د هېواد پخواني ولسمشر حامد کرزي په خیبر کې د پښتنو قامي جرگې پر جوړېدو خوښي څرګنده کړې.

ښاغلي کرزي په خپلې ایکس‌پانې لیکلي، چې دا جرګه په سیمه کې د ستونزو د اوارولو لپاره نیک او اغیزمن گام دی.

هغه ویلي:” ددې قومي جرگې له پرېکړه لیکه خپل کلک ملاټړ اعلانوي او په خاصه ټوگه د جرگې د هغه غږ چې په افغانستان کې د نجونو د تعلیم لپاره وشو ستاینه او قدرداني کوي.”

نوموړي دغه راز زیاته کړې چې دا جرگه یو ارزښتناک تاریخي دود دی او د ستونزو د حل لپاره موثره طریقه ده.

هغه دغه راز ویلي، چې د خیبر په جرگه کې د ښځو د پراخ گډون او د تعلیم پر ارزښت د ټولو تاکید دا څرگندوي چې په سېمه کې میشت خلک د امن او متمدن ژوندانه غوښتونکي دي.

نوموړي د سیمې د خلکو د حقونو د ترلاسه کولو او د ددې جرگې د جوړولو لپاره د منظور پښتین له هڅو او د ولسونو له ګډون مننه کړې.

د امریکا پولیسو اعلان کړی چې د دغه هېواد د ولسمشریزو ټاکنو پر جمهوري غوښتونکي نوماند، ډونالډ ټرمپ یې د درېیم احتمالي برید مخنیوی کړی دی.

امریکايي رسنیو ویلي، چې پولیسو تېره ورځ په کلفورنیا کې د ټرمپ ټاکنیز کمپاین ته نږدې، یو ۴۹ کلن کس د جعلي اسنادو او د وسلې د جواز په درلودلو سره نیولی چې ښايي پر ټرمپ یې د برید اراده درلوده.

دا پیښه په داسې حال کې کیږي چې تر دې وړاندې هم په نوموړي دوه ځلې د برید هڅه شوې وه.

د طالبانو د حکومت د بهرنیو چارو وزارت سیاسي مرستیال شیرمحمد عباس ستانکزی وايي، څه باندې دوه میاشتې وشوې چې پاکستان د افغان سوادګرو پر مخ د ټرانزیټ ټولې لارې تړلي دي.

ښاغلي ستانکزي ویلي، چې زموږ سبزیجات، مېوې او هیڅ توکې ته لار نه ورکوي.

هغه دغه راز ویلي که چېرته سوداګرو ته لار ورکړي بیا له تورخم نه نیولې تر واګې بندر پورې که پولیس دي او که عسکر دي، ټول غله دي او له سوادګرو غلاوې کوي.

نوموړي ویلي چې دا کار نه د افغان سوادګرو او نه هم د پاکستان د حکومت په ګټه دی.

د طالبانو حکومت د امربالمعروف وزارت ویاند سیف‌السلام خیبر قامي لویې جرګې او د پښتون ژغورنې غورځنګ ته په اشارې ويلي، چې د isi د توطیو قرار دادیان او مهار شوي اجیرانو ته یواځې دومره وخت او ځای مهم دی چې څوک یي واکسین شوی فکر واوري او د دوی د شیطاني نقاب لاندې کلکې داړې پټي وساتل شي.

خیبر په خپله ایکس‌پاڼه لیکلي، چې دوی که جرګه وې که لاریون، غونډه وې که مجلس خپل ورسپارل شوی عمل ترسره کوي.

هغه دغه راز ویلي:”دوی ته عیاشي، سهولتونه او کاذب د اتلولۍ القاب ددې لپاره ورکول کیږي چې ترڅو د isi اینجډا مخته یوسي.”

هغه دغه راز ویلي چې د پښتون معزز قوم په نوم د دوی له مجبوریتونو څخه په ناوړه استفاده، پر ممبرونو ځګونه شیندل، او باټو او چټیاتو باندې، د عمل پرځای یواځې خلک په ګیلو غولول په کامله مانا د isi د مخفي ګټو د چوکیدارانو کار دی.

