د طالبانو حکومت د ارشاد، حج او اوقافو وزارت ویلي، په کابل کې یو چینايي تبعه «منخای شیاء» چې ۵۱ کاله عمر لري، په خپله خوښه د اسلام دین قبول کړی دی.

د وزارت په وینا، نوموړی چې له څه مودې راهیسې افغانستان کې اوسېده، د اسلام د حقانیت له درک او له مسلمانانو سره د تعامل وروسته د اسلام دین منلو پرېکړه وکړه او د همدې لپاره یې وزارت ته مراجعه وکړه.

د یاد وزارت په وینا، هغه وروسته د پل خشتي جامع جومات ته یوړل شو، د شهادت کلمه ورته تلقین شوه او د «محمد بلال» اسلامي نوم پرې کیښودل شو.

وزارت ویلي، نوموړي ته د اسلام بنسټیز اصول، عقیده او عبادات هم ور وښودل شول، څو خپل نوی اسلامي ژوند د سمو دیني لارښوونو پر بنسټ پیل کړي.

د طالبانو حکومت د کورنیو چارو وزارت وایي، امنیتي او کشفي ځواکونو یې د تورخم په دروازه کې له پاکستانه افغانستان ته د قاچاق کېدونکو وسلو او مهماتو یوه ستره جوپه کشف او ضبط کړې ده.

د وزارت د معلوماتو له مخې، دغه وسلې او مهمات د افغان کډوالو په دوو موټرو کې ځای پر ځای شوي وو چې د ځانګړو عملیاتو پر مهال ونیول شول.

چارواکي وايي، په نیول شویو توکو کې ۵۲۵ میله بېلابېل ډوله وسلې او مهمات شامل دي چې ۲۷ زره فایره مرمۍ، ۲۰۰ بنډله پرمیکاټ، لس میله ام‌فور ټوپکونه، لس لېزرونه، لس دوربینونه، ۱۷ میله ټي‌ټي‌کوف، یو میل کلاشینکوف او ۴۹۷ میله بېلابېل ډوله توفنګچې پکې شاملې دي.

د کورنیو چارو وزارت زیاتوي، د دغو وسلو او مهماتو د لېږد په تړاو دوه تنه نیول شوي او دا مهال تر څېړنو لاندې دي.

د ازبېکستان د بهرنیو چارو وزیر بختیار سعیدوف، د طالبانو حکومت د بهرنیو چارو وزیر امیرخان متقي سره ټیلیفوني خبرې کړې دي.

سعیدوف په خپل اېکس حساب کې لیکلي چې له متقي سره یې د دوه‌اړخیزو اړیکو پر مهمو موضوعاتو خبرې کړې او په ځانګړي ډول یې د اقتصادي همکاریو پر پراختیا او په لومړیتوب لرونکو برخو کې د عملي همکارۍ پر پیاوړتیا ټینګار کړی دی.

دواړو لوریو همداراز د ښه ګاونډیتوب د اړیکو د ټینګښت او د سیمه‌ییز نښلون د ودې په اړه خپله ګډه ژمنتیا تازه کړې ده.

د جاپان د بهرنیو چارو وزارت په ایران کې له خپلو وګړو غوښتي چې د امنیتي وضعیت د خرابېدو او د امریکا د احتمالي بریدونو د اندېښنو له امله ژر تر ژره دغه هېواد پرېږدي.

وزارت خبرداری ورکړی چې که وضعیت نور هم ترینګلی شي، ښايي هوايي حریم او هوايي ډګرونه وتړل شي.

جاپان همداراز اعلان کړی چې د سیمه‌ییزو ګواښونو له امله یې په ۵۴ هېوادونو کې خپلو اتباعو ته امنیتي سپارښتنې صادرې کړې دي.

د جاپان حکومت له خپلو وګړو غوښتي چې په منځني ختیځ کې امنیتي معلومات په دوامداره توګه تعقیب کړي او د امریکا پوځي تاسیساتو ته له نږدې کېدو ډډه وکړي.

بل لورته استرالیا هم له خپلو وګړو غوښتي چې ژر تر ژره ایران پرېږدي.

اسمارت تراولر ویب‌پاڼې په یوه تازه خبرداري کې ویلي چې د منځني ختیځ او ایران امنیتي وضعیت نا اټکل کېدونکی دی او د نظامي نښتې خطر موجود دی چې کېدای شي سیمه‌ییز او نړیوال سفرونه ګډوډ کړي.

د استرالیا حکومت یو ځل بیا خپلو اتباعو ته سپارښتنه کړې چې ایران ته سفر ونه کړي او که امکان ولري، له دغه هېواد څخه ژر ووځي.

په خبرپاڼه کې ویل شوي چې تجارتي الوتنې تر اوسه روانې دي، خو د هوايي حریم د ناڅاپي بندېدو احتمال شته.

