د ملي راډیو تلویزیون پخوانی مشر اسماعیل میاخېل وایي، پاکستان هېڅ حق نه لري چې د هرې پلمې له مخې د افغانستان کلي او کورونه بمبار کړي.

ښاغلي میاخېل د تېرې شپې برید ته په اشارې سره ویلي چې د روژې په مبارکه میاشت کې د لسګونه ملکي وګړو وژل کېدل یو غیرانساني عمل او د افغانستان د ملي حاکمیت ښکاره نقض دی.

هغه ادعا کړې چې له هغه وخته راهیسې چې پاکستان خپل نیابتي ځواکونه د طالبانو په بڼه پر افغانستان وتپل، دا د افغانستان پر خاوره شپږم برید بلل کېږي.

د نوموړي په وینا، د پاکستان لاسوهنه او طالبان د روان وضعیت او فاجعې اصلي لاملونه دي.

میاخېل ټینګار کړی چې د افغانستان ولس نه بهرنی تېری مني او نه هم داخلي افراطیت، او د هر ډول مداخلې پر وړاندې به خپل دریځ ولري.

پخواني طالب چارواکي، سید اکبر اغا، د پاکستان له لوري په افغانستان کې پر ملکي کورونو د وروستیو هوايي بریدونو په اړه سخت غبرګون ښودلی دی.

هغه دا کړنې د نړیوالو قوانینو او بشري اصولو سرغړونه بللې او ویلي یې دي چې دا بزدلانه او غیرانساني اقدام و.

سید اکبر اغا زیاته کړې، که چېرې ملګري ملتونه رښتینی او خپلواک واک ولري، نو باید د دغو بریدونو عاملین د نړیوال قانون له مخې محاکمه شي او حساب ورڅخه وغواړي.

هغه همدارنګه ټینګار کړی چې افغانان د خپل هېواد د دفاع بشپړ حق لري او د مناسب غبرګون ښودلو بشپړ حق لري.

د ننګرهار پخواني والي ضیاالحق امرخېل ویلي، چې پر افغانستان د پاکستان وروستي بریدونه، چې په ننګرهار او پکتیکا ولایتونو کې د بې‌ګناه ماشومانو، ښځو او نورو ملکي خلکو د شهادت لامل شوي، د درد آخري حد دی.

امرخېل په خپله ایکس پاڼه لیکلي، چې دغه کړنې نه یوازې د پاکستان پر رژیم د افغانانو کرکه زیاته کړې، بلکې د افغانانو ترمنځ يې هم یوالی پراخ کړی دی.

هغه ټینګار کړی، پاکستان چې د حماس د بې وسلې کولو تازه پروژه اخیستې، د کورنیو ستونزو، پورونو، امنیتي ناکامیو او د خلکو خدمتونو کې د ناکامۍ د پټولو لپاره دغه ډول غیرانساني کړنې ترسره کوي.

نوموړي په ټولو افغانانو غږ کړی چې د پاکستاني رژیم تېروتنې باید په واضح ډول وغندل شي او ویلي یې دي چې د افغانانو بې‌ساري کرکه به د هر ډول تجاوز په وړاندې غچ اخیستو ته لار هواره کړي.

د هیواد د پخواني ولسمشر حامد کرزی د دفتر رئیس کریم خرم ویلي، پر افغانستان د پاکستان وروستي هوايي بریدونه او د روژې په مبارکه میاشت کې د ملکي وګړو وژل له ذلت او قساوته ډک عمل دی او دا ډول کړنې د نړیوالو اصولو او بشري ارزښتونو ښکاره سرغړونه بلل کېږي.

نوموړي ویلي، څو ورځې وړاندې د خواجه محمد آصف څرګندونې چې ګواکې پاکستان په افغانستان کې د امریکا له لوري دوه ځله د «تشناب کاغذ» په توګه کارول شوی، دا پوښتنه راولاړوي چې څه تضمین شته څو دغه هېواد بیا د پردیو د سیاست وسیله ونه ګرځي.

