د جاپان د بهرنیو چارو وزارت اعلان کړی چې دغه هېواد د افغانستان د ختیځ زلزله‌ځپلو سره د یو میلیون ډالرو مرسته کوي.

یاد وزارت په خپره شوې خبرپاڼه کې ویلي، چې سربېره پر دې، د “جاپان پلاتفورم” په نوم بنسټ هم څه باندې ۱.۳۳ میلیونه ډالر د زلزله‌ځپلو لپاره ځانګړي کړي دي.

د جاپان حکومت وایي، د دوی مرسته به د خوراکي توکو او روغتیایي خدمتونو په برخه کې د نړیوال خوراکي پروګرام (WFP) او د صلیب سرخ او هلال احمر نړیوال فدراسیون له لارې ولګول شي.

د دغو مرستو موخه د هغو کورنیو لاسنیوی دی چې د ختیځ زلزلو له امله زیانمنې شوې دي.

د طالبانو حکومت د بهرنیو چارو وزیر امیرخان متقي ویلي، «اسلامي امارت» د افغانستان پر یو انچ ځمکه هم د بهرني پوځ شتون نه مني او د خپلو جنګیالیو شل کلنې قربانۍ د بهرني حضور د منلو لپاره نه دي ورکړي.

که څه هم دا څرګندونې پخوانۍ دي؛ خو د ټرمپ له هغه خبرو وروسته تازه شوې چې ویلي یې دي له طالبانو سره د بګرام د بېرته ترلاسه کولو په اړه خبرې روانې دي.

ځینې راپورونه ښيي چې د طالبان حکومت د بګرام په بدل کې له امریکا د میاشتې یو میلیارد ډالر غواړي، خو امریکا یوازې ۳۰۰ میلیونه ډالر وړاندیز کړي دي.

د افغان سولې لپاره د امریکا پخواني ځانګړي استازي زلمي خلیل‌زاد ویلي، که د امریکا او طالبانو ترمنځ د بندیانو ستونزه حل شي، ښايي دواړه لوري د بګرام هوايي اډې پر سر هوکړې ته ورسېږي.

نوموړي بګرام د ترهګرۍ ضد مبارزې لپاره مهمه اډه بللې ده.

ولسمشر ټرمپ هم ویلي چې له طالبانو سره د بګرام د بېرته ترلاسه کولو په اړه خبرې روانې دي؛ خو د طالبانو حکومت د امریکا پوځي حضور په افغانستان کې نه مني.

ویل کېږي چې د بندیانو په چارو کې د ټرمپ ځانګړی استازی ادم بولر د دې خبرو مشري کوي؛ خو د طالبانو حکومت د لوړو غوښتنو له امله خبرې بندې شوي دي.

د طالبانو حکومت تر اوسه په ښکاره د دغو خبرو پخلی نه دی کړی.

د پاکستان د بهرنیو چارو وزارت ویاند، شفقت علي خان، وایي چې په افغانستان کې د ترهګرو پټنځایونه د طالبانو او اسلام‌اباد ترمنځ د اړیکو ښه‌والي اصلي خنډ دی.

نوموړي په یوه تازه خبري ناسته کې ویلي: «افغانستان زموږ نږدې ګاونډی دی او موږ له دوی سره د ورورولۍ اړیکې غواړو، خو اصلي خنډ دا دی چې هلته د ترهګرو پټنځایونه شته.»

شفقت علي خان د پاکستان د لومړي وزیر شهباز شریف وروستیو څرګندونو ته په اشارې ویلي چې “طالبان باید یا پاکستان غوره کړي یا تحریک طالبان پاکستان.”

نوموړي زیاته کړې: «د لومړي وزیر پیغام ډېر واضح دی، زه پرې نور څه نه لرم چې ووایم.»

دی وایي، دا پیغام که څه هم یو سیاسي دریځ دید خو د ډیپلوماتیکو لارو له لارې د طالبانو حکومت ته رسول شوی.

د سوریې د موقت حکومت مشر احمد الشرع ویلي چې له اسراییل سره د امریکا په منځګړتوب د امنیتي تړون خبرې وروستیو پړاوونو ته رسېدلي دي.

هغه ویلي، ممکن دا تړون په نږدې ورځو کې لاسلیک شي او د ۱۹۷۴ کال تړون ته ورته وي.

نوموړي ټینګار کړی چې دا چاره “هیڅکله” د اسراییل سره د اړیکو عادي کېدل نه دي.

