د مصالحې شورا پخواني مشر ډاکتر عبدالله عبدالله د افغانستان په شمالي ولایتونو کې د وروستۍ زلزلې له امله د زیانمنو شویو کورنیو سره خپله ژوره خواخوږي څرګنده کړې ده.
ډاکټر عبدالله ویلي:«موږ ځان د شهیدانو له کورنیو سره په غم کې شریک بولو او د ټپیانو د عاجلې روغتیا هیله کوو.»
هغه له مرستندویو بنسټونو، ملي سوداګرو او شتمنو هېوادوالو غوښتي چې ژر تر ژره د زلزلهځپلو د مرستې لپاره عملي ګامونه واخلي او د خپلو هېوادوالو د ژوند د ژغورلو او ملاتړ په برخه کې خپل انساني مسؤولیت ادا کړي.
د ایران د بهرنیو چارو وزارت ویاند اسماعیل بقایي وايي، تهران د اوبو په اړه د طالبان حکومت له چلنده راضي نه دی او چارواکو یې د هلمند د اوبو تړون د عملي کولو غوښتنه کړې.
نوموړي په تهران کې د خبري ناستې پر مهال وویل چې د هریرود د حقابې لیکلې هوکړه نهشته؛ خو د نړیوالو قوانینو له مخې برلاس هېواد د پوره تعهداتو مسوولیت لري.
بقایي زیاته کړې چې سلما بند تازه اوبه خوشې کړي او هیله یې څرګنده کړه چې دا کار د «دوستۍ بند» لامل شي.
د ده په وینا، د ایران د بهرنیو چارو وزارت د مرستیال غریب ابادي وروستي سفر کې د اوبو موضوع د بحث مهمه برخه وه.
پخواني ولسمشر حامد کرزي د بلخ، سمنګان او د هېواد د نورو ولایاتو د وروستۍ زلزلې د قربانیانو له کورنیو سره خپله ژوره خواخوږي او غمشریکي څرګنده کړې ده.
کرزي په خپره شوې اعلامیه کې ویلي، چې د زلزلې له امله رامنځته شوي ځاني او مالي زیانونو ژور خواشیني کړی، او د زیانمنو کورنیو ته یې د تسلیت مراتب وړاندې کړي.
هغه له ملي سوداګرو او مرستندویو بنسټونو، همدارنګه له نړیوالو ادارو وغوښتل، چې له زیانمنو کورنیو سره د بیړنیو مرستو په برابرولو کې فعاله ونډه واخلي.
د پاکستان لومړي وزیر شهباز شریف د افغانستان شمال کې د مرګونې زلزلې له امله ژوره خواخوږي څرګنده کړې ده.
نوموړي په خپل ایکس پیغام کې ویلي، چې د افغانستان له خلکو سره د دې غمیزې پر مهال د پاکستان ولس او حکومت په بشپړ ډول خواخوږي څرګندوي.
شریف، د زلزلهځپلو کورنیو سره د تسلیت او دعا ترڅنګ، د ټپیانو د ژر تر ژره روغکېدو هیله څرګنده کړې او ویلي یې دي چې پاکستان د افغانانو سره په هر غم کې شریک دی.
د یادونې وړ ده چې تېره شپه بلخ او بغلان ولایتونو او شاوخوا سیمو کې زورور زلزله شوې، چې تر دې مهاله ۲۰ تنه مړه شوي او شا او خوا ۵۳۰ تنه ټپيان ثبت شوي.
د نیویارک پوسټ مجلې د راپور له مخې، آلیا روزا، د روسیې پخوانۍ جاسوسې، ویلي چې روسي او چينایي استخباراتي اجنټان د جعلي مینې، اړیکو او احساساتي فریبونو په وسیله هڅه کوي د امریکایي ټکنالوژۍ شرکتونو رازونه ترلاسه کړي.
روزا چې اوس په امریکا کې ده، وايي دغو اجنټانو ته روزنه ورکول کېږي چې د قرباني باور تر لاسه کړي، جنسي اړیکه ورسره ونیسي او وروسته یې د احساساتو له لارې محرم معلوماتو ته اړ کړي.
هغې خبرداری ورکړی چې د ټکنالوژۍ شرکتونو کارکوونکي، په ځانګړي ډول مجرد او احساساتي کسان، د دې عملیاتو تر ټولو مهم هدفونه دي.
