د امریکا ولسمشر ډونالډ ټرمپ ویلي، د ایران د اتومي تاسیساتو ارمانونه یې په یو بمبار کې له منځه وړي.
هغه د کورنراستون ښوونیز مرکز ته وینا کې وویل، د امریکا بی–۲ جنګي الوتکو د ایران پر ضد په عملیاتو کې ۳۷ ساعته الوتنه وکړه.
ټرمپ دا عملیات واقعاً حیرانوونکي وبلل او ادعا یې وکړه چې د امریکايي الوتکو ټول بمونه په نښه شويو ځایونو باندې ولګېدل.
د بریتانیا لومړی وزیر کیر ستارمر، نن یکشنبه ماښام فلسطین د یو رسمي دولت په توګه پېژني.
دا اقدام وروسته له هغې کېږي چې نوموړي تېره جولای ویلي و، که اسرائیل له غزې سره اوربند او د ستونزې د حل لپاره خپلواک دولتونه جوړ نه شي؛ نو دوی به فلسطین په رسمیت وپېژني.
بيبيسي دا پرېکړه د بریتانیا د بهرني سیاست لوی بدلون بللی؛ خو دا پرېکړه د اسرائیلي حکومت، د برمته شویو کسانو کورنیو او یو شمېر محافظهکارانو له سخت غبرګون سره مخ شوې ده.
حماسه میډیا ته یوې باوري سرچیني ویلي، چې د طالبانو حکومت د مخابراتو وزیر حمدالله نعماني استعفا ورکړې.
د سرچیني په خبره، حمدالله نعماني د نوري فایبر د انټرنېټ د بندیدو په مسله کې د طالبانو مشر ته خپله استعفاء وړاندې کړې او له تیرې اونۍ دندې ته نه دی ستون شوی.
دا په داسې حال کې ده چې د طالبانو حکومت د شیخ هبتالله په امر د هېواد په یو شمېر ولایتونو کې د نوري فایبر انټرنېټ قطعه کړ او ویل کېږي چې دا چاره به ټولو ولایتونو کې ترسره شي.
د طالبانو حکومت د کورنیو چارو وزارت ویاند عبدالمتین قانع د بګرام هوايي اډې په اړه د امریکايي ولسمشر ډونالډ ټرمپ وروستۍ څرګندونې رد کړې او هغه یې له حقایقو لرې او له کرکې ډکې بللې دي.
قانع ټیلیګراف ورځپاڼې ته ویلي، «اسلامي امارت» به بګرام هېڅکله او هېچاته ورنه کړي.
دا څرګندونې په داسې حال کې کېږي چې ټرمپ خبرداری ورکړی که بګرام ورنکړل شي، بدې پېښې به رامنځته شي؛ خو هغه نور وضاحت نه دی ورکړی.
قانع ټینګار کړی چې د «اسلامي امارت» تعامل له ټولو هېوادونو سره متوازن دی او له هېچا سره د جګړې اراده نه لري.
د بلخ پخوانی والي عطامحمد نور وايي، د بګرام اډې ورکول پر خاوره او ناموس د معاملې په معنی دی او هیڅوک حق نه لري، چې افغانستان د بهرنیو ځواکونو لاس ته ور وسپاري.
نور زیاته کړې، که امریکا له خپلو لاسپوڅو مایوسه شوې وي، باید پوه شي چې افغانستان د هغوی حضور ته اړتیا نه لري.
نوموړي د طالبانو حکومت ته هم اشاره کړې او ویلي یې دي، سره له ټولو نیمګړتیاوو، هغوی لږ تر لږه د خاورې پلورونکي نه دي.
د طالبانو حکومت که څه هم تازه څه نه دي ویلي، خو تر دې وړاندې یې ویلي، چې یوه لوېشت خاوره به هم چاته ورنکړي.
د طالبانو حکومت د سترې محکمې رییس او قاضيالقضات عبدالحکیم حقاني وايي، د دوی بریا د یووالي له امله ده او په همدې سبب په هېواد کې بېساری نظام او امنیت رامنځته شوی دی.
نوموړي دا څرګندونې د سترې محکمې د نوي اداري مرستیال سخاءالله سعید د معرفت غونډه کې وکړې.
هغه د طالبانو حکومت د مشر شیخ هبتالله اخوندزاده اطاعت د الله رضا وبلله.
