د بشري حقونو د څار سازمان، د افغانستان لپاره د ملګرو ملتونو د ځانګړي راپور ورکوونکي پر سفر بندیز د شرم وړ بللی دی.
د یاد سازمان د د اسیايي څانګې مشر آلين پیيرسون پر اېکس یوه لیکنه کې ویلي چې د بشري حقونو په اړه د طالبانو «بشپړ بې پامۍ» ته په کتو دا پرېکړه د حیرانتیا وړ نه ده.
هغه ویلي، دا چاره به په افغانستان کې د بشري حقونو د نقض په اړه د ملګرو ملتونو هوډ لا پیاوړی کړي.
د یادونې ده چې د طالبانو دغې پرېکړې ګڼ غبرګونونه راپارولي.
دا په داسې حال کې ده چې تېره ورځ د طالبانو حکومت ویاند ذبیح الله مجاهد ویلي چې ریچارد بېنېټ د دوی پر ضد تبلیغات کول او په وینا یې باور پرې نه شي کولی.
هغه زياته کړې چې ریچارډ بېنېټ کوچنۍ موضوع ستروله او نورو سازمانونو ته یې ناسم معلومات ورکول.
ریچارډ بېنېټ په خپلو رپوټونو کې افغانستان کې د بشري حقونو او په تېره د نجونو او مېرمنو د حقونو د وضعیت د خرابېدو په اړه ملګرو ملتونو ته معلومات وړاندې کول.
