د جمهوریت پر مهال د کورنیو چارو وزارت ارشد مشاور محمد ادریس ستانکزي د مقاومت په نوم جبهې یو ټویټ ته د تمسخر په ډول لیکلي، که مقاومت جبهه نه وی، امریکا به تباه وه.
یادې جبهې د سپټمبر یوولسمې پر امریکا شوي برید په اړه خبرداری ورکړی او ویلي یې دي، چې ښایي یو وار بیا پر امریکا دا ډول برید وشي.
ستانکزي دغه ټویټ ته غبرګون کې ویلي، ستاسې له خبرداري مننه او که دا جبهه نه وي، نو امریکا به تباه وه.
د البانیا پلازمېنې تېرانا کې د افغان ښځو پر وړاندې د طالبانو حکومت ځپونکو فرمانونو د غندنې لپاره د افغانو ښځو له لوري یوه لویه درې ورځنۍ ناسته بلل شوې، چې د البانیا د بهرنیو چارو وزېرې اېګلي حسني او نورو اورپایي دیپلوماتانو هم برخه اخیستې ده.
په غونډه کې د پخوانۍ ولسې جرګې استازې فوزیې کوفي ویلي چې د یوې تګلارې له مخې طالبان د بشري حقونو پر وړاندې له سرغړونې څخه حساب ورکولو ته چمتو او په کور دننه د افغانو ښځو اقتصادي وضعیت ښه کړي.
په پام کې ده چې د ناستې په پای کې به نړیوالې ټولنې ته یو غوښتنلیک هم وړاندې شي.
د طالبانو حکومت د ملي دفاع سرپرست وزیر مولوي یعقوب مجاهد ویلي، چې غرب او پلویان یې اوس مهال د دوی پر وړاندې سړه جګړه پرمخ وړي.
نوموړي د طالبانو د ملي دفاع وزارت اړوند ویاندویانو سیمینار ته خبرو کې ویلي، چې لویدیځ بېلابېل پروګرامونه په کار اچولي، ترڅو خپل کلتور په افغانانو ومني.
هغه سپارښتنه کړې چې مسؤلین او ویاندویان باید هوښیار اوسي.
دغه کنفرانس ته د طالبانو حکومت ګڼو نورو چارواکو هم بېلابېلې ویناوې کړې دي.
په داسې حال کې چې د طالبانو حکومت افغانستان کې د نشهیي توکو پر کښت، پېر او پلور بندیز لویه لاسته راوړنه بولي؛ تازه د نړیوال کړکیچ ګروپ په یوه راپور کې ویلي چې د طالبانو د واکمنۍ پر مهال په افغانستان کې تولید شوي مخدره مواد اوس هم د نړۍ بازارونو ته صادریږي.
راپور کې راغلي، د کوکنارو یو شمېر کروندګرو په دې برخه کې د طالبانو له حکومت سره کلکه مبارزه کوي.
د دوی په باور، ان کندهار کې هم کروندګرو نشهیي توکي کرلي دي.
د یادونې ده چې واک ته د طالبانو حکومت له رسېدو وروسته افغانستان کې د نشه یي توکو به کښت بندیزونه زیات شوي دي.
حماس غورځنګ ویلي، چې دوی له نویو شرایطو پرته، د سولې طرحې پر پخوانیو تړونونو له اسرائیل سره اوربند ته چمتو دي.
دوی ویلي، په دې اړه یې له منځګړو لوریو سره هم خبرې پیل کړې دي.
دغې ډلې یوه اعلامیه کې ویلي، د هیڅ لوري نوی شرط ورته د منلو نه دی.
د امریکا د بهرنیو چارو وزیر انتوني بلنکین له خپل برېتانیوي سیال ډېویډ لېمي سره یو ځای کییف ته تللی.
رویټرز راپور ورکړی چې په دغه سفر کې اوکراین ته د وسلو استولو او د روسیې د بریدونو د مخنیوي په برخه کې د لویدیځ له لوري د لا زیاتې مرستې او همکارۍ په اړه بحثونه شوي دي.
دواړو له زیلنسکي سره په لیدنه کې ویلي، چې روانه جګړه کې به د لویدیځ مرستې و ارزوي.
دا په داسې حال کې ده، چې اوس مهال د اوکراین په دونتسک او یو شمېر نورو سیمو کې جګړو زور اخیستی.
