د افغانستان د ملي امنیت پخواني رئیس رحمت الله نبیل د کابل د وروستیو بمباریو وروسته د پاکستان دننه د یو شمېر مهمو تأسیساتو نومونه او جغرافیایي کورډیناتونه خپاره کړي او ویلي یې دي چې که د غچ اخیستو ریښتینې اراده موجوده وي، دغه ځایونه د مشروع هدفونو په توګه یادېدای شي.

نوموړي په خپله ایکس‌پاڼه لیکلي، هغه برید چې د پاکستان له لوري په کابل کې د معتادینو د درملنې پر یوه مرکز شوی او په کې ګڼ ملکي کسان وژل شوي، د افغانستان د خلکو لپاره د شرم یو داغ بلل کېږي چې د تاریخ له حافظې به پاک نه شي.

د ده په وینا، د ناروغانو او بې‌وسه انسانانو په نښه کول نه امنیتي عملیات بلل کېدای شي او نه هم د ترهګرۍ پر ضد مبارزه.

د نوموړي په خبره، هیڅ هېواد د ملکي وګړو په وژلو امنیت نه شي تر لاسه کولای او دا ډول کړنې یوازې کرکه، بې‌باوري او بې‌ثباتي لا ژوروي.

نبیل د خپل دریځ د وضاحت لپاره د پاکستان دننه د انرژۍ او سون توکو د څو مهمو تأسیساتو کورډیناتونه هم یاد کړي، چې د هغه په وینا د افغانستان له خاورې سره نږدې موقعیت لري.

د دغو ځایونو له ډلې څخه د محمودکوټ د PARCO د تېلو ترمینل، د شکرپور د تېلو زېرمتون، د اُچ د ګاز د پروسس فابریکه، د لورالای د سون توکو زېرمتون او د کوهاټ د LPG ترمینل یاد شوي دي.

د رحمت الله نبیل لخوا د طالبانو حکومت ته وړاندې شوي کورډینات:
“PARCO د تېلو ترمینل – محمودکوټ
30.206° شمالي عرض البلد
70.956° ختیځ طول البلد
له افغانستانه فاصله: شاوخوا ۴۵۰–۵۰۰ کیلومتره
نږدې ولایتونه: کندهار، هلمند

د شکرپور د تېلو زېرمتون (Oil Depot)
27.955° شمالي عرض البلد
68.638° ختیځ طول البلد
له افغانستانه فاصله: شاوخوا ۳۰۰–۳۵۰ کیلومتره
نږدې ولایتونه: نیمروز، هلمند

د اُچ د ګاز د پروسس او LPG فابریکه
28.300° شمالي عرض البلد
69.850° ختیځ طول البلد
له افغانستانه فاصله: شاوخوا ۲۵۰–۳۰۰ کیلومتره
نږدې ولایتونه: کندهار، هلمند

د لورالای د سون توکو زېرمتون (Fuel Depot)
30.370° شمالي عرض البلد
68.600° ختیځ طول البلد
له افغانستانه فاصله: شاوخوا ۱۲۰–۱۵۰ کیلومتره
نږدې ولایتونه: پکتیکا، زابل

د کوهاټ د LPG د زېرمتون ترمینل
33.580° شمالي عرض البلد
71.440° ختیځ طول البلد
له افغانستانه فاصله: شاوخوا ۱۵۰–۱۸۰ کیلومتره
نږدې ولایتونه: خوست، پکتیا.”

د چارو ادارې پخواني رئیس فضل محمود فضلي ویلي، پر افغان خاوره د پاکستان روان ناقانونه، بزدلانه او وحشیانه هوايي بریدونه هېڅکله د ټي ټي پي پر ضد نه وو او نه هم دي، بلکې اصلي موخه یې د افغانستان په ګډون د ټولې سیمې بې‌ثباته کول دي، څو اسلام‌اباد وکولای شي خپله ستراتیژیکه برلاسي وساتي.

ښاغلي فضلي ویلي: «حقیقت دا دی چې پاکستان هېڅکله تر خپل کنټرول لاندې سیمو‌ کې د ټي‌ټي‌پي پر وړاندې اقدام نه دی کړی، نو لا په افغانستان کې به یې څنګه وکړي؟!»

