افغاني غالۍ د ۲۰۲۶ کال د استانبول د نړۍوالو غالیو نندارتون کې د غوره ډيزاین لومړی مقام ترلاسه کړ.

د نندارتون په دې دوره کې له ۱۹ هېوادونو څخه غالۍ وړاندې شوې وې، چې افغاني غالۍ د خپل ځانګړي ډيزاین له امله لومړی مقام خپل کړی دی.

د کابل په یوې غونډه کې، د افغاني غالیو جوړونکو او صادروونکو ټولنې چارواکو ویلي، دا بریا د افغانستان ویاړ دی او د دې هېواد پخوانی فرهنګ یې په نړیوالو بازارونو کې مطرح کړی دی.

نوموړي ډاډ ورکړی چې حکومت او خصوصي سکټور به د صادراتو او د کاري زمینو د پراختیا لپاره خپلې هڅې جاري ساتي.

د بلوڅ ازادۍ غوښتونکي غورځنګ (BLA) د مجید بریګیډ څلورمه ځانمرګې بریدګره ښځه معرفي کړه.

بریدګره، حاتم ناز سومالني نومېږي او د کوډ نوم یې ګل بي بي دی.

۶۰ کلنه ګل بي بي د ۲۰۱۵ کال راهیسې د غورځنګ غړې ده، چې په ۲۰۱۶ کال کې ټپی شوه، وروسته د پاکستاني ځواکونو لخوا وتښتول شوه او څلور میاشتې په جبري توګه ورکه پاتې شوې وه.

نوموړې د ۲۰۲۳ په جنورۍ کې د پاکستاني پوځ په خلاف د فدایي کیدو پریکړه کړې.

بي ایل ای ویلي، د هغې کیسه د زغم، مقاومت او کلونو د زیانونو ډک ژوند ښيي، چې د یوې ښځې د هوډ او مبارزې مثال دی.

په قطر کې د طالبانو حکومت سفیر سهیل شاهین ویلي، د هند له لوري افغانستان ته د مالي مرستو زیاتوالی د دواړو هېوادونو ترمنځ د اړیکو د پیاوړتیا لپاره یو مهم سیاسي او اقتصادي پیغام لري.

نوموړي له هندي رسنۍ WION سره په خبرو کې ټینګار کړی چې دا پرېکړه ښيي، کابل او نوې ډیلي چمتو دي خپلې اړیکې له محدود تعامل څخه د پراخې همکارۍ پر لور وغځوي.

سهیل شاهین زیاته کړې چې اوسني بدلونونه کولای شي د دواړو لورو ترمنځ د اقتصادي، سوداګریزو او سیاسي همکاریو لپاره نوې دروازې پرانیزي.

هغه ویلي، افغانستان له هند سره تاریخي اړیکې لري او دا اړیکې یوازې د حکومتونو ترمنځ نه، بلکې د ولسونو په کچه هم ژورې او دوامدارې پاتې شوې دي.

نوموړي همداراز د افغانستان اقتصادي وضعیت ته په اشارې ویلي چې هېواد د بیا رغونې په بهیر کې دی او دې وضعیت د بهرنیو پانګوالو لپاره بې‌ساري فرصتونه رامنځته کړي دي.

شاهین هندي شرکتونو ته بلنه ورکړې چې په افغانستان کې پانګونه وکړي او ویلي، د سوداګرۍ او پانګونې پراخ ظرفیت شته چې دواړه هېوادونه ترې ګډه ګټه اخیستلی شي.

د هند حکومت د ۲۰۲۶ تر ۲۰۲۷ مالي کال په فدرالي بودجه کې د سیمې لپاره د مرستو تګلاره بدله کړې، چې له مخې یې بنګله‌دېش ته مالي مرسته ۵۰ سلنه راکمه شوې او پر ځای یې افغانستان او یو شمېر نورو هېوادونو ته بودجه لوړه شوې ده.

د هندي رسنیو د راپورونو له مخې، نوي ډیلي بنګله‌دېش ته خپله مرسته له ۱۲۰ کروړه څخه ۶۰ کروړه روپیو ته راټیټه کړې ده.

دا پرېکړه وروسته له هغې شوې چې په ۲۰۲۴ کال کې د پخوانۍ لومړۍ وزیرې شیخ حسینې له واکه لېرې کېدو وروسته، د ډاکې سیاسي دریځونه بدل شول او د پاکستان سره یې اړیکې پراخې کړې.

برعکس، هند افغانستان ته د پرمختیايي همکاریو لپاره ۱۵۰ کروړه روپۍ ځانګړې کړې دي.

همداراز، نیپال ته ۸۰۰ کروړه، سریلانکا ته ۴۰۰ کروړه او منګولیا ته ۲۵ کروړه روپۍ په بودجه کې شاملې شوې دي.

د ایران د وسله‌والو ځواکونو لوی درستیز عبدالرحیم موسوي، اعلان کړی چې د وروستۍ ۱۲ ورځنۍ جګړې او د امریکا او اسراییلو د پرله‌پسې خصمانه اقداماتو له امله، د هېواد پوځي تګلاره کې بنسټیز بدلون راغلی دی.

