باوري سرچینو حماسه میډیا ته ويلي، چې طالبانو په کندهار کې د شیخ زاید رح روزنتون تړلی دی.
یاد روزنتون کې ۱۵۰۰ زدکوونکي وو چې مناسبه لیلیه او نورې اسانتیاوې یې هم درلودې.
سرچینې د دغه کار علت د طالب چارواکو له لوري هغه دلیل ښودلی، چې ګواکې په دغه ځای کې د دوی د ایډیالوژي خلاف خلک روزل کېږي او بدعت او کفریات پکې کېدل.
تر اوسه د شیخ زاید رح روزنتون مسؤلینو په دې اړه څه نه دي ویلي.
د بشري حقونو شورا وايي، طالبان د ښځو په زده کړو د بندیز له کبله د ښځو پر حقونو تېری کوي او په دې کار سره افغانستان ته لوی زیان رسوي.
دوی په یوه خپره کړې خبرپاڼه کې ویلي، چې د نجونو په زده کړو بندیز د ټولو افغانانو پر ژوند منفي اغېز کړی او د افغانستان لپاره هم په اقتصادي، ټولنیزو او نورو برخو کې ناوړه پایلې لري.
یادې شورا یو وار بیا په نړیوالو نیوکه کړې چې په دې برخه کې یې اغېزناک ګامونه نه دي پورته کړي.
د دوی په خبره، د طالبانو له لوري د جنستیي تبیعض له کبله نږدې یو نیم میلیون نجونې له زده کړو بې برخې دي.
د یادونې ده، چې تر درې کالو زیاته موده وشوه، چې په افغانستان کې نجونې له زده کړو منع شوې دي.
د پاکستان د بهرنیو چارو وزارت د دغه هېواد ملي سرود ته پېښور کې د افغانستان قونسلۍ د سر قونسل نه درېدل غندلي او دا یې یوه غیر دیپلوماتیکه کړنه ګڼلې ده.
د یاد وزارت ویاندې ممتاز زهرابلوڅ ویلي، چې په دې اړه یې اسلام اباد او کابل کې طالب چارواکو ته خپل جدي اعتراض وړاندې کړی.
بل لورته پېښور کې افغان قونسلګري وایي، چې سر قونسل محب الله شاکر په ملي سرود کې د موسیقي له کبله نه دی درېدلی.
د دوی په خبره، د شاکر هدف هیڅ وخت د پاکستان سپکاوی نه دی.
د امریکا د بهرنیو چارو وزارت ویاند میتیو میلر ویلي، چمتو نه دي چې له افغانستانه د وتلو په اړه کانګرس ته ځواب ووايي.
نوموړي ویلي، انتوني بلنکین ۱۴ ځلې د بهرنیو اړیکو کمیټې ته حاضر شوی او یو ځل یې په ځانګړې توګه د افغانستان په اړه جوړې شوې غونډې ته هم ځوابونه ویلي؛ خو نه پوهېږي چې کانګرس بیا ولې پر دغې موضوع بحث کول غواړي.
د یادونې ده چې تر دې وړاندې د کانګرس د بهرنیو اړیکو کمېټې بلنکین په دې اړه احضار کړی وو.
ساینس پوهان وایي، د ځمکې د مدار پر لور یوه سیاره را روانه ده، چې دوه میاشتې به د ځمکې له مدار سره وڅرخي او تر هغې وروسته به بیرته ځي.
کازموس ورځپاڼې لیکلي، دا سیاره ځمکې ته نږدې شوې؛ خو له ځمکې سره به ټکر ونه کړي..
دا سیاره د اګست په اوومه د تسلکوپ په واسطه په جنوبي افریقا کې کشف شوې.
یاده پي ټي۵ “۲۰۲۴” سیاره به په ۵۳ ورځو کې د ځمکې له مداره خپل حرکت بشپړ کړي.
