د اوکراین ولسمشر ولادیمیر زلنسکي وايي هېواد به یې سږکال په برلین او کپنهاګ کې د وسلو د صادراتو او ګډې تولیدي همکارۍ لپاره دفترونه پرانیزي.

د هغه په وینا، اوکراین د لویدیځ متحدانو په ملاتړ د دفاعي صنعت پراختیا چټکوي، څو د روسیې د یرغل پر ضد جګړه کې خپل امکانات پیاوړي کړي.

زلنسکي ویلي چې اوکراین به د سمندري ډرونونو او توپچي سیستمونو په ګډون ځینې وسلې صادرولی شي، څو د کورني تولید لپاره مالي سرچینې زیاتې کړي.

هغه زیاته کړې چې هېواد یې لا هم د جنګي الوتکو او هوايي دفاعي سیستمونو په برخه کې په متحدانو تکیه لري؛ خو د ډرونونو او توغندیو په جوړولو کې پرمختګ شوی.

اوکراین پلان لري چې د «فلامینګو» او «روتا» په نوم کورني توغندي د روان کال تر پایه په پراخه کچه تولید کړي.

الجزیرې راپور ورکړی چې اسرائيلو د اوربند له تړون سره سم پنځه نامعلوم فلسطیني بندیان خوشې کړي دي.

دوی د دوشنبې په شپه ازاد شول او د طبي معاينې لپاره د غزې دیرالبلح ښار الاقصی روغتون ته ولېږدول شول، چېرې چې کورنۍ یې د لیدلو لپاره راټولې شوې وې.

په عین حال کې، د غزې د روغتیا وزارت ویلي چې د سره صلیب له لارې یې د اسرائيلو لخوا د ۴۵ نورو فلسطینیانو جسدونه ترلاسه کړي، چې له دې سره د بېرته سپارل شويو جسدونو شمېر ۲۷۰ ته رسېدلی.

تر دې دمه ۷۸ جسدونه پېژندل شوي دي او ځايي چارواکي وايي ډېری جسدونه د شکنجې نښې لري.

الجزیره زیاتوي چې سره له اوربند، اسرائيلي پوځ په غزه کې حملې روانې ساتلي او د دوشنبې په ورځ د شمالي رفح په سیمه کې درې فلسطینیان د اسرائيلي پوځ په ډزو وژل شوي دي.

د غزې د حکومت د رسنیو دفتر وايي اسرائيلو تر اوسه ۱۲۵ ځله اوربند مات کړی، او اسرائيل بیا حماس پر اوربند د سرغړونې تور لګوي.

د خیبر پښتونخوا د کورنیو او قبایلي چارو وزارت اعلان کړی چې د تورخم دروازه به نن څلورمه پرله‌پسې ورځ هم یوازې د هغو افغانانو لپاره خلاصه وي چې پاکستان پرېږدي او بېرته خپل هېواد ته ستنېږي.

د وزارت په وینا، تېر ماښام شاوخوا ۴۸۰۰ افغان کډوال د تورخم له لارې افغانستان ته ستانه شوي دي.

له دې سره، د تورخم په پوله لا هم سلګونه افغان کورنۍ د ستنېدو په تمه ناستې دي او د سختو شرایطو، بې‌سرپناهۍ او د خوړو له کمښت سره مخ دي.

د آلمان صدراعظم فریدریش مرتس اعلان کړی چې هېواد به یې د هغو سوریایي پناه اخیستونکو د اخراج بهیر چټک کړي چې جرمونه یې کړي دي.

نوموړي ویلي، حکومت یې د دې پلان عملي کولو ته ژمن دی او دا پالیسي به په مشخص ډول پر مخ یوسي.

مرتس، چې د سوریې موقتي ولسمشر احمد الشرع ته د برلین د سفر بلنه ورکړې، ټینګار کړی چې د سوریې جګړه پای ته رسېدلې او نور د پناه اخیستنې لپاره دلیلونه ختم شوي.

د ده په وینا، آلمان غواړي د سوریې د ثبات په بهیر کې رول ولوبوي.

د راپورونو له مخې، د سوریې ولسمشر به روانه میاشت واشنګټن ته سفر وکړي.

د پاکستان د پوځ ویاند احمد شریف چوهدري وايي چې د طالبانو له لوري د امنیتي همکاریو لپاره وړاندې شوي شرطونه هېڅ اهمیت نه لري او اسلام‌اباد یوازې د ترهګرۍ پر له‌منځه وړلو تمرکز کوي.

هغه د طالبانو حکومت ته خبرداری ورکړی چې باید د ټي‌ټي‌پي او نورو ډلو فعالیتونه مهار کړي او هغه بریدګر چې افغانستان ته تښتېدلي پاکستان ته وسپاري.