نوموړي ویلي، له دې وروسته به د ایران د وسله‌والو ځواکونو پوځي تګلاره یوازې دفاعي نه وي، بلکې د مخکښ برید پر بنسټ به چټک، قاطع او پراخ عملیات د هېواد د امنیت د تضمین لپاره ترسره کېږي.

د هغه په وینا، نوې تګلاره د دې لپاره طرحه شوې چې هر ډول احتمالي ګواښ ته سمدستي، سخت او اغېزمن ځواب ورکړل شي.

د بلوچستان په واشک ولسوالۍ کې د حکومتي ادارو پر تاسیساتو برید شوی دی.

چارواکي وایي، بریدګرو څو حکومتي ودانۍ وسوځولې او ګڼ رسمي موټرونه یې له ځانه سره وړي دي.

د راپورونو له مخې، د امنیتي ځواکونو او وسله‌والو ترمنځ د ډزو تبادله لا هم روانه ده.

تر اوسه ددې بریدونو د مرګ ژوبلې په اړه څه نه دي ویل شوي.

د اورشلیم پوسټ د راپور له مخې، د اسراییل د پوځ لوی درستیز، ال زمیر، واشنګټن ته پټ سفر کړی چې د امریکا د پوځ د ستاد مشر دن کین او د هغه د لوړپوړو سلاکارانو سره یې لیدلي.

د راپور له مخې، د اسراییل او امریکا ترمنځ یو درې اړخیز عملیاتي او ستراتیژیک کانال جوړ شوی، چې له درېیمې جګړې وروسته رامنځته شوی دی.

دا کانال د معلوماتو شریکولو، ګډ پلان جوړونې او احتمالي سناریوګانو د برابرولو لپاره کار کوي.

ویل کېږي چې دغه نوي همغږي د دواړو هېوادونو د پوځي او استخباراتي همکاریو په پراختیا کې مهم رول لري.

د قزاقستان ولسمشر قاسم‌جومارت توکایف به سبا پاکستان ته دوه ورځنی رسمي سفر پیل کړي.

په دې سفر کې به هغه د پاکستان له ولسمشر او لومړي وزیر سره وګوري او د پاکستان-قزاقستان سوداګریز فورم ته به وینا وکړي.

د پاکستان د بهرنیو چارو وزارت په وینا، د سفر موخه د دوه اړخیزو اړیکو بیاکتنه، د سوداګرۍ او ترانزیت د پراختیا لارې او د خلکو ترمنځ اړیکو پیاوړتیا ده.

د پاکستان ډان ورځپاڼې راپور ورکړی، چې له افغانستان سره د ډيورنډ کرښه د ۲۰۲۵ کال د اکتوبر له نیمایي راهیسې تړل شوې، چې له امله یې د الوګانو صادرات درېدلي او کورني بازارونه له اضافي محصول ډک شوي دي.

په تېرو کلونو کې د لوړو بیو له امله د پنجاب او خیبر پښتونخوا بزګرانو د الوګانو کرکېله پراخه کړې، چې یوازې په ۲۰۲۴–۲۰۲۵ کال کې تولید ۹.۴ مېلیون ټنو ته لوړ شوی.

د کرنې کارپوهان اټکل کوي چې د روان کال تولید به نږدې ۱۲ مېلیون ټنو ته ورسېږي؛ خو د صادراتو پراختیا کې جدي ګامونه نه دي اخیستل شوي.

اقتصادي شنونکي خبرداری ورکوي چې که حکومت د بزګرانو ملاتړ ونه کړي، د راتلونکو کلونو لپاره د الوګانو کرکېله به کمه شي.

تېره ورځ د بلوچستان په نوشکي سیمه کې د بلوڅ ازادي غوښتونکي غورځنګ لخوا د بریدونو پیل د یوې ځانمرګې بریدګرې، اصفه منګل له لورې وشو.

هغې د ای‌اېس‌ای پر مرکز د موټر بم په وسیله برید وکړ.

اصفه منګل د نوشکي د قاضي‌اباد اوسېدونکې وه او په ۲۰۲۳ کال کې چې ۲۱ کلنه وه، د BLA د مجید برګېډ له واحد سره یو ځای شوې وه.

د بلوچستان چارواکي وایي چې اوس وضعیت عادي شوی دی.

اصفه منګل د بلوڅ ازادۍ پوځ په ځانمرګو بریدونو کې تر ټولو پېژندل شوې ښځینه غړې ګڼل کېږي.

په بلوچستان کې د ازادي غوښتونکو بلوڅانو د وړمې ورځې په پراخو بریدونو کې د بلوچستان د اعلی وزیر سرفراز بګټي په وینا، ۳۱ ولسي وګړي، ۱۷ پاکستاني سرتېري او ۱۴۵ وسله‌وال وژل شوي دي.