د افغان سولې لپاره د امریکا پخواني ځانګړي استازي زلمي خلیلزاد ویلي، چې پاکستان باید وڅارل شي چې په کوم لوري روان دی او په دې باید غور وشي چې څه ډول چلند ورسره وشي.
خلیلزاد په خپله اېکسپاڼه د پوښتنې په شکل لیکلي چې ایا پاکستان د بې ثباتۍ پر لور روان دی؟
نوموړي ویلي چې پاکستان کې د ټي ټي پي او بلوڅ ملتپالو لخوا د بریدونو له امله داخلي تاوتریخوالی مخ په زیاتیدو دی او پر دې سربېره د هېواد امنیتي ځواکونه پر سیاسي مخالفینو بریدونه کوي او حتی د ولسي جرګې د ۷ غړو د نیولو لپاره تللي دي.
خلیلزاد دغه راز ویلي، چې جنرال اصف منیر د پاکستان حکومت چلوي او دې چارې یې د ولس مایوسي زیاته کړې ده.
هغه ویلي، چې داعش په بې ثباته بلوچستان کې داسې سیمې موندلې دي چې د استراحت او روزنې لپاره یې د اډو په توګه کاروي.
خلیلزاد دا هم ویلي چې پاکستان له ژورو اقتصاد ستونزو سره هم مخ دی.
نوموړي دغه راز زیاته کړې، چې د متحده ایالاتو نوې اداره باید بیاکتنه وکړي چې پاکستان په کوم لوري روان دی او په دې غور وکړي چې کوم ډول دریځ غوره کړي.
د طالبانو حکومت د دفاع وزارت لوژستیک رئیس عبدالبصیر صابري چې یوه اونۍ وړاندې یې د روسیې له خبري اژانس ټاس سره په مرکه کې ویلي و چې د طالبانو حکومت پلان لري چې له روسیې څخه د هوايي دفاع تجهیزات واخلي، له دندې ګوښه شوی دی.
یو مکتوب چې ټولنیزو رسنیو کې لاس په لاس کېږي، د عبدالبصیر صابري د استعفاء یادونه پکې شوې ده.
په دغه فرمان کې چې د طالبانو د دفاع د وزیر ملا یعقوب له خوا لاسلیک شوی، راغلي چې له دې وروسته به مولوي عبدالقیوم الیاس د طالبانو حکومت د دفاع وزارت د لوژستیک رئیس په توګه کار کوي.
ویل کېږي چې مولوي عبدالبصير صابري، چې د قاري صلاح الدين ايوبي نږدې کس او د فارياب ولايت اوسېدونکى دى، د طالبانو حکومت له خوا د غير مسوولانه څرګندونو په تور له دندې ګوښه شوى دى.
د یادونې ده چې په ټاس خبري اژانس کې د عبدالبصیر صابري د مرکې له خپرېدو وروسته د طالبانو حکومت د دفاع وزارت ویاند عنایت الله خوارزمي په یوه خبرپاڼه کې وویل، چې دغې ډلې له روسیې سره د هوايي دفاعي تجهیزاتو د پېرلو په اړه خبرې نه دي کړي.
د ملي مقاومت په نوم جبهې ادعا کړې چې کابل کې یې څلور طالب سرتېرو ته مرګ ژوبله اړولې ده.
یادې جبهې ویلي چې څه کم اته بجې یې د کابل ښار د پنځمې حوزې اړوند په «دیوانبیګي» سیمه کې د طالب سرتېرو یو مرکز په نښه کړو.
دغې جبهې ویلي، چې په دغه برید کې یې دوه تنه طالب استخباراتي کارمندان وژلي او دوه نور یې ټپیان کړي دي.
د طالبانو حکومت تر اوسه په دې اړه څه نه دي ویلي.
د تېر جمهوري نظام د ولسي جرګې غړی کمال ناصر اصولي د ټاپي پروژې د چارو بیا پیل په اړه خوښي ښودلې.
هغه ویلي، د ناتمامو فصلونو پوره کول ښه کار دی.
اصولي هیله ښودلې چې د کونړ پر سیند هم بندونه جوړ شي.
نوموړي دغه راز تمه ښودلې چې نور داسې څوک پیدا نشي چې د ملي پروژو د پلي کولو مخنیوی وکړي.
د یادونې ده چې نن د افغانستان خاوره کې د ټاپي پروژې عملي چارې پیل شوې.