د اسرائیل د دفاع وزیر ویلي، چې په لبنان کې د حزب الله د مخابرو له چاودنو وروسته په منځني ختیځ کې د جګړې نوی پړاو پیلېږي.
رویټرز اژانس ویلي، چې یوف ګالانت د اسرائیلو د هوايي ځواک په یوه اډه کې ویلي، چې موږ په جګړه کې یو نوی پړاو پیلوو او دا زموږ په برخه کې زړورتیا، عزم او استقامت ته اړتیا لري.
په تېرو دوو ورځو کې د لبنان د حزب الله د مخابرو په چاودنو کې د دغه هېواد د روغتیا وزارت ویلي، چې ۳۲ تنه وژل شوي او څه باندې ۳۴۵۰ نور ټپیان شوي دي.
رویټرز د امنیتي سرچینو له قوله ویلي، چې د اسرائیلو استخباراتي اداره یا موساد د دغو چاودنو مسووله ده.