د ملګرو ملتونو د بشري مرستو د همغږۍ اداره (اوچا) په یوه خبرپاڼه کې ویلي، چې د افغانستان په شمال کې د زلزلهځپلو سیمو د ژغورنې او بیړنیو مرستو عملیات یې پیل کړي دي.
په خبرپاڼه کې راغلي، چې دې ادارې له ګڼو بشري بنسټونو سره په همغږۍ، د مرستندویو ټیمونو د اعزام بهیر پیل کړی دی ترڅو زیانمنو کورنیو ته بیړنۍ مرستې ورسوي.
اوچا خبرداری ورکړی چې د تېرې شپې زلزلې له امله د تلفاتو شمېر ښایي نور هم لوړ شي، ځکه د ځینو سیمو له بشپړ وضعیت لا هم کره معلومات نهدي ترلاسه شوي.
په کابل کې د جاپان سفیر کنییچي ماساموتو د هېواد په شمالي ولایتونو کې د تېرې شپې د زلزلې له امله ژوره خواشیني څرګنده کړې ده.
د جاپان سفارت د سفیر له قوله وايي چې د مړو لپاره دعا کوي او کورنیو ته یې تسلیت وړاندې کوي.
سفارت وایي جاپان له زیانمنو سره د مرستې لپاره چمتو دی.
همدارنګه په کابل کې د ایران سفارت هم د شمال د مرګونې زلزلې د اغېزمنو کورنیو سره خواخوږي څرګنده کړې او ویلي یې دي چې ایران په دې سختو شرایطو کې د افغانانو تر څنګ ولاړ دی او له ارزونو وروسته به اړینې مرستې وړاندې کړي.
د بدخشان د طالبانو د شهر بزرګ ولسوال عبدالرشید رشاد وایي چې د تېرې شپې زلزلې په چوګاني کلي کې نږدې ۸۰۰ کورونه په بشپړ ډول وران کړي.
رشاد زیاتوي چې د سیمې اوسېدونکي له درنو ستونزو سره مخ دي او بیړنیو خوړو، سرپناه او درملو ته جدي اړتیا لري.
د یادونې ده چې د تېرې شپې زلزلې په بلخ، سمنګان او بغلان کې هم مالي او ځاني زیانونه رامنځته کړي دي.
د طالبانو حکومت د برښنا شرکت وايي، د تېرې شپې زلزلې د ازبکستان وارداتي برېښنا مزیو ته سخت زیان اړولی دی.
د یاد شرکت په وینا، د نایباباد – سمنګان او خُلم–پلخمري ترمنځ د برېښنا لینونه پرې شوي او له امله یې کابل، بغلان، پروان، پنجشیر، کاپیسا، لوګر، پکتیا، غزني او میدانوردک ولایتونه له وارداتي برښنا بېبرخې شوي دي.
یاد شرکت ویلي، د زلزلې له رامنځته کېدو وروسته د بیړنیو هڅو سره سره د لینونو د بېرته نښلولو لومړنۍ هڅې پایله نهده ورکړې؛ خو تخنیکي ټیمونه اوس هم د زیانمنو شویو برخو د ارزونې او د برښنا د بېرته وصلولو په هڅه کې دي.
د یادې اعلامیې له مخې، د تاجکستان وارداتي برېښنا لین هم تر کندزه پرې شوی دی، چې د برښنا رسونې وضعیت یې نور هم له ننګونو سره مخ کړی دی.
د طالبانو حکومت ویاند، ذبیحالله مجاهد، ویلي چې بیګانۍ زلزلې په بلخ، سمنګانو او بغلان ولایتونو کې ځاني او مالي زیانونه اړولي چې دوی پرې د ژورې خواشینۍ څرګندونه کړې.
نوموړي د شهیدانو لپاره د جنت الفردوس، د ټپیانو لپاره د بېړنۍ روغتیا او د کورنیو لپاره د جمیل صبر دعا کړې ده.
مجاهد زیاتوي چې د «اسلامي امارت» اړوند ټول مسؤلین او ادارې په کار بوختې دي، څو د خلکو مرستې او د هغوی اړتیاوې په خپل وخت ور ورسوي.