هغه د بې ګناه هیوادوالو وژنه غندلې او دا یې د کمزورۍ ښکاره ثبوت بللی.

د مشرانو جرګې پخواني رییس فضل الهادي مسلمیار د ننګرهار او پکتیکا ولایتونو پر وړاندې د پاکستان له لوري ترسره شوي هوايي بریدونه په سختو ټکو غندلي دي.

مسلمیار ویلي چې په دغو بریدونو کې یو شمېر هېوادوال شهیدان او ټپیان شوي دي.

نوموړي شهیدانو ته د فردوس جنت او ټپیانو ته د عاجلې شفا دعا کړې او له زیانمنو کورنیو سره یې خواخوږي څرګنده کړې ده.

هغه ټینګار کړی چې دا ډول بریدونه د نړیوالو اصولو، قوانینو او د ملګرو ملتونو د تړونونو ښکاره سرغړونه ده او په هېڅ ډول د توجیه وړ نه ده.

د ده په وینا، په دغو بریدونو کې بې‌ګناه ملکي وګړي، جوماتونه او عامه ځایونه په نښه شوي چې یو نه بښونکی عمل او ستر جنایت بلل کېږي.

د مشرانو جرګې پخواني رییس زیاته کړې چې افغانانو تل د هر ډول یرغل پر وړاندې غبرګون ښودلی او خبرداری یې ورکړی چې د افغانستان پر ملي حاکمیت هر ډول تېری به بې ځوابه پاتې نه شي.

د هېواد پخواني ولسمشر حامد کرزي پر ننګرهار او پکتیکا ولایتونو د پاکستان وروستي هوايي بریدونه په کلکو ټکو وغندل او دا یې د افغانستان د ملي حاکمیت څرګند نقض وباله.

نوموړي په خپله ایکس پاڼه ویلي، پر ملکي سیمو ترسره شوي بریدونه د نړیوالو اصولو او د ښه ګاونډیتوب خلاف عمل دی، او ټینګار یې کړی چې دا ډول کړنې د سیمې ثبات ته زیان رسوي.

کرزي د بریدونو له امله د شهیدانو له کورنیو سره ژوره خواخوږي څرګنده کړه، ټپیانو ته یې د عاجلې روغتیا دعا وکړه او له پاکستانه یې وغوښتل چې د افغانستان په اړه پر خپلو پالیسیو بیاکتنه وکړي.

هغه یو ځل بیا پر پاکستان غږ وکړ چې د شخړو پر ځای د ښه ګاونډیتوب او متقابل درناوي لاره خپله کړي او د دواړو هېوادونو ترمنځ د باور فضا پیاوړې کړي.

د افغانستان د ملي مصالحې شورا پخواني مشر عبدالله عبدالله پر افغانستان د پاکستان له لوري د تېرې شپې ترسره شوي هوايي بریدونه په کلکه غندلي او دا یې د ژورې اندېښنې وړ بللي دي.

نوموړي په خپله ایکس پاڼه ویلي، دا ډول بریدونه د افغانستان د ملي حاکمیت او ځمکنۍ بشپړتیا ښکاره سرغړونه ده او کولی شي په سیمه کې بې‌ثباتي او کړکېچ نور هم پراخ کړي.

هغه ټینګار کړی چې د ملکي وګړو په نښه کول، بمبارد او تاوتریخوالی د ستونزو د حل لاره نه ده، بلکې د دواړو هېوادونو ترمنځ د شته اختلافونو د حل یوازینۍ اغېزمنه لار خبرې اترې او متقابل تفاهم دی.

ډاکټر عبدالله عبدالله له ښکېلو لورو غوښتي چې د تاوتریخوالي پر ځای د سیاسي او ډیپلوماتیکو لارو چارو ته مخه کړي، څو د سیمې ثبات او د خلکو امنیت خوندي شي.

د جمهوري نظام پر مهال د کورنیو چارو وزارت مرستیال جنرال خوشال سادات د پاکستان د وروستیو هوايي بریدونو په تړاو ویلي چې افغانان به د خپلو خلکو پر وړاندې ترسره شوي تېري ته حتمي ځواب ورکړي.

