د غزې په شمال کې د اسرائیلو په هوايي برید کې ۲۲ کسان وژل شوي او ۳۰ نور ټپیان دي.
اسوشیټيډپرېس خبري اژانس ویلي، چې دا برید د غزې ښار په زیتون سیمه کې شوی ده.
بل لورته اسرائیلو ویلي، چې د حماس یو مرکز یې په نښه کړی دی.
د یادونې ده، چې تر دا مهاله د اسرائيلو په بریدونو ۴۱ زره فلسطیني وګړي وژل شوي دي.
د امریکا د مرکزي استخباراتو د ادارې یا «سي آی اې» پخوانۍ استازې سارا اډمز وايي، طالبانو محمود شاه حبیبي القاعده شبکې ته سپارلی او دا شبکه غواړي چې هغه اعدام کړي.
سارا اډمز په خپله ایکسپاڼه لیکلي، چې د القاعده شبکه په داسې حال کې محمودشاه حبیبي اعداموي چې د امریکا حکومت طالبان په افغانستان کې د “ترهګرۍ ضد متحد” ګڼي.
سارا اډمز ویلي، چې پر محمود شاه حبیبي تور دی، چې د ايمن الظواهري ځای يې امريکا ته افشا کړی و او بيا امريکا په يو هوايي بريد کې الظواهري ووژاه.
په ورته وخت کې د طالبانو حکومت ویاند ذبیح الله مجاهد حماسه میډیا ته ویلي، چې دوی سره محمودشاه حبیبي نشته.
په تېر جمهوري حکومت کې د پکتیا والي محمد حلیم فدایي وایي، چې په ایران او پاکستان کې د ملي سرود په وړاندې د طالب استازو نه درېدلو لپاره دا بهانه چې موسیقي اسلام کې حرامه ده، ډېره خندوونکې ده.
ښاغلي حلیمي ویلي، که چېرې د یوې لحظې لپاره د موسیقي په اړه ځیني روایتونه سم وګڼو، نو هماغو روایتونو کې هم د موسیقي د «اورېدو» خبره ده نه موسیقي ته د «ودرېدو» خبره.
نوموړي ویلي، چې ملا صاحبان دې ددین په یوه کمزورې کتاب او روایت کې دا را وښیي چې موسیقي ته درېدل حرام دي.
هغه دغه راز زیاته کړې، چې مولوي صیبانو تاسو تر اوسه په دې نه پوهېږئ چې موسیقي په غوږو اورېدل کېږې او که په پښو!؟ ته که ناست یې او که ولاړ، موسیقي خو اورې.
نوموړی دا څرګندونې داسې مهال کوي، چې تېره ورځ د طالبانو حکومت د ارشاد، حج او اوقافو وزارت مرستیال عزیزالرحمن منصور د ایران ملي سرود ته د نه درېدو له کبله د ایران له خلکو بښنه وغوښته.
د زدهکړو د برخې د فعال احمد فهیم عظيمي کورنۍ د طالبانو له حکومت غوښتي، چې نوموړی را خوشې کړي.
د نوموړي کورنۍ ویلي، چې د هغه د روحي او جسمي روغتیایي وضعیت په اړه زیاته اندېښنه لري.
د هغه کورنۍ ویلي، چې عظیمي د څه باندې ١١ میاشتو راهیسې په نامعلوم جرم د طالبانو حکومت سره زنداني دی.
په ورته وخت کې د بخښنې نړيوال سازمان هم ویلي، چې احمد فهیم عظيمي هېڅ جرم نه دی کړی او رواني وضعیت یې هم مخ په خرابېدو دی؛ نو د طالبانو حکومت دې نوموړی ژر تر ژره او پرته له کوم قید او شرطه خوشې کړي.
د یادونې ده چې د طالبانو حکومت احمد فهیم عظیمي او ملګری یې صدیقالله افغان د ۲۰۲۳م کال د اکټوبر په ۱۷مه په کابل کې له خپل دفتره ونیول، افغان د روان کال په حمل میاشت کې بېرته د طالبانو له بنده خوشې شو، خو احمد فهيم عظيمي لا هم په زندان کې دی.
د ایران د بهرنیو چارو وزیر سید عباس عراقچي ویلي، چې اسرائیل به په لبنان او غزه کې د خپلو جنایتونو ځواب ترلاسه کړي.
عباس عراقچي د ملګرو ملتونو د عمومي اسامبلې په ۷۱مه غونډه کې د ګډون لپاره امریکا ته تللی، ویلي چې اسراییل به په منځني ختیځ کې د کړکېچ او جګړې په زیاتولو سره خپلو موخو ته ونه رسیږي.
بل لورته د ملګرو ملتونو ویاند سټیفان دوجاریک هم ویلي، چې ملګري ملتونه لبنان کې د اسرائیلو له بریدونو وروسته منځني ختیځ کې د جګړو زیاتېدو احتمال ته اندېښمن دي.
