ایراني بېړۍ‌چلوونکي چې تېره اوونۍ د سنګاپور ساحل ته نږدې د امریکایي ځواکونو له‌خوا د یوې بېړۍ تر نیول کېدو وروسته پاکستان ته لېږدول شوي وو، نن بېرته تهران ته ستانه شول.

د ایران ایرنا رسمي خبري اژانس د اسلام‌اباد له قوله راپور ورکړی چې ۲۰ ایراني عملې د ایران په یوې مسافر وړونکې الوتکه کې له اسلام‌اباد څخه تهران ته روانه شوه.

د راپورونو له مخې، د دغو ایراني بېړۍ‌چلوونکو او ۱۱ پاکستاني عملې خوشې کېدل د ایران د بهرنیو چارو وزیر عباس عراقچي او د پاکستان او سنګاپور د چارواکو ترمنځ له پراخو ډیپلوماتیکو هڅو وروسته ممکن شول.

د پاکستان د لومړي وزیر مرستیال او بهرنیو چارو وزیر مخکې اعلان کړی و چې هغه ایراني او پاکستاني عمله چې د امریکا له لوري د بېړۍ تر نیول کېدو وروسته د سنګاپور په اوبو کې پاتې شوې وه، د بېرته ستنولو پروسه یې بریالۍ شوې ده.

د هغه په وینا، دغه کسان لومړی له تایلنډه اسلام‌اباد ته انتقال شول او وروسته خپل هېوادونو ته واستول شول.

د طالبانو حکومت د ریاست‌الوزراء اقتصادي مرستیال ملا عبدالغني برادر اخوند په بلخ ولایت کې د حیرتان، مزارشریف اوسپنې پټلۍ د پنځمې برخې د بیاځلې فعالېدو پرانیسته وکړه.

په دې مراسمو کې هغه د ټولګټو وزارت هڅې ستایلي او له ازبکستان سره یې د اوسپنې پټلۍ په برخه کې د همکاریو قدرداني کړې.

برادر زیاته کړه چې د افغانستان او ازبکستان ترمنځ اقتصادي او سوداګریزې اړیکې د پخوا په پرتله لا پیاوړې شوې دي او د پراختیا په حال کې دي.

د ورکړل شوو معلوماتو له مخې، د دې پټلۍ پنځمه برخه۷۰ کیلومتره اوږدوالی لري، ۳۰ کیلومتره فرعي کرښې لري، ۵ سټېشنونه پکې شامل دي او د ۵۰ واګونونو د تخلیې ظرفیت لري

د خبرپاڼې له مخې ، د دې برخې بیا فعالېدل به د سوداګریزو توکو د انتقال بهیر چټک کړي، د ترانسپورتي لګښتونو په کمولو کې به مرسته وکړي او د افغانستان اقتصادي بهیر ته به نوی تحرک ورکړي.

همدارنګه تمه کېږي چې دا پروژه به د افغانستان او ازبکستان ترمنځ د سوداګرۍ حجم نور هم لوړ کړي او د سیمه‌ییزو اقتصادي اړیکو په پیاوړتیا کې مهم رول ولوبوي.

هندی لوبغاړی هاردیک پانډیا تیره شپه د ممبي او کلکتې تر منځ لوبه کې د لوبې د فیس لس سلنه ځکه جریمه شوی چې د بالینګ پر مهال یې ویکټې په قصدې ډول په لاس وهلې.

د طالبانو حکومت د ریاست‌الوزراء اقتصادي مرستیال ملا عبدالغني برادر اخوند د بلخ ولایت حیرتان بندر ته د سفر پر مهال اړوندو ادارو ته سپارښتنه کړې چې په دغه ستر سوداګریز بندر کې دې ۲۴ ساعته خدمات فعال او شته ستونزې ژر تر ژره هوارې شي.

د طالبانو حکومت مرستیال ویاند حمدالله فطرت په خپره کړې خبرپاڼه کې ویلي، چې د سفر پر مهال د مالیې، صنعت او سوداګرۍ، بهرنیو چارو، ترانسپورټ، ټولګټو، خوړو او درملو، نفت او ګازو او نورو امارتي ادارو د فعالیتونو او موجوده خنډونو ارزونه وشوه او د حل لپاره لازم تصمیمونه ونیول شول.

همدا رنګه، ویل شوي د پرېکړو له مخې به په حیرتان بندر کې د امارتي ادارو تشکیل زیاتېږي، لوی معیاري پارکینګونه، اداري ودانۍ، د تخلیې او بارګیرۍ مرکزونه، پرمختللي لابراتوارونه، سړې خونې او معیاري سړکونه جوړېږي.