نوموړي زیاته کړې چې پاکستان د خپل بادار په ګټه دغه ډول خطرناکه لوبه پر مخ وړي، خو اوس چې د پاکستان ملاتړی په خلیج فارس کې له وارخطایۍ سره مخ شوی، نو امکان شته چې اسلام‌اباد د دې بې‌پروا سیاست درنه بیه ورکړي.

د هغه په وینا، افغانستان که څه هم د لسیزو جګړو او سختیو سره مخ شوی، خو د یوه ملت په توګه به تل پاتې وي، خو دا حقیقت د پاکستان لپاره صدق نکوي.

د افغانستان د کرکټ ملي لوبډلې مشهور لوبغاړي راشد خان په کابل د پاکستان وروستیو هوايي بریدونو کې د ملکي وګړو د مرګ ژوبلې په اړه ژوره خواشیني څرګنده کړې او دا بریدونه یې په سختو ټکو غندلي دي.

نوموړي ویلي چې د ملکي کورونو، تعلیمي موسسو او روغتیايي بنسټونو په نښه کول، که قصدي وي او که د تېروتنې له امله، یو ستر جنګي جنایت دی.

د هغه په وینا، د بې ګناه انسانانو ژوند ته نه درناوی، په ځانګړې توګه د روژې مبارکې میاشت کې، یو زړه بوږنوونکی عمل دی او دا ډول پېښې به یوازې د نفاق او کرکې اور نور هم بل کړي.

راشد خان له ملګرو ملتونو او نورو نړیوالو بشري حقونو ادارو غوښتي چې د دې پېښې بشپړه او شفافه څېړنه وکړي او له عاملینو یې حساب وغواړي.

هغه زیاته کړې چې په دې سخت وخت کې د خپل ولس تر څنګ ولاړ دی او د دې لوی غم درد له خپل ملت سره شریکوي.

نوموړي د الله تعالی له دربار څخه شهیدانو ته د جنت الفردوس دعا کړې او ټپیانو ته یې د ژر روغتیا هیله څرګنده کړې ده.

راشد خان باور څرګند کړی چې دا زخمونه به ټکور شي او افغانان به بیا د یو ملت په توګه راپورته شي، ځکه د ده په وینا د افغانستان تاریخ د ولس د بیا راپاڅېدو شاهد دی.

د طالبانو حکومت مرستیال ویاند حمدالله فطرت راپور ورکړی، چې د پاکستاني پوځ لخوا د کابل ښار د امید په نوم د معتادینو د درملنې پر ۲زره بستریز روغتون د بمبارد له امله تر دې دمه ۶۵۰کسانو ته مرګ ژوبله اووښتې.

نوموړي ویلي، چې د پېښې له امله روغتون په بشپړ ډول له منځه تللی او تر دې مهاله شاوخوا ۴۰۰ تنه وژل شوي او ۲۵۰ نور ټپیان شوي دي.

هغه زیاته کړې چې د ژغورنې ټیمونه لا هم د اور د مهارولو او د پاتې کسانو د جسدونو د راویستلو په حال کې دي.

د طالبانو حکومت ویاند ذبیح الله مجاهد ویلي، چې پر کابل د پاکستان د پوځي رژیم وروستي بریدونه به بې ځوابه پاتې نه شي.

نوموړي ټینګار کړی چې اوس د اسلام‌اباد سره د ډیپلوماسۍ او خبرو وخت نه؛ بلکې د غچ اخیستو وخت دی.

همدا رنګه مجاهد ویلي، چې پاکستاني پوځي رژیم د افغانانو په وړاندې د اسرائیلو د تاکتیکونو په څېر عمل کوي، روغتونونه او نور ملکي ځایونه نښه کوي او وحشت رامنځته کوي.

د افغانستان د ملي مصالحې پخواني مشر ډاکتر عبدالله عبدالله د افغانستان په خاوره د پاکستان وروستي هوايي بریدونه په کلکه وغندل او ویلي یې دي چې دا بریدونه د نړیوالو قوانینو ښکاره سرغړونه ده.

نوموړي ویلي، دغه بریدونه چې ملکي تلفات یې هم اړولي، د ښه ګاونډیتوب له اصولو سره په بشپړ ټکر کې دي او په هېڅ ډول د توجیه وړ نه دي.

