د امریکا ولسمشر ډونالډ ټرمپ د دوشنبې په ورځ یو نوی فرمان لاسلیک کړی چې له مخې به یې متحده ایالات د قطر د امنیت ملاتړ کوي.
په دغه فرمان کې ټینګار شوی چې هر ډول وسلهوال برید پر قطر، د هغه پر خاورې، حاکمیت یا بنسټیزو تاسیساتو، د امریکا د سولې او امنیت لپاره جدي ګواښ ګڼل کېږي.
دا پرېکړه په داسې وخت کې شوې چې د اسراییلو لومړي وزیر بنیامین نتنیاهو د واشنګټن د سفر پر مهال د قطر له لومړي وزیر سره په ټیلیفوني خبرو کې د تېرې میاشتې د اسراییل د بریدونو له امله بښنه غوښتې ده.
د کابل پخواني والي احمدالله علیزي ویلي، چې نن یې په اسلاماباد کې د جمعیت علما اسلام ګوند له مشر مولانا فضلالرحمن سره مهمه لیدنه کړې ده.
د علیزي په وینا، په دې لیدنه کې د افغانستان او پاکستان د اړیکو، سیمهییز ثبات او متقابل تفاهم په اړه مفصلې خبرې شوې دي.
هغه زیاته کړې، چې دواړو لوریو د سولې او همکارۍ د پیاوړتیا لپاره پر ګډو هڅو هوکړه کړې ده.
یو شمېر سرچینو رسنیو ته ویلي، چې په افغانستان کې د انټرنېټ خدمتونه د طالبانو حکومت د رییس الوزرا ملا محمد حسن اخوند په امر بېرته فعال شول.
سرچینو زیاته کړې چې د انټرنېټ بندېدو پرېکړه هم د طالبانو حکومت د مشر شیخ هبتالله اخوندزاده شخصي امر و.
سرچینې وایي، چې ملا محمد حسن اخند په تېرو درې ورځو کې د انټرنېټ د بندېدو پر سر څو غونډې ترسره کړې دي.
د سرچینې په وینا، د کابینې ګڼ غړي د دې موضوع د حل لپاره کندهار ته تللي څو شیخ هبت الله اخندزاده قانع کړي.
د یادونې ده چې له درې ورځو بندیز وروسته نن انټرنېټ بیرته فعال شو.
د بلوچستان د کوټې ښار په یوه امنیتي سیمه کې د سرحدي ځواکونو تاسیساتو ته څېرمه چاودنه رامنځته شوې چې په پایله کې یې د درېیو سرحدي سرتېرو په ګډون نهه کسان وژل شوي دي.
د بلوچستان د عامې روغتیا د وزیر په وینا، په پېښه کې ۳۲ تنه نور ټپیان شوي دي.
چارواکي وایي د چاودنې د نوعیت او د برید د عاملینو په اړه څېړنې روانې دي.
یو شمېر سرچینو رسنیو ته ویلي، چې د طالبانو حکومت د اوبو او انرژۍ وزارت سلاکار، فاروق اعظم له نظارتخانې د کابل پوځي محکمې ته انتقال کړی دی.
د سرچینو په وینا، ځینو طالب وزیرانو فاروق اعظم ته ویلي چې د ده د نیولو امر د شیخ هبتالله له لوري شوی او دوی د خوشې کولو صلاحیت نه لري.
هغوی ویلي چې یوازینۍ لاره یې له شیخ هبتالله څخه بښنه غوښتل دي؛ خو فاروق اعظم د بښنې غوښتلو څخه ډډه کړې ده.
د طالبانو حکومت د هغه د کورنۍ دریو غړو ته اجازه ورکړې چې هره ورځ ورسره وویني او دارو درمل او خوراکي توکي ورته یوسي.
فاروق اعظم مخکې په یوه لیک کې خپل زوی ته ویلي و چې د نجونو د زدهکړو او عصري تعلیم د ملاتړ او د طالبانو د ځینو پالیسیو د انتقاد له امله نیول شوی او د هر ډول سخت چلند منلو ته تیار دی.
ځايي سرچینو ویلي، د طالبانو حکومت د مخابراتو د تنظیم ادارې (اترا) د مشر په امر د کابل په ګډون په ټول هېواد کې د نوري فایبر انټرنېټ قطع شوی او د فورجي پر ځای یوازې د دوهجي خدمتونه وړاندې کېږي.