سادات په خپل اېکس کې لیکلي چې د پکتیکا بریدونه د شهباز هوايي اډې او د ننګرهار پېښه د پېښور هوايي اډې څخه پلان او عملي شوې ده.

نوموړي ټینګار کړی چې که څه هم افغانان پرمختللي وسایل او الوتکې نه لري؛ خو د انسانانو عزم، اراده او روحیه یې ژوندۍ ده او د دې بریدونو ځواب به ورکوي.

سادات دغه بریدونه د هېواد د خلکو پر وړاندې څرګند تجاوز بللی او خبرداری یې ورکړی چې افغانان به د خپلو خلکو د حقونو د دفاع لپاره له هېڅ اقدام څخه ډډه ونه کړي.

د طالبانو حکومت وايي، د ننګرهار ولایت د بهسودو ولسوالۍ اړوند د «ګردي کڅ» په سیمه کې د تېرې شپې په هوايي بریدونو کې لږ تر لږه ۱۷ ملکي وګړي وژل شوي او یو شمېر نور ټپیان دي.

د ننګرهار د امنیه قوماندانۍ وباند سید طیب حماد ویلي، چې وژل شوي کسان د یوې کورنۍ غړي دي او په هغوی کې د ښځو په ګډون۱۲ ماشومان هم شامل دي.

ویل کېږي چې له یادې پېښې یوازې دوه کسان ژوندي پاتې شوي دي.

د لومړنیو معلوماتو له مخې، په وژل شویو کې دغه کسان شامل دي: محمد (۱ کلن)، باسط (۵ کلن)، مروا (۶ کلنه)، میرعلم (۸ کلن)، نورعلم (۱۰ کلن)، افتاب (۱۰ کلن)، فخرعلم (۱۲ کلن)، شمس (۱۴ کلن)، شیر (۱۵ کلن)، خدیجه (۱۵ کلنه)، نازمه (۱۶ کلنه)، فریشه (۱۷ کلنه)، شراکت (۳۰ کلن)، بي‌بي روضه (۳۰ کلنه)، مهمنده د نزاکت مېرمن (۴۰ کلنه) او شهاب‌الدین (۸۰ کلن).

د معلوملتو له مخې، ۲۰ کلن ریاض الله په برید کې ټپي شوی او روغتیايي مرکز ته لېږدول شوی دی.

د طالبانو حکومت د ملي دفاع وزارت ویلي، د تېرو بریدونو په دوام یو ځل بیا پاکستاني پوځ د افغانستان د ختیځو ولایتونو ننګرهار او پکتیکا په څو ملکي سیمو هوايي بریدونه کړي دي.

د وزارت په خبرپاڼه کې راغلي چې یاد بریدونه پر ملکي هدفونو، د یوې دیني مدرسې او ګڼو کورونو ترسره شوي، چې له امله یې د ښځو او ماشومانو په ګډون لسګونه بې‌ګناه ملکي وګړي شهیدان او ټپیان شوي دي.

ملي دفاع وزارت دغه بریدونه د افغانستان د ملي حریم ښکاره نقض او «جنایت» بللی او ویلي یې دي چې دا عمل د نړیوالو قوانینو، د ګاونډیتوب اصولو او اسلامي ارزښتونو ښکاره سرغړونه ده.

وزارت ټینګار کړی چې د هېواد د ځمکنۍ بشپړتیا او د ولس د امنیت ساتنه یې شرعي او ملي مسؤلیت دی او خبرداری یې ورکړی چې د دغو بریدونو پر وړاندې به په مناسب وخت کې مناسب او حساب شوی ځواب ورکړل شي.

د خبرپاڼې له مخې، پر ملکي هدفونو او دیني مراکزو بریدونه د پاکستاني پوځ د استخباراتي او امنیتي ناکامۍ څرګند ثبوت دی او دا ډول تکراري بریدونه به د پاکستان کورنۍ ستونزې پټې نه کړي.