د طالبانو حکومت ویاند ذبیح‌الله مجاهد د پاکستان د دفاع وزیر خواجه اصف وروستۍ څرګندونې رد کړې او هغه یې بې‌اساسه بللې دي.

مجاهد په یوه تازه مرکه کې ویلي چې د پاکستاني چارواکو خبرو ته ارزښت نه ورکوي او “اسلامي امارت” یوازې د افغانستان د ملي حاکمیت او خاورې دفاع ته ژمن دی.

هغه ادعا کړې چې د اسلام‌اباد ځینې چارواکي د کابل پر ضد ناسم تبلیغات او بې‌بنسټه تورونه خپروي، څو د افغانستان پر وړاندې منفي فضا رامنځته کړي.

دا څرګندونې په داسې حال کې دي چې د دواړو هېوادونو ترمنځ پر سرحدي او سیاسي مسایلو لفظي ناندرۍ زیاتې شوې دي، خو د طالبانو حکومت وایي د سیمې ثبات د متقابل تورونو پر ځای په رښتینې همکارۍ کې نغښتی دی.

د امریکا د بهرنیو چارو وزیر مارکو روبیو د مونیخ امنیتي کنفرانس پر مهال ویلي چې امریکا او اروپا له یو بل سره ژورې تاریخي او ستراتېژیکې اړیکې لري او دا اړیکې باید لا پیاوړې شي.

هغه ټینګار کړی چې امریکا د اروپا څخه د بېلتون اراده نه لري، بلکې غواړي پخوانۍ او اوږدمهاله ملګرتیا بیا ورغوي.

د روبیو په وینا، واشنګټن نه غواړي خپل متحدین کمزوري کړي، بلکې غواړي هغوی دومره پیاوړي وي چې د ځان دفاع وکړای شي او هېڅ دښمن د هغوی د ازمایلو جرئت ونه کړي.

روبیو زیاته کړې چې له اروپایي هېوادونو سره ګډ کار کول به د یوې متوازنې او معقولې بهرنۍ تګلارې په بیا جوړولو کې مرسته وکړي او نړیوال ثبات به پیاوړی کړي.

د پاکستان د جمعیت علمای اسلام ګوند مشر مولانا فضل‌الرحمن ویلي چې امریکا په افغانستان کې د چین او روسیې پانګونه د منلو وړ نه بولي او دا موضوع د واشنګټن لپاره سره کرښه ده.

نوموړي په یوه ګډه خبري غونډه کې ادعا کړې چې امریکا د خپلو موخو لپاره له پاکستانه د نیابتي په توګه کار اخلي، او زیاته کړې چې پاکستان له ګڼو ګاونډیو هېوادونو سره له ستونزو سره مخ دی.

هغه ویلي: «هند سره هم دښمني کوي، له افغانستان سره هم دښمني کوي، چین هم ناراضه دی، له ایران سره هم اړیکې تر فشارونو لاندې دي، امریکا هم پر ایران برید ته ګواښېږي او په افغانستان کې د روسیې او چین پانګونې د یوې شېبې لپاره هم امریکا ته د منلو وړ نه‌ دي، امریکا د هغه لپاره پاکستان د یوه نیابتي په توګه کاروي.»

فضل‌الرحمن همداراز ټینګار کړی چې د پاکستان بهرنۍ تګلاره باید بدله شي او د طالبانو له حکومت یې غوښتي چې له اسلام‌اباد سره اختلافات د خبرو له لارې حل کړي.

تېره شپه د کاپیسا مرکز اړوند «الیاس خیل شوخي» سیمه کې د غره د ښویدو له امله یو کور د تېږو او خاورو لاندې شوی، چې څلور تنه پکې وژل شوي او شپږ نور ټپیان شوي دي.

د طالبانو حکومت د کاپیسا ولایت د امنیې قومندانۍ مطبوعاتي ادرس ویلي، د پېښې د وژل شویو کسانو په منځ کې دوه کوچنۍ نجونې، یوه ښځه او یو سړی شامل دي.