یاده غونډه کې سخاءالله سعید ویلي، د طالبانو د مشر هر حکم د اصلاح لپاره دی او اطاعت یې پر ځان واجب ګڼي.
نوموړي زیاته کړې، حتی که له دندې لرې شي، خوښ به وي، ځکه شخصي مقام ورته ارزښت نه لري، بلکې هدف یې د اسلامي نظام بقاء ده.
واشنګټن پوسټ په یوه مقاله کې لیکلي چې بګرام ته د امریکا بېرته ستنېدل بده مفکوره نه ده او کولی شي د داعش پر وړاندې د عملیاتو او د چین ترڅنګ د واشنګټن د ستراتیژیک حضور لپاره زمینه برابره کړي.
ورځپاڼې ویلي، د یوې کوچنۍ امریکايي ډلې ستنېدل به د پخواني پراخ حضور په څېر نه وي؛ خو امریکا ته به بیا هم په سیمه کې نفوذ ورکړي.
مقاله زیاتوي چې طالبان د بګرام په بدل کې غوښتنې لري؛ لکه د حکومت رسميت پېژندنه، د ملګرو ملتونو څوکۍ او د کنګل شویو شتمنیو لاسرسی.
واشنګټن پوسټ ټینګار کړی، د طالبانو له واکمنۍ څلور کاله وروسته لا هم نړیوال فشارونه هغوی ته د شاتګ لاره نه ده پرانیستې؛ نو امریکا باید په کابل کې خپل اغېز بېرته پیاوړی کړي.
دا بحث وروسته له هغه تود شوی چې ډونالډ ټرمپ د بګرام د بېرته اخیستو خبره وکړه او د طالبانو حکومت ته یې خبرداری ورکړ چې که اډه امریکا ته ونه سپاري، بدې پایلې به ولري.
د امریکا ولسمشر ډونالډ ټرمپ ویلي، که بګرام هوايي اډه بېرته امریکا ته ونه سپارل شي؛ نو ډېرې بدې پایلې به ولري.
هغه په ټروت سوشیال کې لیکلي:«که افغانستان بګرام هغه هېواد ته ورنه کړي چې جوړ کړی یې دی، متحده ایالاتو ته، نو ډېر بد کارونه به پېښ شي.»
د طالبانو حکومت د هغه د څرګندونو په اړه تر اوسه څه نه دي ویلي.
یو شمېر سرچینو رسنیو ته ویلي، چې د طالبانو حکومت د اوبو او برېښنا وزارت مشاور فاروق اعظم د نجونو د زده کړو په تړاو د خبرو له امله نیولی او ترې غواړي چې د خپلو څرګندونو په بدل کې د طالبانو حکومت له مشر شیخ هبتالله اخندزاده بښنه وغواړي.
دغو سرچینو ویلي، فاروق اعظم د طالبانو حکومت غوښتنه رد کړې او ټینګار یې کړی چې د نجونو د تعلیم ملاتړ کوي او که زندان هم وي، د نظر څخه نه ګرځي.
نوموړي په یوه لیک کې هم خپلې کورنۍ ته ویلي چې د ښځو د تعلیم او عصري زده کړو په ملاتړ او د طالبانو پر ځینو پالیسیو د نیوکو له امله نیول شوی دی.
د طالبانو حکومت د اوبو او برېښنا وزارت هم منلې چې د هغه نیونه د «امیرالمومنین» په امر شوې او قضیه یې نظامي محکمې ته سپارل شوې ده.
د طالبانو حکومت د استخباراتو مرستیال تاجمیر جواد ویلي چې که اړتیا وي د خپل نظام د ساتنې لپاره به بیا ځانمرګي بریدونه پیل کړي.
نوموړي دا خبرې د پکتیا ولایت د سیدکرم ولسوالۍ کې د «۲۰ کلن جهاد قربانیانو» د یاد غونډې پر مهال کړي.
جواد ټینګار کړی چې د «اسلامي امارت» نظام د شهیدانو په وینو جوړ شوی او د ساتنې لپاره یې هر ډول قربانۍ ته تیار دي.
هغه د طالبانو د مخالفانو پر ضد د ځانمرګو بریدونو ګواښ هم کړی.
تاجمیر جواد د حقاني شبکې مهم غړی بلل کېږي او پخوا د خونړیو بریدونو طراح ګڼل شوی دی.