له بهرنیو سیلانیانو سره د طالب سرتېرو دغو اخیستل شویو عکسونو ګڼ غبرګونونه راپارولي.
د یادو رسنیو ځینو افغان کاروونکو نیوکه کړې، چې افغانستان کې د نجونو پر زدکړو او ان غږ هم بندیز لګېدلی، خو بهرنۍ سیلانیانې بیا ازاد او لوڅ مخ ګرځي.
دوی وایي، طالبانو بهرنیو ښځینه ګرځندویانو ته اجازه ورکړې، چې ازادې وګرځي او ان دوی ورسره عکسونه اخلي؛ خو د افغانو ښځو او نجونو غږ هم ستر ګڼي.
د بلوڅو د غورځنګ مشره ماه رنګ بلوڅ د پاکستان له نړیوال هوايي ډګر څخه راګرځول شوې ده.
نوموړې ویلي، غوښتل یې چې نیویارک ته ولاړه شي، خو د پاکستان حکومت په غیر قانوني ډول د هغې د سفر مخه نیولې ده.
بلوڅ زیاته کړې، دا کړنه د دې ښکارندوي کوي، چې د پاکستان حکومت په لویه کچه د بلوڅو حق خاموشه کوي او نه غواړي چې پر بلوڅو د لسیزو روان ظلمونه پای ته ورسیږي.
نوموړې ټینګار کړی، چې د خپلو حقونو لپاره به مبارزې ته دوام ورکوي.
وال سټریټ ژورنال ویلي، چې د بایډن حکومت پر اسرائیلو د ایران د برید د غچ اخیستو پر ځای د ایران هېواد له اټومي بټیو دفاع کوي.
دوی دا خبرې وروسته تر هغې کوي، چې د امریکا له ګواښ سره سره، ایران پر اسرائیل برید وکړ؛ خو واشنګټن هیڅ غبرګون ونه ښود.
تر برید وړاندې امریکا ویلي وو، چې دغه برید به ایران ته ناوړه پایلې ولري؛ خو پر تل ابیب د تهران له برید څو ورځې تېريږي، مګر لاهم امریکا چوپه پاتې.
تحریک طالبان پاکستان ډلې اعلان کړی چې پښتونخوا کې له پاکستاني پوځیانو سره پنځه ورځنی اوربند کوي.
یادې ډلې ویلي، چې دا اوربند قومي لویې جرګې ته د درنښت له کبله کوي.
دا اوربند داسې مهال کېږي، چې د پاکستان حکومت تازه پر پښتون ژغورنې غورځنګ بندیزونه لګولي.
بل لورته د پاکستان پوځ د یاد اوربند په اړه څه نه دي ویلي.
د یادونې ده چې ټي ټي پي تر دې وړاندې له قامي لویې جرګې څخه خپل ملاتړ هم اعلان کړی وو.
د نوبل کمېټې د فیزیولوژي په برخه کې د نوبل جایزه دوو امریکايي پوهانو ویکتور امیروس او ګري روکون ته اعلان کړه.
د سرچینې د معلوماتو له مخې، دې دواړو د مایکرو آر این ای کشف او د لیږد وروسته د جینونو تنظیم کولو کې د هغې د رول له کبله د دغې جایزې ګټوونکي شوي دي.
د یادونې ده چې د فزیک، کیمیا، ادبیاتو، سولې او اقتصاد په برخه کې د نوبل جایزې ګټونکي به هم په راتلونکو ورځو کې اعلان شي.
د خوړو نړیوال پروګرام یا WFP پر خپله اېکسپاڼه لیکلي، چې د سږني میلادي کال له پیله تر دې دمه یې له کابو ۴ میلیونه افغانانو سره نغدي مرسته کړې ده.
د خوړو نړیوال پروګرام ویلي، چې د دې مرستو نیمایي ترلاسهکوونکي ښځې دي.