ځايي رسنۍ اندېښنه ښيي چې دا پرېکړه به د ټلوېزیوني او راډیويي خپرونو تر څنګ ډیجیټل رسنیو ته هم جدي ستونزې جوړې کړي.
د راپورونو له مخې، په ډېری سیمو کې نه یوازې فایبر، بلکې عادي انټرنېټي خدمتونه هم پرې شوي او د واټساپ او ورته نورو شبکو اړیکې بندې شوې دي.
سرچینو رسنیو ته ویلي، چې نن ماښام د افغانستان په کچه د نوري فایبر او مخابراتي شبکو انټرنېټ خدمتونه درېدلي دي.
سرچینو زیاته کړې، چې د انټرنېټ د پرې کېدو له امله د خلکو ترڅنګ ګڼې ادارې، ټلویزیوني او راډیویي رسنۍ له ستونزو سره مخ شوي دي.
په ورته وخت کې له کابل څخه په تازه رپوټونو کې ویل شوي چې د نوري فایبر ترڅنګ مخابراتي شبکې هم تړل شوي دي.
د طالبانو حکومت د عدليې وزارت وايي، واک ته د «اسلامي امارت» له رسېدو راهیسې تر دې دمه ۲۲ تقنیني اسناد د رسمي جریدې له لارې خپاره شوي دي.
یاد وزارت زیاتوي، چې په دغو اسنادو کې ۱۵ قوانين، ۶ مقررات او یوه اساسنامه شامله ده، چې د اړوندو ادارو له لوري چمتو، د عدليې وزارت له خوا قانوني ارزونه پرې شوې او وروسته د صلاحیت لرونکې کمېسیون تر تایید او د شیخ هبتالله تر توشیح وروسته نافذ شوي دي.
د تازه خپرو شویو مهمو قوانینو له ډلې څخه، د مالي حساب ورکونې قانون، د دولتي قراردادونو قانون، د ځمکو د غصب د مخنیوي او بېرته راګرځولو قانون، د امربالمعروف او نهی عن المنکر قانون، د شعري سیالیو د تنظیم قانون، د صرافانو او مالي خدماتو قانون، د صنعتي زونونو قانون او د دولتي ځمکو د اجارې قانون یاد شوي دي.
یاد وزارت همداراز وايي، چې په تېرو څلورو کلونو کې یې ۱۳۳ فرمانونه، حکمونه او لارښوونې هم د شیخ هبتالله له لوري ترلاسه او د رسمي جریدې له لارې خپاره کړي دي.
د اروپايي ټولنې چارواکو تأیید کړې چې دغه ټولنې پر ایران هغه بندیزونه بېرته فعال کړي چې څو ورځې وړاندې د ملګرو ملتونو امنیت شورا هم فعال کړي وو.
د بندیزونو له مخې، د ایران د مرکزي بانک او ځینو مالي بنسټونو شتمنۍ کنګل شوې، پر یو شمېر چارواکو د سفر بندیز لګول شوی او د ایران د تېلو، سرو زرو او ځینو سمندري وسایلو پر پلور او لېږد محدودیتونه وضع شوي دي.
اروپايي ټولنې ټینګار کړی چې علت یې د ایران له اټومي تړون څخه سرغړونه ده؛ خو زیاته کړې چې د ډیپلوماټیکو خبرو اترو دروازه لا هم پرانیستې ده.
ایران دغه تورونه رد کړي او وایي د اټومي وسلو د جوړولو نیت نه لري.
د رویټرز د راپور له مخې، د امریکا ولسمشر ډونالد ټرمپ او د اسراییلو لومړی وزیر بنیامین نتانیاهو د سپټمبر پر ۲۹مه په سپینه ماڼۍ کې سره ویني.
ټرمپ ویلي، د غزې جګړې د پای ته رسولو ۲۱ مادهیز پلان یې نهایي شوی او هیله لري د نتانیاهو ملاتړ ترلاسه کړي.
نوموړي زیاته کړې، منځنی ختیځ د یوې مهمې پېښې په درشل کې دی.
کارپوهان وایي، اسراییل د غزې جګړې د دویم تلین په درشل کې له زیاتېدونکي نړیوالې انزوا سره مخ دي.