د کرکټ په نړۍ کې رحمنالله ګُربز د نړۍ درېیم لوبغاړی شو چې په نړویوالو یو ورځنیو سیالیو کې یې له ۲۳ کلنۍ مخکې اووه سلیزې ترسره کړې دي.
ټایمزافانډیا ورځپاڼې ویلي، چې رحمن الله ګُربز د اووه سلیزو په بشپړېدو له ویرات کوهلي سره ځان مساوي او درېیم مقام ته یې ځان ورسوه.
ګربز د سوېلي افریقا پر وړاندې تېرې شپې لوبه کې په ۱۱۰ توپونو د ۳ شپږیزو او ۱۰ څلورېزو په وهلو سره ۱۰۵ منډې وکړې او په نړیوالو یو ورځنیو سیالیو کې یې اوومه سلیزه جوړه کړه.
هېره دې نه وي، چې کیونټون ډیکوک او سچېن ټنډولکر له ۲۳ کلنۍ مخکې په اته-اته سلیزو په لومړي او دویم او ګُربز درېیم مقام کې ځای لري.
حزب الله په یوه تازه خپاره کړي بیان کې د خپل د عملیاتو د مشر “ابراهیم عقیل” وژنه تایید کړه.
د حزب الله ډلې مشر سيد حسن نصرالله وايي دغه ستر، قوي او بې ساری برید به زمونږ په مبارزې اغیز ونه کړي.
نوموړي د ابراهیم عقیل وژنه یوه نه جبرانیدونکې ضایع بللې او د غچ اخیستو خبرداری یې ورکړی.
اسرائیلي ځواکونو پرون اعلان وکړ چې د حزب الله ډلې یو مهم قوماندان ابراهیم عقیل چې د بې پیلوټه الوتکې هدفي برید کې وژلی دی.
پداسې حال کې چې د ملکي هوایي چلند د پخواني مشر محمود شاه حبیبي کورنۍ ادعا کوي چې طالبانو نوموړی د القاعده شبکې ته سپارلی خو د طالبانو حکومت وایي، محمود شاه حبیبي له دوی سره نشته او پدې اړه شوې ټولې ادعاوې ناسمې دي.
د طالبانو حکومت ویاند ذبیح الله مجاهد حماسه میډیا ته وویل:« دا خبره سمه نده او محمودشاه له لومړي سره زموږ سره نشته.»
خو د محمود شاه حبیبي کورنۍ ویلي، چې دوی ته رسېدلو معلوماتو کې ویل شوي چې محمود شاه حبیبي د ايمن الظواهري ځای امريکا ته افشا کړی وو او د امریکا په بې پیلوټه برید کې ووژل شو.
طالبانو د ظواهري تر وژنې وروسته محمود شاه حبیبي او د هغوی د دفتر نور کارکوونکي ونیول چې د لنډې مودې وروسته نور کارکوونکي خوشې شول؛ خو محمودشاه د دوی په بند کې وو او اوسمهال یې د القاعده شبکې ته سپارلی دی.
په ورته وخت کې د چارو یو شمېر شنونکي وایي، چې طالبانو د اسامه بن لادن پر ساتلو د خپل تېر رژیم د بایللو خبره کوي؛ خو اوس څنګه یو افغان مسلمان یوې بهرنۍ وسله والې ډلې ته سپاري؟
دوی د پوښتنې په شکل ویلي، چې ایا د اسلامي نظام دعوه کوونکي داسې کولای شي؟
په خیبرپښتونخوا کې د وسله والو په جلا جلا بریدونو کې اته پاکستاني پوځیان وژل شوي دي.
پاکستاني رسنیو ویلي، چې د شمالي وزیرستان په لاده سيمه کې د پاکستاني پولیسو پر یوې پوستې د وسله والو په برید کې ۷ پوځیان وژل شوي.
په ورته وخت کې په بنو سیمه کې د پاکستان د استخباراتو یو کارکوونکی هم د وسله والو له لوري وژل شوی او ورور یې ټپي دی.
د يادونې ده، چې په دې وروستيو کې د پاکستان په بلوچستان او خيبر پښتونخوا کې بریدونو زور اخیستی.
د هېواد پخواني ولسمشر حامد کرزي ټولو هېوادوالو ته د افغانستان او جنوبي_افریقا ترمنځ د درې پنځوس آوریزه کرکټ سیالیو د بریا مبارکي ورکړې ده.
ښاغلي کرزي په خپله ایکسپاڼه لیکلي، چې د افغان کرکټ ملي لوبډلې دوهمه پرلاپسې پیاوړي بریا او د سریز د جام د گټلو له امله د کرکټ د ملي ټیم لوبغاړو او ټولو هیوادوالو ته مبارکي وایم.
نوموړي افغان لوبغاړو ته د لا ډیرو بریاوو هیله څرګنده کړې ده.
د یادونې ده، چې بیګا شپه افغان لوبډلې په ستر توپیر له سویلي افریقا لوبډلې لوبه وګټله او د یو ورځنیو سیالیو لوبلړۍ یې په خپل نوم کړه.