همداراز به د اوسپنې پټلۍ پراختیا، ډیجیټلي تلې او د قاچاق د مخنیوي لپاره سیار سکنرونه هم نصب شي.

راپور زیاتوي، د دغو اقداماتو په عملي کېدو سره به په حیرتان بندر کې وارداتي او صادراتي چارې له ځنډ پرته په ۲۴ ساعته ډول ترسره شي، چې ورسره به د افغانستان او ازبیکستان ترمنځ سوداګریزه راکړه ورکړه پراخه او د هېواد اقتصادي فعالیتونه پیاوړي شي.

د طالبانو حکومت د صنعت او سوداګرۍ وزارت وایي، افغانستان او ازبکستان د اقتصادي او صنعتي همکاریو د پراختیا لپاره د ګډو پانګونو او د فابریکو د انتقال پر مهمو طرحو خبرې کړې دي.

د یاد وزارت په وینا، د طالبانو د حکومت د صنعت او سوداګرۍ وزیر نورالدین عزیزي او د ازبکستان د سپکو صنعتونو د پراختیا ادارې رئیس ناظم‌جان خالمرادوف ترمنځ په ترسره شوې دوه‌اړخیزه غونډه کې د پنبې معیاري کر، د تار تولید، د چرم او کشمېرې د پروسس فابریکو انتقال، د چرمي بوټانو او ټوکرانو تولید او افغانستان ته د شاوخوا ۲۰ صنعتي فابریکو د لېږد پر موضوعاتو بحث وشو.

دواړو لورو همداراز د ترمذ په ګډ بازار کې د سپکو صنعتونو نړیوال نندارتون، په افغانستان کې د ګډې پانګونې له لارې د تار تولید او د سوداګریزو اړیکو د پراختیا په اړه د همکاریو پر پراخولو ټینګار کړی دی.

د طالبانو حکومت زیاتوي، د یادو پروژو د عملي کېدو لپاره د دواړو خواوو تخنیکي او ارتباطي ټیمونه هم ټاکل شوي دي.

د پاکستان کرکټ ملي لوبډلې چټک توپ ‌اچوونکي محمد عامر په رسمي ډول د برېتانیې تابعیت (رسمي اسناد) ترلاسه کړي دي.

نوموړي تر دې وړاندې ویلي وو چې غواړي د هند غوره لیګ (IPL) کې ولوبېږي؛ خو د پاکستان تابعیت لرونکي لوبغاړي په دغه لیګ کې د ګډون اجازه نه لري ځکه عامر د برېتانیا تابعیت غوره کړی دی.

محمد عامر ویلي، هغه ارمان چې د هند غوره لیګ په اړه یې درلود، اوس به یې د پوره کېدو فرصت ومومي.

نوموړی د پاکستان د هغې لوبډلې غړی و چې د ۲۰۰۹ کال شل اوریز نړیوال جام او د ۲۰۱۷ کال چمپینز ټرافۍ یې ګټلې وه.

د طالبانو حکومت د حج او اوقافو وزارت اعلان کړی چې سږ کال د حج د فریضې د ادا کولو لپاره شاوخوا ۳۰ زره افغانان سعودي عربستان ته رسېدلي دي.

د وزارت د خبرپاڼې له مخې، دغه افغانان د ۹۷ الوتنو په وسیله مدینې منورې او مکې مکرمې ته انتقال شوي او اوس نږدې ټول په مکه مکرمه کې ځای پر ځای شوي دي.

وزارت ویلي افغان حاجیانو ته د غوره خدمتونو د وړاندې کولو په موخه لازم تدابیر نیول شوي او د لارښوونې، روغتیايي خدمتونو او نورو اسانتیاوو زمینه برابره شوې څو افغانان وکولای شي د حج مراسم په ارام او له ستونزو پرته ترسره کړي.

د سپینې ماڼۍ لوړپوړي سلاکار سټيفن ميلر له فاکس نیوز سره په مرکه کې ویلي چې «د ایران پاتې حکومت باید د هغه سند له منلو چې د امریکا لپاره د قناعت وړ وي او یا د امریکا د پوځ له خوا له داسې سزا سره مخ کېدو چې د معاصر تاریخ بې‌سارې بېلګه به وي» څخه یو انتخاب وکړي.

میلر په دې ټلویزیوني مرکه کې د ایران پر ضد د امریکا پوځي عملیات یو بشپړ او ماتوونکی نظامي شکست بللی او ویلي چې دا د ایران له لوري د اټومي وسلې د ترلاسه کولو د خوب پایله وه.

