه دیپلومات د نوم نه اخیستو په شرط ویلي، حقاني ګومان کاوه چې له هبتالله اخندزاده څخه واټن نیول به د نړیوال ملاتړ لامل شي؛ خو نړۍ هېڅکله هغه ډلې ته ملاتړ نه ورکوي چې له القاعدې سره اړیکې ولري.
دی زیاتوي، حقاني د طالبانو حکومت له رهبر سره دوه میاشتې اړیکې پرې کړې؛ خو په دغه موده کې هبتالله اخندزاده د هغه پوښتنه ونه کړه او کله چې حقاني بېرته د اړیکې هڅه وکړه؛ نو د واک ډېره برخه یې له لاسه ورکړې وه.
ډیپلومات وايي، د حقاني نږدې کسانو ورته ویلي چې هغه باید یا له هبتالله سره نږدې پاتې شوی وای، یا یې باید د مخالفت لړۍ پر مخ بیولې وای.
نوموړي ویلي، چې ابراهیم صدر، چې د داخله وزارت مرستیال او د اخندزاده نږدې کس ګڼل کېږي، د حقاني د نهشتون پر مهال ټول واک تر لاسه کړی او نور هم پیاوړی شوی.
راپور زیاتوي، صدر له حقاني غوښتي چې د خپلو دفترونو شتمنۍ او نغدې پیسې د طالبانو حکومت ادارې سره ثبت کړي.
دا ډیپلومات ټینګار کوي چې حقاني باید له القاعده او تحریک طالبان پاکستان سره اړیکې پرې کړي.
د پکتیا پخواني والي حلیم فدايي ویلي، چې طالبانو له خپل رژیم څخه د “سرپرست” نوم لرې کولو څخه هغو سیاستوالو ته ښکاره پیغام ورکړی، چې په حکومت کې یې د ونډې خوبونه لیدل.
فدايي وایي، چې د طالبانو اصلي څېره باید بربنډه شي، څو هغه کسان چې د امتیاز تمه لري، نور له خیالونو راووځي.
نوموړي د طالبانو مشر ستایلی چې منافقت نه کوي، څه چې وایي، هماغه عملي کوي؛ خو کابل میشتي چارواکي بیا په ژبه یو څه وايي او زړه کې بل څه.
فدايي زیاتوي، چې د طالبانو مشري د ښځو، ازادۍ، تعلیم، مطبوعاتو، او اساسي قانون خلاف ده او د خپل شخصي فکر پر بنسټ هېواد اداره کوي.
نوموړي خبرداری ورکړی، چې د طالبانو د نرمې بڼې ترشا اصلي سخت دریځ پټ دی، او نړیوال باید له دغه اصلي واقعیت څخه غافل نه وي.
د پخواني حکومت د چارو ادارې لوی رییس فضل محمود فضلي ویلي، که د طالبانو د څلور کلن حاکمیت سراسري اختناق او سیستماتیک فکري نسلوژنه لا هم د خلکو د طالبپېژندنې سبب نه وي شوې؛ نو د نن ورځې له کابله خپرې شوې ویناوې باید کافي وي.
نوموړي د “ښې ورځې روانې دي” د شعار ملاتړو ته په اشاره ویلي، چې د طالبانو اصلي څېره نور له چا پټه نه ده.
دا په داسې حال کې ده، چې تېره ورځ د طالبانو حکومت د اسد ۲۴مه د لویې جرګې په خیمه کې ونمانځله، چې یو شمېر چارواکو یې له هېواد پر وتلو سیاسونو غږ وکړ، چې د پردیو په تمه نه شي.
د ازادۍ جبهې د طالبانو حکومت د واکمنۍ د څلورم کال په مناسبت ادعا کړې، چې په تېر یو کال کې یې ۲۲۵ طالب سرتېري وژلي او ۱۷۴ نور یې ټپیان کړي دي.
یادې جبهې ویلي، چې په دغه موده کې یې په ۱۳ ولایتونو کې ۸۸ بریدونه ترسره کړي، چې کابل، کندز، تخار، بغلان، بلخ، کاپیسا، هرات، فاریاب، پروان، پنجشیر، سرپل، لغمان او بادغیس پکې شامل دي.
د راپور له مخې، د طالبانو د امربالمعروف کارکوونکي هم په درې ولایتونو کې تر بریدونو لاندې راغلي، چې ۱۴ تنه یې وژل او ټپیان شوي دي.