چوهدري ادعا کړې چې د طالبانو حکومت ځینې کسان د پاکستان پر ضد بریدونو کې ښکېل دي او د نشه‌يي توکو کارونو له لارې وسله‌والو ته لوی عاید ترلاسه کېږي.

هغه ویلي چې که څه هم د قطر او ترکیې په منځګړیتوب لنډمهاله اوربند شوی، خو پاکستان د طالبانو پر تعهد شک لري او پوځي عملیات به روان وي.

د حزب اسلامي ګوند مشر ګلبدین حکمتیار د شمالي ولایتونو د وروستۍ زلزلې د قربانیانو له کورنیو سره د خواخوږۍ او تسلیت مراتب وړاندې کړي.

حکمتیار په خپل پیغام کې د زیانمنو کورنیو ته د روغتیا دعا کړې او هغوی سره یې خواشیني څرګنده کړې.

هغه له شتمنو افغانانو او حکومتي ادارو غوښتي، چې د خپلو مرستو او همکارۍ له لارې د مصیبت‌ځپلو خلکو دردونه او ستونزې راکمې کړي.

د قطر د بهرنیو چارو وزارت د یوې اعلامیې له لارې د “افغانستان” طالبانو له حکومت او ولس سره د شمالي ولایتونو د زلزلې له امله خواخوږي څرګنده کړې ده.

په اعلامیه کې د قربانیانو کورنیو ته د تسلیت او د ټپیانو د ژر روغېدو هیله څرګنده شوې ده.

د اسراییل لومړي وزیر بنیامین نتانیاهو ویلي، هېواد یې د داسې لوی پوځ اړتیا لري چې د زېرمې ځواکونه یې بنسټ جوړ کړي.

نوموړي دا څرګندونې د پوځ د زېرمې له لوړپوړو افسرانو سره په ګډه ناسته کې کړي او ویلي یې دي چې، د حماس له یرغل وروسته په تېرو دوو کلونو کې په څو جبهاتو کې د ځمکنۍ جګړې مسؤلیت تر ډېره د همدې زېرمې ځواکونو پر غاړه و.

نتانیاهو ویلي، اسراییل د سیمې په بدلون سربېره، خپله بڼه هم بدله کړې ده.

د ده په وینا، اوس نور د مهار سیاست پای ته رسېدلی او د تلپاتې نوښت او اقدام مرحله پیل شوې ده.

هغه د زېرمې ځواکونو مېړانه ستایلې او ویلي یې دي: “تاسو یو ځل بیا د دښمن له اټکل سره برعکس ډګر ته حاضر شوئ. هغوی تېروتنه وکړه — نه یوازې زموږ په اړه، بلکې ستاسو په اړه هم.”

پخواني ولسمشر محمد اشرف غني د شمالي ولایتونو بلخ او سمنګان د زلزله‌ځپلو له کورنیو سره خپله ژوره خواخوږي څرګنده کړې ده.

ښاغلي غني د هغو افغانانو ستاینه کړې چې د هېواد له دننه او بهر د زلزله‌ځپلو سره مرستې کوي، او دا یې د افغانانو د یووالي او انساني احساس څرګندونه بللې ده.

هغه د ملګرو ملتونو په ګډون له نړیوالو ادارو غوښتي چې د افغانانو په نوم ترلاسه شوې مرستو کې د شفافیت نشتوالی پای ته ورسوي او د لګښتونو څرنګوالی روښانه کړي.

نوموړي زیاته کړې، افغانستان اوس د منځنۍ آسیا له هېوادونو سره د پراخو اقتصادي اړیکو له امله له پخوا ډېر پر ځان بسیا شوی دی.

پخواني ولسمشر ټینګار کړی چې د حیرتانو او آقینې بندرونو د عوایدو او لګښتونو شفاف رپوټونه دې له ولس سره شریک شي، څو خلک د خپلو ملي سرچینو د مصرف په اړه باخبره شي.

د امريکا ولسمشر ډونالډ ټرمپ په تازه څرګندونو کې ويلي، چې پاکستان په وروستيو کې د اټومي وسلو ازموينه کړې ده.

نوموړي دا څرګندونې له CBS ټلوېزيون سره په ځانګړې مرکه کې کړي.

د ټرمپ په وينا، دغه ازموينه په پټه ترسره شوې ده او دقيق ځای یې نه شي افشا کولی.

هغه زياته کړې: «پاکستان دا ازموينه داسې ځای کې کړې، چې ډېرو خلکو ته معلومه نه ده. يوازې ځينې ټکانونه احساس شوي، خو نړۍ پرې نه ده خبره.»

نوموړي همدارنګه ویلي، چې چين، روسيه او شمالي کوريا هم وروستيو مياشتو کې د اټومي وسلو ازموينې ترسره کړې دي.