هغه زیاته کړه چې ډونالډ ټرمپ د اټومي وسلو د نه خپرېدو اصل د امریکا د ښکاره ځواک په کارولو سره عملي کړی او دا یوازې ایران، سپاه پاسداران او د هغه حکومت ته نه، بلکې ټولې نړۍ ته یو پیغام دی؛ هر هغه چا ته چې ورته اقدام په فکر کې ولري.

میلر ادعا کړې چې امریکا د ایران «شرور، فاسد او بد» مشرتابه له منځه وړی، د هغوی هوايي او سمندري ځواکونه، د توغندیو پروګرام او د دفاعي صنعت بنسټونه یې ویجاړ کړي دي.

د هغه په وینا، ایران اوس په داسې کمزوري حالت کې دی چې نور د نړیوالې جګړې د رامنځته کولو توان نه لري.

د سپینې ماڼۍ سلاکار همداراز ویلي چې د ایران حکومت اوس د خپل تاریخ په تر ټولو کمزوري وضعیت کې قرار لري.

د طالبانو حکومت د کار او ټولنیزو چارو وزارت په خپلې وروستۍ اعلامیه کې د هغو شل زرو کاري ویزو په اړه وضاحت ورکړی چې په دې وروستیو کې په ټولنیزو رسنیو کې یې پراخ بحثونه روان وو.

وزارت ویلي، تر اوسه له د ترکیې هیواد سره د افغان کارګرانو د لېږد په تړاو هېڅ رسمي هوکړه‌ لیک نه دی لاسلیک شوی او دا مهال ترکیه افغانانو ته د کاري ویزو د ورکړې کومه ځانګړې برنامه هم نه لري.

د دغو خبرونو له خپرېدو وروسته ګڼو افغان ځوانانو هیله څرګنده کړې وه چې ښايي د یادو ویزو له لارې ترکیې ته لاړ شي او د کار فرصتونه ورته برابر شي.

وزارت له هېوادوالو غوښتي چې د ناسمو اوازو او شایعاتو ښکار نه شي او د ویزو په نوم دې هېڅ شرکت، دفتر یا شخص ته خپل اسناد او پیسې نه سپاري.

د اسرائیل هيوم ورځپاڼې د باخبرو سرچینو له قوله راپور ورکړی چې هغه غونډه چې د چهارشنبې په ورځ په سپینه ماڼۍ کې د ایران په اړه ترسره شوه، له سختو اختلافاتو او تاوتریخوالي سره مخ شوه؛ خو په پای کې د امریکا ولسمشر ډونالډ ټرمپ د جګړې او بهرنیو چارو وزیرانو د دریځ خلاف، او د جی‌ډي‌ ونس او خپلو ځانګړو استازو له نظر سره سم، له ایران سره د خبرو دوام تایید کړ.

ورځپاڼې لیکلي چې د امریکا د بهرنیو چارو وزیر مارکو روبیو او د دفاع وزیر پيټ هګسټ باور درلود چې په اوسني پړاو کې، پرته له دې چې پر ایران جدي فشارونه واچول شي — لکه د پوځي برید ګواښ او د اقتصادي بندیزونو زیاتوالی — له ایران څخه امتیاز اخیستل ناشوني دي.

په مقابل کې، د امريکا مرستيال ولسمشر جی‌ډي ونس استدلال کړی چې د تهران وروستی وړاندیز د انعطاف نښه ده او کولای شي د لومړني تړون لپاره زمینه برابره کړي.

سرچینو ویلي چې د ټرمپ ځانګړو استازو، سټیو ويتکاف او جرد کوشنر هم په دې بحث کې د ونس له دریځ ملاتړ کړی.

د راپور له مخې، دغو استازو له غونډې مخکې د قطر، عمان او سعودي عربستان له مشرانو سره خبرې کړې وې.

اسرائیل هیوم لیکلي چې د غونډې فضا هغه وخت لا پسې توده شوه، کله چې ټرمپ پر ونس او خپلو استازو نیوکه وکړه او ویې ویل چې د هغوی نرم دریځ ایران ته وخت ورکوي او د امریکا او د ولسمشرۍ ادارې اعتبار ته زیان رسوي.

په ځواب کې، ونس په کلکه وویل چې حکومت باید د پوځي شخړو د پای ته رسولو، د امریکايي سرتېرو د بېرته راستنولو، د تېلو د بیو د راکمولو او د امریکا پر کورنیو ستونزو د تمرکز کولو هڅه وکړي.

سرچینو ویلي، د ونس دغه ځواب په غونډه کې ناست کسان حیران کړل.