ډاکتر عبدالله ټینګار کړی چې د افغانستان او پاکستان ترمنځ د ورته ستونزو یوازینۍ حل لاره د خبرو اترو له لارې د ډیپلوماتیکو لارو کارول دي، نه پوځي اقدامات.

د هېواد پخواني ولسمشر حامد کرزي د پاکستاني پوځ جیټ الوتکو د نن شپې بریدونه په کلکو ټکو غندلي چې د کابل ښار پر استوګنیزو سیمو او ملکي ځایونو، په ځانګړي ډول د معتادینو پر روغتیايي مرکز ترسره شول.

ښاغلي کرزي په خپله ایکس پاڼه لیکلي، یاد بریدونه چې د افغانستان د پلازمېنې کابل په بېلابېلو سیمو کې ترسره شوي، د ملکي خلکو د مرګ‌ژوبلې او مالي زیانونو سبب شوي دي.

نوموړي د پاکستان پر حاکمو پوځي چارواکو غږ کړی چې د دغو بریدونو دوام به هېڅکله هغوی خپلو موخو ته ونه رسوي، بلکې د سیمې وضعیت به نور هم خراب او د همدغه هېواد په زیان به تمام شي.

هغه ټینګار کړی، که پاکستان د خپل خیر او د سیمې د ثبات غوښتونکی وي، باید خپلې ناسمې تګلارې له سره وارزوي او له افغانستان سره د ښه ګاونډیتوب او متمدنو اړیکو په چوکاټ کې تعامل وکړي.

اسلام‌اباد کې د افغانستان پخواني سفیر عاطف مشعل ویلي چې پاکستاني پوځ یو ځل بیا د روژې مبارکې میاشتې پر مهال د روژماتي په وخت کې د بې ګناه افغانانو وینې تویې کړې دي.

د هغه په وینا، وخت یې راغلی چې «اسلامي امارت» د پاکستاني رژیم خلاف د ملي پاڅون او جهاد اعلان وکړي.

دا په داسې حال کې ده چې څو شېبې وړاندې د پاکستان جیټ الوتکو کابل کې د معتادینو پر روغتون بمبار کړی او ګڼو ناروغانو ته یې مرګ ژوبله اړولې.

د طالبانو حکومت ویاند ذبیح الله مجاهد وایي چې د پاکستان پوځي رژیم یو ځل بیا د افغانستان له هوايي حریم څخه سرغړونه کړې او په کابل کې یې د معتادینو د درملنې یو روغتون په نښه کړی دی.

مجاهد په خپله اعلامیه کې ویلي، د پاکستاني ځواکونو د برید له امله ګڼ شمېر ملکي وګړي، چې ډېری یې د درملنې لاندې معتادین وو، وژل شوي او ټپیان شوي دي.

هغه دغه برید “جنایت” بللی او ویلي یې دي چې دا ډول کړنې د ټولو منل شوو نړیوالو اصولو او بشري قوانینو ښکاره نقض دی او د بشر ضد عمل ګڼل کېږي.

دا په داسې حال کې ده چې شیبه وړاندې پاکستاني جیټ الوتکو د کابل یو شمېر سیمې بمبارد کړي چې هممهاله د ننګرهار ولایت له یوشمیر ولسوالیو هم د بمبارد راپورونه ورکړل شوي.

تر دې مهاله د کره مرګ ژوبلې په اړه معلومات نه دی څرګند شوي.

پاکستاني جیټ الوتکو د کابل ښار او ننګرهار یو شمېر سیمې بمبار کړي دي.

دغه الوتکو د کابل بېلا بېلو سیمو باندې برید کړی او ویل کیږي چې د اتمې ناحیې په سیاسنګ سیمه کې نقلیه وسایطو باندې برید شوی چې اور لګېدنه یې هم رامنځته کړې ده او ددې ترڅنګ پلچرخي، شهرنو او کوټه‌سنګي سیمې هم په نښه شوي دي.

د اتمې ناحیې څخه یوې سرچینې حماسه میډیا ته ویلي چې د شاوخوا سیمو خلکو د کورونو ښېښې هم ماتې شوي دي.

د دغه بریدونو د مرګ ژوبلې په اړه جزیات نه دي ورکړل شوې.

دغه راز د ننګرهار اچین، غني خیل، ګوشته، نازیان او خوږیاڼو ولسوالیو کې هم بریدونه شوي دي.