د طالبانو حکومت ویاند ذبیح‌الله مجاهد ویلي چې د پاکستان د لوړپوړو چارواکو وروستۍ څرګندونې د کابل او اسلام‌اباد د اعتماد جوړونې بهیر زیانمنوي.

مجاهد ټینګار کړی چې د ټي‌ټي‌پي او پاکستان د پوځ جګړه نوې موضوع نه ده، له ۲۰۰۳ کال راهیسې روانه ده او دا د پاکستان داخلي ستونزه ده؛ نو باید د دواړو هېوادونو اړیکو ته زیان ونه رسوي.

بل لورته د پاکستان د بهرنیو چارو وزارت ویاند شفقت علي خان بیا ویلي، د افغانستان دننه د وسله‌والو پناه‌ځایونه د دواړو هېوادونو د اړیکو اصلي خنډ دی او د دې موضوع په اړه سیاسي پیغام د ډیپلوماټیکو لارو طالبانو ته رسېدلی دی.

دا څرګندونې وروسته له هغه شوي چې د پاکستان لومړي وزیر شهباز شریف له طالبانو غوښتي و، یا دې له اسلام‌اباد سره ودرېږي او یا له تحریک طالبان پاکستان یا ټي‌ټي‌پي سره.

د امریکا د تروریزم ضد ملي مرکز د القاعده د ګواښونو په اړه خبرداری ورکړی او له خلکو یې غوښتي چې هوښیار واوسي.

دغه مرکز ویلي، القاعده په ځانګړي ډول په هغو هېوادونو کې ګواښ پېښوي چې امریکا په کې پوځي حضور لري.

چارواکو ته سپارښتنه شوې چې د سفر جزییات او مهال‌وېش عام نه کړي او د پېژند نښو له وړلو ډډه وکړي.

دې خبرداري کې د ورزشي او موسیقيزو غونډو په څېر د ګڼې ګوڼې ځایونه هم د احتمالي هدفونو په توګه یاد شوي دي.

د هند د بهرنیو چارو وزارت خپلو وګړو ته خبرداری ورکړی چې د جعلي دندو اعلانونو څخه ځان وساتي.

دغه وزارت ویلي، په وروستیو کې یو شمېر هندي وګړي د کار موندلو په پلمه ایران ته تللي، خو هلته د جنایتکارو بانډونو له خوا تښتول شوي او د کورنیو څخه یې د باج غوښتنه شوې ده.

وزارت زیاتوي، بې ویزې سفر یوازې د ګرځندوی لپاره اجازه لري.

پاکستان کې د طالبانو حکومت پخواني سفیر ملا عبدالسلام ضعیف د امریکا د ولسمشر ډونالډ ټرمپ دریځ “غلط” بللی او ټینګار یې کړی چې افغانستان د بهرني پوځي حضور منلو ته هیڅکله اماده نه دی.

ضعیف ویلي، د افغانستان تاریخ ښيي چې هر ځل هېواد د ناپېلتوب له کرښې یو اړخیز شوی، له تاوان او ویجاړۍ سره مخ شوی دی؛ نو هېڅ واکمن نشي کولای له بهرنیو سره د نظامي حضور معامله وکړي.

نوموړي د احتمالي نړیوالو بدلونونو په اړه خبرداری ورکړی او ویلي یې دي چې کېدای شي تر ۲۰۳۵ کال پورې یو ستر نړیوال جنګ رامنځته شي.

د ده په باور، امریکا به هڅه وکړي چې د خلیج له اوبو او ځمکو ګټه واخلي او همدارنګه په پاکستان، افغانستان او اذربایجان کې د حضور زمینه برابره کړي، څو سیمه د چین، روسیې او ایران تر پوښښ لاندې راولي؛ خو د افغانستان په اړه یې دا هڅه بې ځایه او بې پایلې ده.

ضعیف زیاته کړې چې افغانستان د لومړۍ او دویمې نړیوالې جګړې پر مهال ناپېلی پاتې شوی او په احتمالي درېیم نړیوال جنګ کې به هم خپل ناپېلتوب وساتي.

د پرتګال د بهرنیو چارو وزارت اعلان کړی چې سبا به فلسطین د یوه خپلواک دولت په توګه په رسمیت وپېژني.

تر دې وړاندې پرتګال د اروپایي ټولنې له غړو سره د ګډ دریځ لپاره محتاط پاتې شوی و.

دا پرېکړه په داسې حال کې کېږي چې د غزې جګړه د اسراییل پر ضد د نړۍوال مخالفت لامل شوې ده.