المرصاد په یو خپور شوي تحلیل کې ویلي چې د نړۍ د متقابل احترام اصل دا ایجابوي چې هېڅ هېواد خپله خاوره د نورو هېوادونو پر ضد د ګواښ او تاوتریخوالي لپاره ونه کاروي.
په دې تحلیل کې ويل شوي چې ځینې استخباراتي او پوځي کړۍ په سیمه کې د بېثباتۍ په رامنځته کولو کې رول لري، او د داعش د ځینو نیول شویو غړو د اعترافونو له مخې د روزنې او پټنځایونو یادونه هم شوې ده.
لیکوال زیاتوي چې د افغانستان له لوري وړاندې شوي راپورونه او د ځینو نیول شویو کسانو څرګندونې دا ادعا پیاوړې کوي چې په سیمه کې ځینې ډلې د مشخصو هېوادونو او په ځانګړې ډول د پاکستان له خاورې څخه د فعالیت لپاره استفاده کوي.
تحليل کې ليکل شوي:«د ترکیې د MIT استخباراتي ادارې له لوري د داعش هغه غړی نیول شوی چې په ترکیه کې یې د رسنیزو تبلیغاتو مسؤلیت درلود. د هغه اعتراف دا و چې دوی د روزنې او استوګنې مرکزونه د پاکستان په بلوچستان کې لري.»
په مقاله کې همدارنګه ویل شوي چې دا ډول وضعیت د سیمې د هېوادونو ترمنځ بېباوري زیاتوي او د ګډې امنیتي همکارۍ اړتیا لا پسې مهمه کوي.
تحليل کې زیاته شوې چې د سیمې هېوادونو بې ثباتي په پاکستان پورې تړلې ده او له دغه هېواد څخه وسله والې ډلې خپل فعاليتونه تنظيموي.
