ټولنیزې شبکې اېکس د یمن د ایران پلوه حوثي ډلې د پوځي ویاند یحیی سریع حساب ځنډولی دی.
د حساب د ځنډولو کره دلیل نه دی څرګند شوی، خو په پاڼه کې د اېکس له لوري د حساب د ځنډ خبرتیا لیکل شوې ده.
یحیی سريع له ۲۰۱۸ کال راهیسې د حوثیانو پوځي ویاند دی او د دې ډلې د پوځي عملیاتو او بریدونو د اعلانونو لپاره یې له ټولنیزو رسنیو پراخه ګټه اخیسته.
د هغه حساب په ځانګړي ډول په سره سمندر کې د بېړیو پر وړاندې د بریدونو او پر سعودي عربستان او نورو اهدافو د بریدونو د ادعاوو په خپرولو کې مهم رول درلود.
دا د سريع د حساب د ځنډولو لومړۍ پېښه نه ده؛ د هغه یو پخوانی ټویټر حساب هم په ۲۰۲۲ کال کې د دې شبکې له لوري ځنډول شوی و.
