ملګرو ملتونو پر سوریه د اسرائیلو د هوايي بریدونو د سمدستي درولو غوښتنه کړې او دغه بریدونه یې د سوریې له ځمکنۍ بشپړتیا او هوايي حریم «د اندېښنې وړ سرغړونه» بللې ده.
اسرائیلي جنګي الوتکو د اګست پر ۱۸مه د سوریې د ادلب ولایت په ختیځ کې پر ابو الظهور پوځي هوايي ډګر اته هوايي بریدونه کړي دي.
د سوریې د دولتي رسنیو په وینا، بریدونو د هوايي ډګر ځغاستلیکه او د وسلو او تجهیزاتو د ساتلو ځایونه زیانمن کړي، خو د مرګژوبلې راپور نه دی ورکړل شوی.
د ملګرو ملتونو د سرمنشي انتونیو ګوترېش ویاند سټېفان دوجاریک ویلي چې دغه بریدونه باید ودرول شي او ملګري ملتونه یې پر وړاندې دریځ لري.
سوریې هم دغه بریدونه له خپل حاکمیت سرغړونه بللي او د ملګرو ملتونو له امنیت شورا یې د اقدام غوښتنه کړې ده.