د استرالیا حکومت د ایران امنیتي وضعیت ډېر بې‌ثباته بللی او ویلي یې دي چې د دغه هېواد اتباع او دوه‌تابعیته کسان د نیول کېدو له لوړ خطر سره مخ دي.

همدارنګه په ایران کې د استرالیا سفارت فعالیتونه ځنډول شوي او قونسلي خدمات ډېر محدود شوي دي.

استوګنو کسانو ته سپارښتنه شوې چې د اوږدې مودې لپاره خوندي ځای کې پاتې شي او د اوبو، خوړو او درملو ذخیره ولري.

افغان کرېکټ بورډ اعلان کړی چې د سریلانکا کرېکټ ملي لوبډلې سره به د مارچ میاشتې په دویمه لسیزه کې په متحده عربي اماراتو کې شل اوریزه او پنځوس اوریزه لوبلړۍ ترسره کړي.

د کرېکټ بورډ په وینا، د دې سیالیو لپاره د ملي لوبډلې تمریني کمپونه په خوست کې پیل شوي دي.

په دغو تمریناتو کې د ملي لوبډلې ۱۸ لوبغاړي برخه لري او ټاکل شوې چې د فبرورۍ تر ۲۶مې پورې دوام وکړي.

د خیبر پښتونخوا، د بنو ولسوالۍ سرا درګه سیمه کې، په ځانمرګي برید کې درې امنیتي چارواکي وژل شوي دي.

د رسمي سرچینو د معلوماتو له مخې، په وژل شویو کسانو کې د ډګروال رتبې یو افسر هم شامل دی.

ویل کېږي چې د چاودېدونکو توکو بار موټرسایکل د ماین ضد زغروال موټر ته څېرمه چاودنه کړې ده.

تر اوسه کومې ډلې د دې برید مسوولیت نه دی منلی.

د خیبر پښتونخوا، د بنو ولسوالۍ سرا درګه سیمه کې، یو ځانمرګي بریدګر د پوځیانو کاروان هدف ګرځولی.

د راپورونو له مخې بریدګر پر موټر سایکل سپور و او هغه مهال یې تړلو چاودیدونکو ته چاودنه ورکړه چې د امنیتي ځواکونو موټر د ګشت په حال کې و.

بریدګر مستقیم پر پوځیانو ورغلی او چاودنه یې کړې.

تر اوسه د مرګ ژوبلې په اړه کره معلومات نه دي ترلاسه شوي.

د امریکا د بهرنیو چارو پخواني وزیر، مایک پمپئو فاکس نیوز سره خبرو کې ویلي چې د ایران حکومت له وجودي ګواښ سره مخ دی او د خپلې بقا لپاره هر ډول اقدام ته چمتو دی.

پمپئو ویلي چې د ایران حکومت د لوېدیځ په څېر موضوعاتو ته نه ګوري او دا مسله د سوداګریزې معاملې په توګه نه، بلکې د حکومتي بقا د موضوع په توګه ارزوي، ځکه چې دغه نظام له شاوخوا ۴۷ کلونو راهیسې دوام لري.

نوموړي ادعا کړې چې د ایران مشران د خپل نظام د ساتلو لپاره حتی د خلکو قربانۍ ته هم چمتو دي او زیاته کړې چې په وروستیو ۳۰ ورځو کې په ایران کې لسګونه زره کسان وژل شوي دي، خو د دې ادعا لپاره یې مشخص شواهد وړاندې نه کړل.

پمپئو همدارنګه ویلي چې ډونالډ ټرمپ او اسرائیلي چارواکي په دې باور دي چې دا مهال ایران په کمزوري وضعیت کې دی.

هغه د سیمې د امریکایي پوځي حضور یادونه کړې او زیاته کړې چې ښایي دا تحرکات د واشنګټن د مطلوبې پایلې سبب شي.

نوموړي په پای کې ویلي چې د ایران خلک او نړۍ مستحق دي چې د ده په وینا استبداد تاریخ ته وسپارل شي.

د پاکستان د خیبر پښتونخوا ایالت په اورکزي سیمه کې د وسلوالو دوو ډلو ترمنځ نښته شوې چې له امله یې څو کسانو ته مرګ ژوبله اوښتې ده.

د راپورونو له مخې، د داعش خراسان اړوند وسله‌وال د تحریک طالبان پاکستان له غړو سره په شیخان سیمه کې مخامخ شوي او ترمنځ یې سخته وسله‌واله جګړه شوې ده.

ویل کېږي شخړه د سیمې پر نفوذ او مالي سرچینو د اختلاف له امله رامنځته شوې وه.

په جګړه کې د داعش د یو قومندان په ګډون درې غړي وژل شوي.

بل لور ته د تحریک طالبان پاکستان یو وسله‌وال کس هم وژل شوی او څو نور ټپیان شوي دي.