ټپیان، چې درې یې ښځې او درې یې سړي دي، د خلکو په مرسته له خاورو راویستل شوي او روغتون ته انتقال شوي دي.

د یاد ولایت د امنیې قوماندانۍ د مطبوعاتي دفتر په وینا، د بیړنیو مرستندویه ټیمونو لټون او د ژغورنې عملیات لا هم په سیمه کې روان دي ترڅو ډاډ ترلاسه شي چې نور څوک د خاورو لاندې نه وي.

د طالبانو حکومت د کار او ټولنیزو چارو وزارت د روژې میاشتې لپاره د دولتي ادارو د کاري وخت نوې طرحه اعلان کړې ده، چې له مخې به یې د مرکز او ټولو ولایتونو ادارې خپل فعالیتونه د سهار له نهو بجو پیلوي.

د یاد وزارت د معلوماتو له مخې، د دولتي کارکوونکو رسمي کار به د ماسپښین تر دوو بجو دوام لري او دغه مهالوېش به د پنجشنبې په ورځو هم عملي کېږي، چې پکې د ماسپښین د لمانځه لپاره وقفه هم شامله ده.

وزارت همدارنګه ویلي، هغه ادارې او بنسټونه چې تولیدي، روغتیايي، ښوونیز، خدماتي او نشراتي فعالیتونه لري او یا هم د ۲۴ ساعته خدمتونو برخه دي، کولای شي د خپلو کاري اړتیاوو او اقلیمي شرایطو ته په کتو سره د کارکوونکو د حضور وختونه په خپلواکه توګه تنظیم کړي.

د امریکا د سمندري ځواکونو قومندانۍ اعلان کړی چې د USS Kearsarge (LHD-3) بېړۍ د لومړي ځل لپاره د F-35B جنګي الوتکې بریالۍ ناسته ترسره کړې.

د یادې قومندانۍ په وینا، دا اقدام د امریکا د سمندري ځواکونو او بحري ځواکونو ترمنځ د ګډو عملیاتو په برخه کې یو مهم پرمختګ بلل کېږي، ځکه چې F-35B یوه پرمختللې الوتکه ده چې د لنډې الوتنې او عمودي ناستې وړتیا لري.

د F-35B ناستې بریا ښيي چې د امریکا سمندري ځواک د جګړې په نوې ټکنالوژۍ سمبال شوی او کولی شي په سمندر کې هم د پرمختللو جنګي الوتکو مؤثره کارونه ترسره کړي، چې دا د راتلونکو پوځي عملیاتو لپاره ستر ستراتېژیک اهمیت لري.

د طالبانو حکومت د مهاجرینو ستونزو ته د رسېدنې عالي کمېسیون دارالانشاء ویلي، د تېرې جمعې په ورځ د هېواد له بېلابېلو سرحدي لارو څخه افغان مهاجرین په اجباري توګه هېواد ته راستانه شوي دي.

د راپور له مخې، په ننګرهار کې د تورخم له لارې (۶۲۱) کورنۍ چې (۳۳۱۲) غړي لري هېواد ته راستانه شوي.

همدارنګه په کندهار کې د سپین بولدک له لارې (۴۴) کورنۍ، په نیمروز کې د ورېښمو له لارې (۱۰) کورنۍ او (۴۷۶) مسافر، په هرات کې د اسلام کلا له لارې (۹) کورنۍ او په هلمند کې د بهرامچې له لارې (۸) کورنۍ هېواد ته راستنې شوې دي.

د کمېسیون د معلوماتو له مخې، ټولټال (۶۹۲) کورنۍ چې (۳۷۰۴) کسان جوړېږي ثبت او بایومیټریک شوي او له دې ډلې (۳۸۹) کورنۍ چې (۲۱۱۴) کسان دي بېلابېلو ولایتونو ته لېږدول شوي دي.

