الجزیرې په یو راپور کې ویلي، چې د اسرائیلو پوځ اعلان کړی چې د لبنان د حزب الله مشر حسن نصرالله پرون په بیروت کې د دوی په برید کې وژل شوی دی.

تر دې مخکې اکسیوس خبري اژانس راپور ورکړی و چې په دې برید کې د لبنان د حزب الله د مشر مرکز په نښه شوی دی.

په همدې حال کې اسرائیلي رسنیو څو ساعته مخکې خبر ورکړ چې د حسن نصرالله لور زینب نصرالله په دغه برید کې وژل شوې ده.

د لبنان حزب الله تر اوسه په رسمي ډول د پلار او لور مړینه نه ده تایید کړې.

بل لورته رویټرز راپور ورکړی و چې حسن نصرالله له دغه بریدونو ژوندی وتلی.

اسرائیلي رسنیو خبر ورکړی، چې د حزب الله ډلې د مشر حسن نصرالله لور زینب نصرالله یې د تېرې شپې برید کې وژلې.

تر اوسه په دې اړه حزب الله ډلې څه نه دي ویلي.

د یادونې ده چې تېره شپه اسرائیل د حسن نصرالله پر استوګنځي برید کړی و، چې له کبله یې لسګونه کسان وژل شوي؛ خو حسن نصرالله ژوندی وتلی.

په ورته وخت کې د لبنان روغتیا وزارت ویلي، چې د بیروت په جنوب کې به روغتیایي مرکزونه د اسرائیل د بریدونو له کبله خالي کړي.

یاد وزارت د نورو سیمو له روغتونونو غوښتي، چې له عاجلو ټپیانو پرته نور ناروغان ونه مني.

د اسټرالیا د بهرنیو چارو وزیره پیني وانګ وایي، افغانستان کې پر ښځو بندیزونه د افغانستان راتلونکی زیانمنوي.

هغې د ملګرو ملتونو عمومي سرمشریزه کې ویلي، چې پر ښځو بندیز د دغه هېواد د پرمختګ مخه نیسي.

نوموړې زیاته کړې چې که هر ملت پرمختګ غواړي؛ نو باید د ژوند په ټولو اړخونو کې د خپلو ټولو خلکو ګډون ته لاره هواره کړي.

دا په داسې حال کې ده، چې المان، کاناډا، اسټرلیا او هالنډ د افغان ښځو د حقونو په اړه یوه خپره کړې اعلامیه کې ویلي، چې دوی به په دې اړه رسمي شکایت ثبت کړي.

د ترکمنستان د بهرنیو چارو وزیر رشید مرادوف وایي، د سیمې د ثبات لپاره باید له افغانستان سره همکاري وشي.

هغه د ملګرو ملتونو ۷۹یمې سرمشریزې کې د خبرو پرمهال ویلي، چې نړۍ باید د بشري ستونزو د حل لپاره د افغانستان له خلکو سره مرستې زیاتې کړې.

مرادوف همدا راز ویلي، چې دوی د ټاپي، نوري فایبر، ریل پټلۍ او نورو پروژو د تکمیل په برخه کې افغانستان سره همکاري ته دوام ورکوي.

د افغانستان په اړه د ایران، روسیې، چین او پاکستان د بهرنیو چارو وزیرانو څلور اړخیزه ناسته په نیویارک کې د ایران په کوربه توب جوړه شوې وه.

د ایران مهر خبري اژانس ویلي، چې دا غونډه د ایران، چین او روسیې د بهرنیو چارو وزیرانو او د پاکستان د دفاع وزیر په ګډون جوړه شوه.

یاد اژانس ویلي، چې په دې غونډه کې د سولې او ثبات د ودې لپاره له طالب چارواکو سره د اړیکو د همغږۍ په هڅو خبرې وشوې.

یاد اژانس ددغې غونډې په اړه نور جزیات نه دي ورکړي.

اطلاعاتو ته د لاسرسي نړۍ واله ورځ داسې مهال را رسېږي، چې ډېر شمېر خبریالان او رسنۍ شکایت لري چې لا هم اطلاعاتو ته د لاسرسي په برخه کې له ګڼو ستونزو سره لاس او ګرېوان دي.

یو شمېر خبریالانو د نوم نه ښودلو په شرط حماسه میډیا ته ویلي، چې اوسمهال اطلاعاتو ته لاسرسی ورته ډېر ستونزمن شوی او دوی دې چارې له ګڼو ستونزو سره مخ کړي دي.

