د بلوچستان د نوشکي ولسوالۍ اړوند سرحدي سیمه کې د افغان طالبانو او پاکستاني پوځیانو ترمنځ نښته شوې ده.
په دې اړه طالبانو څه نه دي ویلي، خو پاکستاني لوري یو شمېر رسنیو ته تائید کړې، چې طالبانو ته یې مرګ ژوبله اړولې.
دا جګړه په داسې حال کې کېږي، چې تېره ورځ د طالبانو حکومت په پاکستان کې وروستی تاوتریخوالی د اندېښنې وړ بللی وو.
دوی ویلي وو، چې دا کړکېچ به سیمې ته هم ګواښ پېښ کړي.
د پاکستان د کراچۍ هوايي ډګر مخې ته د تېرې شپې په برید کې دوه چینايي وګړي وژل شوي دي.
اسلام اباد کې د چین سفارت تائید کړې، چې د دوی دوه وګړي وژل شوي او یو بل ټپي شوی دی.
د چین له سفارت څخه په خپره شوې خبرپاڼه کې دا برید ترهګریز بللی شوی دی.
خبرپاڼه کې د پاکستان له حکومت څخه غوښتل شوي چې په دې اړه پلټنې وکړي.
ددغه برید مسولیت مجید بریګیډ ډلې منلی دی.
د پاکستان په کراچۍ ښار کې د تیرې شپې د ځانمرګي برید مسولیت بلوچ لبریشن آرمي (مجید بریګیډ) ډلې منلی دی.
دغه وسله والې ډلې په یوې اعلامیې کې ویلي برید هغه مهال رامنځته شو چې لوړپوړی چینایي پانګوال او انجینران د کراچۍ د جناح هوایي ډګر څخه د وتلو په حال کې وو.
ویل کېږي چې په دغه چاودنه کې دوه چینایي وګړي وژل شوي او اته تنه نور ټپیان شوي دي.
بل طرف ته پاکستان کې د چین سفارت ددغه برید په اړه له پاکستان د پلټنو غوښتنه کړې ده.
د پخواني ولسمشر اشرف غني ویاند او د کورنیو چارو د پالیسۍ مرستیال صدیق صدیقي په پاکستان کې د پښتون ژغورنې غورځنګ پر فعاليتونو د بنديز په اړه په پښتنو افغان سیاستوالو نیوکه کړې.
ښاغلي صدیقي په ایکسپاڼې دغه پښتانه افغان سیاستوال مخاطب کړي او ورته یې لیکلي:« عوام فریبي او د خلکو تیرایستل بس دی، باید یوازې د افغانستان په اړه فکر وشي او د یوې داسې سیاسي حل لارې په لټه کې شئ چې خلک له طالبانو خلاص کړئ.»
صدیقي ویلي د افغانستان بحران ترهغه ژور دی چې، افغان سیاستوال یې فکر کوي.
جمهوري نظام کې د ننګرهار والي ضیاءالحق امرخیل د خیبر قامي لویه جرګه د پښتنو لپاره برخلیک ټاکوونکې بللې.
هغه ویلي، که دا جرګه کامیابه شي؛ نو په کوزه پښتونخوا کې به د پښتنو نسل وژنه پای ومومي.
هغه دغه راز هیله څرګنده کړې چې په ټوله نړۍ کې د منظور پښتین غږ بدرګه شي.
تر دې وړاندې هم ګڼ شمېر سیاسونو او ګوندونو له دغې جرګې ملاتړ اعلان کړی.
د طالبانو حکومت په پاکستان کې د روانې نا کرارۍ په اړه اندیښنه ښودلې.
د طالبانو د بهرنیو چارو وزارت څخه خپره شوې خبرپاڼه کې راغلي چې :«د ولس د مشروع غوښتنو پر وړاندې تر ټولو ښه لار مذاکره او تفاهم دی. وروستيو پېښو ثابته کړې چې له مذاکراتو انکار مسئلې لا پېچلې کوي.»
خبرپاڼه کې راغلي، چې دا ترینګلتیا به په ټوله سیمه اغېز پرېباسي.
د یاد وزارت اعلامیه کې زیاته شوې، چې د پاکستان حکومت او اغېزناکې ادارې باید له زیاتېدونکې نا رضایتي سره معقول او ریښتونی چلند وکړي.
د پاکستان فدرالي حکومت د پښتون ژغورنې په غورځنګ بندیز ولګاوه.
دوی ویلي، چې د پښتون ژغورنې غورځنګ یې د منع شويو سازمانونو په لست کې شامل کړی او په هېواد کې یې پر فعالیتونو بندیز لګولی.
یاد حکومت په یوه خبرپاڼه کې ویلي، چې د پښتون ژغورنې غورځنګ فعالیتونه د سولې او امنیت پر ضد وه.
دوی دغه راز زیاته کړې، چې دغه غورځنګ په یو شمېر کړنو کې ښکېل دی چې د سولې او امنیت پر ضد دی او دوی د ترهګرۍ ضد قانون د ۱۱مې مادې پر بنسټ، د دغه غورځنګ د ممنوعه سازمانونو په لېست کې شامل کړی او پر فعالیتونو یې بندیز ولګوه.
دا په داسې حال کې ده چې یوولسم د اکتوبر په خیبر کې د پښتون ژغورنې غورځنګ د منظور پښتین په مشرۍ قامي لویه جرګه جوړوي.
دیني عالم ډاکټر ذاکر نایک وايي، نیکټايي په اسلام کې هیڅ حرامه نه ده.
هغه ویلي، دی هم نکټايي کوي او غواړي په دې کار سره غیر مذهبو ته د اسلام دعوت ورکړي، چې تر ډېره پکې بریالی دی.
د هغه په خبره، هیڅوک دا نه شي ثابتولی، چې نکټايي په اسلام کې حرامه ده.
دا په داسې حال کې ده چې څه موده وړاندې د طالبانو د امربالمعروف په نوي قانون کې نیکټايي حرامه بلل شوې وه.
د بیروت په جنوبي سیمه ضاحیه کې تېره او نن ورځ اسرائیلو ګڼ بریدونه کړي؛ خو د زیان په اړه یې تر اوسه معلومات نه دي ورکړل شوي.
په ورته مهال د لبنان ملي خبري اژانس ویلي، چې پر یاده سیمه تر دېرشو ډېر هوايي بریدونه شوي او د درنو چاودنو غږونه هم اورېدل شوي دي.
د سرچینې د معلوماتو له مخې، په دغو بریونو کې د تیلو پمپ او د طبي وسایلو یوه ډیپو هم زیانمنه شوې.
بل لورته د اسراییل پوځ اعلان کړی، چې دوی د وسلو زېرمې او د حزبالله تاسیسات په نښه کړي دي.
د اماراتو هوایي شرکت په یو تازه اقدام کې سپرلیو سره دبۍ ته د پیجرونو او بسیم مخابراتي شبکو انتقال منع کړ.
یاد شرکت دغه راز منځني ختیځ ته د الوتنو لغوه کول څو ورځې نور هم ځنډولي.
له دغه شرکت څخه خپره شوې خبرپاڼه کې راغلي چې دا اقدام یې منځني ختیځ کې د کړکېچ زیاتېدو له کبله کړی.
د یادونې ده چې څه موده وړاندې د اسرائیلو له لوري لبنان کې د حزب الله ډلې پیجرونو ته چاودنې ورکړل شوې، چې تر نږدې درې زره کسانو ته پکې مرګ ژوبله واوښته.