د فیسبوک او انسټاګرام مالکې «میټا» کمپنۍ پر وړاندې په امریکا، اروپا او یو شمېر نورو هېوادونو کې ګڼې حقوقي دعوې او تنظیمي اقدامات روان دي. په دې شرکت تور دی چې د خپلو ټولنیزو شبکو په طرحه او الګوریتمونو کې یې داسې ځانګړنې کارولي چې ماشومان او تنکي ځوانان پرې روږدي کېږي او د رواني روغتیا له ستونزو سره مخ کېدای شي.
په امریکا کې د ۲۹ ایالتونو په ګډه دعوه کې ادعا شوې چې د میټا الګوریتمونه روږدي کوونکی چلند هڅوي، د کاروونکو عمر په سمه توګه نه تاییدوي او ماشومان زیانمنو محتواوو ته رسوي. میټا دغه تورونه رد کړي دي.
په کالیفورنیا کې په یوه قضیه کې له میټا د احتمالي ۱.۴ ټریلیون ډالرو تاوان غوښتنه شوې او له شرکت غوښتل شوي چې د ماشومانو د خوندیتوب لپاره د خپلو پلاتفورمونو په ډیزاین او الګوریتمونو کې بدلونونه راولي.
اروپايي ټولنې، برازیل او کینیا هم د ماشومانو پر خوندیتوب او د هغوی د احتمالي روږدي کوونکو ځانګړنو له امله د میټا د پلاتفورمونو پر ضد قانوني اقدامات کړي دي.
د دغو قضیو پراخېدل ښيي چې د ټولنیزو رسنیو د شرکتونو د حساب ورکولو موضوع په نړیواله کچه جدي شوې او د قضیو پایلې ښايي د ماشومانو د عمر د تایید، د پلاتفورمونو د ډیزاین او د کاروونکو د خوندیتوب پر راتلونکو مقرراتو اغېز وکړي.