دوی وایي، چې د طالبانو حکومت هغه معلومات رسنیو ته ورکوي، چې د دوی په ګټه وي او په هغو معلوماتو خبریالان ګواښي چې د دوی د پالیسۍ خلاف یا د ولس ریښتینی غږ په کې منعکس شوی وي.

دوی دغه راز زیاته کړې، چې افغانستان کې په ډېره ویره دوی خپل کارونه مخته وړي او که د طالبانو د حکومت خلاف یې کوم واقعیت بیان کړ؛ نو سمدستي په مرګ ګواښل کېږي او یا هم زندان ته وړل کېږي.

اسرائیلي ځواکونو د لبنان په پلازمېنه بیروت کې یې د حزب‌الله مرکز په نښه کړی.

د اسراییلو د پوځ ویاند دانیل هګاري ویلي، چې د دوی ځواکونو د حزب‌الله مرکزي دفتر چې د بیروت تر هستوګنو ودانیو لاندې و، هدف وګرځاوه.

په حزب‌الله پورې تړلې المناره شبکې خبر ورکړی چې په دغو بریدونو کې څلور ودانۍ ویجاړې شوي دي او ګڼو خلکو ته یې مرګ ژوبله اړولې ده.

بل لورته اسراییلي شبکو ویلي چې د دغو بریدونو هدف د ایران له ملاتړ برخمن د حزب‌الله ډلې مشر حسن نصرالله و.

په ورته مهال بیا رویټرز خبري اژانس ته ځينو سرچینو ویلي، چې حسن نصرالله له دې بریدونو روغ وتلی دی.

د پښتون ژغورنې غورځنګ د کراچۍ څانګې پر مشر نورالله ترین پاکستاني پوځیانو ډزې کړې.

د یاد غورځنګ غړو ویلي، پر ترین مخامخ ډزې شوې؛ خو نوموړی ترې روغ وتلی.

بل لورته د یاد غورځنګ د رهبرۍ غړي عبدالصمد ویلي، چې د پاکستان حکومت د اکتوبر ۱۱مې قامي جرګې د ګډوډولو هڅه کوي.

د هېواد د پخواني ولسمشر ډاکټر نجیب الله د مړینې د ۲۸ تلین په مناسبت په یوه پیغام کې د هغه مېرمنې فتانه نجیب ویلي، چې ډاکټر نجیب الله د خپلې ولسمشرۍ پر مهال تل ټولنه کې د ښځو پر سواد او پوهاوي ټینګار کاوه.

اغلې فتانه نجیب ویلي، چې ډاکټر نجیب الله د اساسي حقونو او انساني کرامت تر پښو لاندې کولو سره د طالبانو له لوري ووژل شو.

نوموړې دغه راز ویلي، چې نړۍواله ټولنه د زده کړو او کار په برخه کې باید د ښځو پر مشروع غوښتنو ټينګار وکړي.

د یادونې ده، چې ۱۸ کاله وړاندې د ۱۹۹۶ کال د سپټمبر په ۲۷ نېټه طالبانو د لومړي ځل لپاره کابل ونیوه او کابل ته له دننه کېدو وروسته یې پخوانی ولسمشر ډاکټر نجیب الله او د هغه ورور شاپور احمدزی ووژل او جسدونه یې په عام محضر کې را ځوړند کړل.

‏د طالبانو حکومت متحده عربي اماراتو ته د پخواني ولسمشر حامد کرزي د سفر مخنیوی کړی.

ټاکل شوې وه، چې پخوانی ولسمشر حامد کرزی نن اماراتو ته ولاړ شي، خو طالبانو نوموړي ته د سفر اجازه ورنه کړه.

یوې باخبره سرچینې حماسه میډیا ته ویلي چې د کرزي د سفر د مخنیوي امر له کندهاره شوی او کابل یوازې د نوموړي غوښتنلیک د طالبانو د مشر دفتر ته لیږلی دی.

د یادونې ده، چې پخوانی ولسمشر له دې پخوا هم له ورته برخلیک سره مخ شوی دی.

د طالبانو حکومت له واک ته له رسیدو راهېسې د کرزي دفتر له شپیتو ډېر ځلي د سفر اجازه غوښتې ده، چې یې غوښتنه تر ډېره رد شوې ده.
د کرزي د سفر مخنیوې داسې مهال کیږي، چې طالبانو تازه د سیاسي چارو کارپوه جاوید کوهستاني، د ولسي جرګې پخوانی غړی شاپور حسینزوی او طالب پلوه مولوي عبدالسمیع زنداني کړي دي.