یو شمېر سرچینو رسنیو ته ویلي، چې د طالبانو حکومت د اوبو او انرژۍ وزارت سلاکار، فاروق اعظم له نظارتخانې د کابل پوځي محکمې ته انتقال کړی دی.
د سرچینو په وینا، ځینو طالب وزیرانو فاروق اعظم ته ویلي چې د ده د نیولو امر د شیخ هبتالله له لوري شوی او دوی د خوشې کولو صلاحیت نه لري.
هغوی ویلي چې یوازینۍ لاره یې له شیخ هبتالله څخه بښنه غوښتل دي؛ خو فاروق اعظم د بښنې غوښتلو څخه ډډه کړې ده.
د طالبانو حکومت د هغه د کورنۍ دریو غړو ته اجازه ورکړې چې هره ورځ ورسره وویني او دارو درمل او خوراکي توکي ورته یوسي.
فاروق اعظم مخکې په یوه لیک کې خپل زوی ته ویلي و چې د نجونو د زدهکړو او عصري تعلیم د ملاتړ او د طالبانو د ځینو پالیسیو د انتقاد له امله نیول شوی او د هر ډول سخت چلند منلو ته تیار دی.
