پاکستان له امریکا غوښتي چې د دغه هېواد د اسعارو او اقتصادي ثبات د پیاوړتیا لپاره د ۱۰ میلیارد ډالرو د تبادلې د ثبات د ملاتړ صندوق جوړ کړي.
د رویټرز د راپور له مخې، دا غوښتنه د پاکستان د مالیې وزیر محمد اورنګزېب له خوا د امریکا د خزانې له وزیر سره په لیدنه کې مطرح شوې وه.
که دا وړاندیز ومنل شي، د پاکستان د بهرنیو اسعارو زېرمې به پیاوړې او پر پاکستانۍ روپۍ به فشار کم شي.
د پاکستان د مالیې وزیر ویلي، دا عادي پور یا امتیاز نه دی؛ بلکې داسې مالي میکانیزم دی چې د اسعارو ثبات او نړیوالو مالي بازارونو ته د پاکستان لاسرسی پیاوړی کړي.
اسلاماباد تمه لري چې واشنګټن به د دې غوښتنې په اړه تر سپټمبر پورې پرېکړه وکړي.