د پښتون ژغورنې غورځنګ مشر منظور پښتین د خیبر په ریګي للمه سیمه کې قامي لویې جرګې ته په وینا کې د جرګې له ګډونوالو غوښتي، چې پر افغانستان له واکمنو طالبانو وغواړي څو د نجونو پر مخ د زده‌کړو دروازې پرانیزي.

منظور پښتین ویلي، پښتانه د ډیورند کرښه نه‌مني او د کرښې په اوږدو کې د خلکو او توکو ازاد تګ راتګ ته دې د پخوا په څېر اجازه ورکړل شي.

نوموړي همدا راز زیاته کړې، چې د پاکستان پوځ او پاکستاني طالبان یا ټي‌ټي‌‌پي دواړه دې د پښتنو له سیمې ووځي.

پښتین ویلي چې په سیمه کې ناامني د دوی له‌خوا رامنځته شوې ده.

د پاکستان حکومت او پوځ د دغو څرګندونو په اړه تر اوسه څه نه‌دي ویلي.

د تېر جمهوري نظام د چارو ادارې لوی رییس فضل محمود فضلي ویلي، ټول افغانستان له قامي لویې جرګې سره همغږي او خواخوږي وښوده؛ خو کابل کې نیابتي ډله په دې اړه خاموشه وه.

نوموړي ویلي، طالبان نشي کولای د دوحې د هوکړې له مخې د امریکا د متحدینو پر وړاندې مخالف دریځ ونیسي.

د فضلي په خبره، طالبان مجبور دي چې د جرګې پر وړاندې د پاکستان د پوځ په څېر دریځ ونیسي.

د پښتون ژغورنې غورځنګ مشر منظور احمد پښتین د جرګې په تالار کې ویلي، د جرګې ګډونوال باید نن پرېکړه وکړي، چې په ۶۰ ورځو کې ټي‌ټي‌پي او د پاکستان حکومت له پښتونخوا ووځي.

هغه ویلي، د پښتونخوا قومي مشران باید طالبان، ای ایس ای او ایم ای د ترهګریزو سازمانونو په نوم وپېژني.

نوموړي دغه راز ویلي، چې قومي مشران باید پرېکړه وکړي چې ډیورنډ کرښه پښتنو ته هېڅ حیثیت نه لري.

د پښتون ژغورنې غورځنګ مشر منظور احمد پښتین ویلي، افغانستان کې ټول جنګونه د پښتونخوا له خاورې په ګټې اخیستنې د پاکستان پوځ او حکومت ترسره کوي.

هغه ویلي، د افغانستان ټول مسائیل له همدې خاورې کېږي.

نوموړی زیاتوي، د پاکستان حکومت د پښتونخوا خاوره د افغانستان پر ضد کاروي.

منظور پښتین څه موده وړاندې پر یو ټویټر سپیس کې هم ویلي وو چې پاکستان د پښتونخوا په خاوره کې داعش ته روزنه ورکوي.

د ملي جمهوري غوښتونکي ګوند مشر محسن داوړ وايي، تر هغې چې د پاکستان له لاسپوڅو افغانستان ازاد شوی نه وي، نو امن نه شي راتلی.

نوموړي ویلي، د امریکا د ګټو لپاره یې دا خلک په افغانستان کې واکمن کړي او اوس غواړي چې پښتونخوا هم طالب ته وسپاري.

هغه پر پاکستاني حکومت غږ کړی، چې د پښتونخوا خلک په هیڅ صورت دې کار ته اجازه نه ورکوي او تر هغې پورې به دوی د خپلو حقونو غوښتنه کوي، ترڅو د پاکستان حکومت خپلې پالیسۍ نه وي تغیر کړي.

پاکستان کې د طالبانو سفارت وايي، چې په دغه هېواد کې د څلورو وژل شویو افغانانو جسدونه نن افغانستان ته رالېږدول شوي دي.

یاد سفارت ویلي، چې د درې نورو افغانانو جسدونه یې په کوېټه کې خپلو کورنیو ته سپارلي وو.

دا افغانان درې ورځې وړاندې د بلوچستان د ډبرو سکرو په کان کې د نامعلومو وسله والو د برید له کبله وژل شوي وو.

تر اوسه د دغه برید مسوولیت چا نه دی منلی.