د طالبانو حکومت لابیګر او د کابل امنیه قومندانۍ پخواني ویاند جنرال مبین پېښور کې د پاکستان ملی سرود ته د پېښور سرقونسل نه درېدو له کبله د پاکستانیانو غبرګون ته لیکلي، چې دوی په ديپلوماسي پوهېږي؛ خو دا د پنجاب ریاست له خوا د افغان ولس ځورونې ته خاموش احتجاج دی.
ښاغلي مبین دغه راز لیکلي چې په سیاسي لحاظ د کوه نور الماس کیسه له همدې پېښوره پیل شوه، بالاحصارونه د پېښور په زړه کې د جنګونو او ننګونو کارنامې بیانوي او که د ریاست جبر ته وکتل شي، نو د داسې ګاونډي مخ راپېژني چې د ګاونډیتوب یو اصل هم نه مني.
جنرال مبین دیني اړخ د دغه کار یو بل سبب ګڼلی دی.
وروسته تر هغې چې پېښور کې د طالبانو حکومت سر قونسل د پاکستان ملي سرود ته ونه درېد؛ نو دې کړنې د پاکستاني رسنیو او فعالانو غبرګونونه را پارولي.
دوی وایي، دا کار د پاکستان حیثیت او ملي سرود ته بې احترامي ده.
فعالانو د سرقونسل محبالله شاکر دا کړنه پاکستان ته توهین بللی دی.
د یادونې ده چې د طالبانو حکومت ملي سرود حرام ګڼي او افغانستان کې یې هم ورباندې بندیز لګولی.
د مقاومت په نوم جبهې د افغانستان امنیت په اړه د ملګرو ملتونو پر راپور نیوکه کړې.
دوی په یوه خپره کړې اعلامیه کې ویلي چې په دغه راپور کې د دوی ځینې کړنې له نظره غورځول شوي.
اعلامیه کې راغلي، یادې جبهې په تېرو دوه نیمو میاشتو کې تر سلو ډېر بریدونه کړي؛ خو راپور کې یوازې له ۵۳ پېښو یادونه شوې.
یادې ډلې دغه راز ویلي چې په تېرو دوه نیمو میاشتو کې یې ۱۰۷ بریدونه کړي چې ۱۴۹ طالب سرتېري یې وژلي او ۱۴۰ نور یې ټپیان کړي دي.
دوی دا راپور په افغانستان کې د موجودو واقیعتونو په اړه محافظه کارانه ګڼلی.
د لبنان بیروت کې د ایران سفیر مجتبی اماني او د حزب الله سلګونه غړي د یو سایبري برید په پایله کې ټپیان شوي دي.
د حزب الله غړي د یادې ډلې پیاوړي جنګیالي بلل کېږي، چې د اسرائیلو پر وړاندې ښه جنګي مخینه لري.
رویټرز د حزب الله ډلې د یو غړي له قوله ویلي، چې د دوی دا غلطي نه جبرانېدونکې ده.
د لبنان روغتیا وزارت همدا راز له ټولو روغتونونو هم غوښتي چې بیړنی وضیعت اعلان کړي او اماده اوسي.
د حماس د سیاسی دفتر پخوانی مشر خالد مشعل وايي، دوی له اسرائیل سره د اوربند لپاره هیڅ بېړه نه لري.
نوموړي ویلي، په هیڅ قیمت به د اوربند ترسره کېدو لپاره له خپلو غوښتنو په شاه نه شي.
مشعل زیاته کړې، سره له دې چې دغې جګړې فلسطین زیات ویجاړ کړی؛ خو دا هغه بیه ده، چې دوی یې د ازادۍ لپاره پرې کوي.
هغه ویلي، هغه فلسطینیان چې پر حماس نیوکه کوي؛ په اقلیتونو کې راځي.
د یادونې ده چې په روانه جګړه کې تر اوسه څه د پاسه ۴۱ زره فلسطینیان وژل شوي دي.