د نوبل د سولې جایزې ګټونکې، ملالې یوسفزۍ، د اروپایي ټولنې له خوا بروکسل ته د طالبانو حکومت د استازو د بلنې په اړه اندېښنه څرګنده کړې ده.
ملالې یوسفزۍ په اېکس کې لیکلي چې د طالبانو له حکومت سره د کډوالو د موضوع په اړه خبرې کول داسې پیغام ورکوي چې یو حکومت کولای شي د ښځو او نجونو حقونه تر پښو لاندې کړي او بیا هم د یوه ډیپلوماتیک شریک په توګه ومنل شي.
هغې ویلي چې اروپا باید له داسې نظام سره د اړیکو پراخولو په اړه له احتیاطه کار واخلي چې د هغې په وینا د نړۍ له جدي بشري حقونو ستونزو څخه د یوې مسوولیت پر غاړه لري.
یوسفزۍ ويلي چې د طالبانو حکومت ښځې او نجونې له زدهکړو، کار، ټولنیز ژوند او ازاد تګ راتګ څخه محرومې کړې دي.
هغې همدارنګه د هرات د وروستیو پېښو یادونه کړې او ویلي یې دي چې د ښځو او نجونو د نیولو او د اعتراضونو پر مهال د تاوتریخوالي راپورونه د اندېښنې وړ دي.
دا په داسې حال کې ده چې اروپایي ټولنې تایید کړې چې د افغانستان د کډوالو د موضوع په اړه د خبرو لپاره یې د طالبانو د حکومت یو پلاوی بروکسل ته وربللی دی.