یاد پروګرام زیاته کړې، چې دا نغدې پیسې اړمنو ته دا ځواک ورکوي ترڅو پر هغه څه یې ولګوي چې کورنۍ یې ورته اړتیا لري
دا په داسې حال کې ده، چې واک ته د طالبانو تر رسېدو وروسته ګڼ شمېر افغانان له اقتصادي ستونزو سره مخ دي.
پوره ۲۳ کاله وړاندې په همدې ورځ د ۲۰۰۱ کال د اکتوبر په ۷مه نیټه وروسته له هغه چې طالبانو د اسامه بن لادن امریکا ته د سپارلو ډډه وکړه، د امریکا په مشرۍ نړۍوال ایتلاف د طالبانو حکومت لمنځه یووړ او د ترهګرۍ ضد جګړې په نوم افغانستان ته راغلل.
د امریکا د وخت ولسمشر جورج ډبلیو بوش سپینه ماڼې کې خبریالانو ته وویل:« د سپټمبر یوولسمې پېښې د عاملینو لمنځه وړلو په موخه یې پر افغانستان برید کړی دی.»
دا پر افغانستان د امریکا تر ټولو اوږده جګړه وه، چې شل کاله یې دوام وکړ.
د چارو ګڼ شمیر شنونکي په افغان چارواکو نیوکه کوي چې له رامنځته شوي فرصت څخه یې ګټه پورته نه کړه او امریکا مجبوره شوه چې د دوحې تړون له مخې شل کاله وروسته افغان جمهوري نظام ړنګ او واک بیرته طالبانو ته وسپاري.
د پاکستان د بهرنیو چارو وزارت ویاندې ممتاز زهرا بلوڅ د طالبانو حکومت د بهرنیو چارو وزارت وروستۍ اعلامیه د پاکستان په چارو کې لاسوهنه بللې ده.
بلوڅ ویلي، طالبان دې یو دیموکراتیک حکومت ته د مشورو پرځای خپلې کورنۍ ستونزې حل کړي.
هغې دغه راز ویلي، چې د طالبانو حکومت ان دین غلط تفسیر کړی، چې له کبله یې د نجونو ښوونځي بند کړي او د زدکړو اجازه نه ورکوي.
نوموړې له نړیوالې ټولنې سره د ترهګرۍ د له منځه وړلو په برخه کې د طالبانو حکومت د وعدو پر عملي کولو ټينګار کړی او وېره یې ښودلې هسې نه چې افغانستان د ترهګرۍ پر مرکز بدل شي.
د یادونې ده چې تېره ورځ د طالبانو د بهرنیو چارو وزارت په یوه اعلامیه کې ویلي وو، چې د پاکستان وروستي کړکېچ ته اندېښمن دي او هیله لري چې ستونزه د خبرو له لارې حل شي.
د پښتون ژغورنې غورځنګ مشر منظور پښتین وايي، د پاکستان حکومت اوس مهال د داعش جوړولو لپاره کار کوي.
هغه پر یو ایکس سپیس کې ویلي، چې د پاکستان حکومت اوس داعش ته مرکزونه جوړ کړي، روزنه ورکوي، وسلې ورکوي او د هغوی لپاره بودجه پیدا کوي.
نوموړی زیاتوي، د پاکستان حکومت له افغان او دغه راز له پي ټي ایم سره دوښمني لري او د دې دوښمني لپاره په اساسي ډول کار کوي.
برازیل لوبډلې د فوټسال نړیوال جام اتلولي وګټله.
دا لوبه تېره شپه د ازبکستان په کوربه توب د ارجنټاین او برازیل ترمنځ ترسره شوه، چې برازیل لوبډلې یو د دوه پر وړاندې وګټله.
برازیل تر دې وړاندې پنځه ځله د دغو سیالیو اتلولي په خپل نوم کړې وه.
د دې سیالیو په پایله کې د برازیل ویلیان دورن د غوره ګول ساتونکي جایزه وګټله.
د یادونې ده چې د سږکال فوټسال نړیوال جام د ۲۴ لوبډلو ترمنځ پیل شوی و، چې افغانستان په کې د لومړي ځل لپاره برخه اخیستې وه.