د بریټانیا دایسټ انګلیا “University of East Anglia” پوهنتون د نوې څېړنې له مخې، امکان لري چې تر ۲۰۵۰م کال پورې يا تر هغه هم مخکې، په يو شمېر هېوادونو کې د تودوخې منځنی حد تر ۲ درجې سانتي‌ګرادو لوړ شي، چې دا به د ځينو ښارونو لپاره د ژوند شرايط له جدي ستونزو سره مخ کړي او حتی امکان شته چې ژوند کول هم پکې ناممکن شي.

څېړنه ښيي، هغه هېوادونه چې تود او نيمه‌تود اقليم لري، لکه افغانستان، چين، هند، مصر، ترکيه، عراق، برازیل، مالي، الجزایر، مراکش، مکسیکو، تایلنډ او د امريکا متحده ايالات، به د اقليمي بدلون تر ټولو دروند اغېز وګالي.

په ځانګړي ډول د موسمي بارانونو سيمې به ژر او ډېرې تودې شي.

د څېړونکو په وينا، که نړيواله تودوخه يوازې تر ۲ درجې سانتي‌ګرادو محدوده هم پاتې شي، بيا به هم په ډېرو ښارونو کې د ښاري تودوخې کچه تر ۳ درجې سانتي‌ګرادو لوړه شي، چې دا به د انساني روغتيا، کاري ژوند او چاپېريال لپاره خطرناک حالت رامنځته کړي.

متخصصان ټينګار کوي، چې که جدي ګامونه وانخيستل شي، نو په راتلونکو لسيزو کې به د ګرمۍ له امله د ناروغيو او مړينې پېښې په بې‌ساري ډول زياتې شي.

د رویټرز د راپور له مخې، ټاکل شوې ده د سه‌شنبې په ورځ په جنیوا کې د ایران او اوکراین په اړه دوه جلا خو مهمې ډیپلوماټیکې خبرې ترسره شي.

رویټرز د خپلو باخبره سرچینو په حواله راپور ورکړی چې، د امریکا یو پلاوی به د سه‌شنبې په سهار له ایراني چارواکو سره وویني.

په دغه امریکایي پلاوي کې د ولسمشر ځانګړي استازي سټیو ویتکاف او جرډ کوشنر شامل دي.

د راپور له مخې، د اومان استازي به د دواړو لورو ترمنځ د منځګړیتوب رول ولوبوي او همدارنګه ویتکاف او کوشنر به د ورځې په دویمه برخه کې له روسیې او اوکراین سره په درې اړخیزو خبرو کې ګډون وکړي، څو د جګړې د پای لپاره لارې ولټوي.

بلخوا د امریکا ولسمشر ډونالډ ټرمپ د ایران پر حکومت فشار زیات کړی او د وروستیو اعتراضونو پر وړاندې د سخت چلند له امله یې په سیمه کې د امریکا سمندري ځواک هم پیاوړی کړی دی.

د اسراییلو خبریال باراک راوید راپور ورکړی چې سټیو ویتکاف د اوونۍ په پیل کې د عمان د بهرنیو چارو وزیر سره د ایران د اتومي مذاکراتو په اړه ځانګړي پیغامونه شریک کړي.

د راپور له مخې، د عمان وزیر د خبرو وروسته سند ترتیب کړی او هغه علی لاریجاني ته سپارلی، چې د سه شنبې په ورځ یې مسقط ته سفر کړی و.

راپور زیاتوي چې د عمان لاره لا هم د تهران او واشنګټن ترمنځ د پیغامونو په تبادله کې مهم رول لري.

رویترز راپور ورکړی چې د امریکا او ایران ترمنځ نوې غونډه د سه شنبې په ورځ په ژنو کې ترسره کېږي، چې د امریکا پلاوی به پکې د ویتکاف او جرد کوشنر په ګډون د ایران له استازو سره وګوري، او عماني استازي به د منځګړیتوب رول ولري.