د طالبانو جګپوړي چارواکي انس حقاني د یحیی سنوار په مړینه خواشیني څرګنده کړې ده.

انس حقاني په خپله ایکس‌پاڼه لیکلي، چې د یحیی سنوار وینه د راتلونکو نسلونو لپاره د ازادۍ نقشه جوړوي.

نوموړي د یحیی سنوار نوم د تاریخ د سترو مبارزینو په کتار کې شمېرلی او ویلي چې د سنوار ژوند او مرګ دواړه ځانګړي دي.

د یادونې ده چې یو شمېر نورو طالب چارواکو هم د یحیی سنوار د وژنې په اړه غبرګون ښودلی دی.

بل لورته د ټولنیزو رسنیو یو شمېر کارونکي لیکي، چې طالبان د حماس د مشر یحیی سنوار د مړینې له کبله خواشیني څرګندوي؛ خو ایران کې د ۲۶۰ افغانانو په اړه بې خبري ښیي.

په ایران کې د مېشتو افغان خبریالانو ټولنې ویلي، چې د ایران پولې ته څېرمه د کالګان سیمه کې د وژل شویو یو شمېر افغانانو مړي لا هم په غرونو کې ورک دي.

دغه ټولنه وايي، چې د ۱۳ کسانو جسدونه د سراوان په سیمه‌ییز روغتون کې په یخچالونو کې ساتل کېږي او ځینې نور جسدونه د هغوی د کورنیو د غړو له لوري افغانستان ته لېږدول شوي دي.

د وژل شویو کډوالو یو شمېر کورنیو رسنیو سره په خبرو کې د عدالت غوښتنه کړې او له نړیوالې ټولنې او د بشري حقونو له سازمانونو یې غوښتي چې دې مسئلې ته رسېدنه وکړي.

د یادونې ده چې د ایران په سراوان سیمه کې د ایراني پوله ساتو ځواکونو له لوري ۲۶۰ افغان کډوال ووژل شول.

د ښځو او بشري حقونو په برخو کې د افغانستان لپاره د امریکا ځانګړې استازې رینا امیري د ایران په سراوان کې د ګڼو افغانانو د وژلو په اړه د شفافو تحقیقاتو غوښتنه وکړه.

رینا امیري په خپله ایکس‌پاڼه لیکلي، هغه کسان چې له ځپل کېدو تښتي، باید له هغوی سره په خواخوږۍ او انسانیت چلند وشي، نه په خشونت.

د یادونې ده چې درې ورځې وړاندې د ایران په سراوان سرحدي سیمه کې د ایران پوله ساتو ځواکونو ۲۶۰ افغانان ووژل.

دغې پېښې په نړیواله کچه غبرګونونه راوپارول او ډېره وغندل شوه؛ خو د طالبانو حکومت یې ګنګوسه بولي او لا یې هم د تحقیقاتو څرک نه لېدل کېږي.

حزب‌الله ډلې ویلي چې، له اسراییل سره په جګړه کې یوې نوې مرحلې ته د داخلېدو په حال کې دي.

دوی ویلي چې:“د اسراییل په وړاندې به یوې نوې او پراخې مرحلې ته داخل شي.”

دوی دا څرګندونې داسې مهال کوي چې تېره ورځ د حماس مشر یحيی سنوار د اسرائیلو په برید کې په غزې تړانګه کې ووژل شو.

د حماس ډلې تر اوسه د یحیی سنوار د وژل کېدو په اړه څه نه دي ویلي.

ایران کې د افغانستان پخواني سفیر عبدالغفور لېوال وایي، چې د بې ګناه افغانانو شهیدانول هر ځای، هرکله او په هرنامه وحشت دی.

ښاغلي لېوال په خپله ایکس‌پاڼه لیکلي:”له وحشت څخه ټولیز انزجار باید ولس داسې سره یوموټی کړي، چې په مورني هېواد کې دننه د هوسا، خپلواک، ولسواک او مدني ژوند شرایطو په برابرولو سره د افغان انسان ژوند وژغورل شي او هيڅوک له هېواده وتلو ته اړ نه شي.”

دا په داسې حال کې ده چې درې ورځې وړاندې د ایران په سراوان سرحدي سیمه کې ایراني پوله ساتړ ځواکونو په افغان کډوالو برید وکړ چې په نتیجه کې یې ۲۶۰ افغانان وژل شوي دي.

د اسرائیل لومړي وزیر بنیامین نتنیاهو ویلي، چې پوځیانو یې د حماس د سیاسي دفتر مشر یحیی السنور وژلی دی.

د ایسنا خبري اژانس د راپور له مخې، د اسرائیلو لومړي وزیر بنیامین نتنیاهو ویلي، چې پوځیانو یې د پنجشنبې په شپه د حماس د سیاسي دفتر مشر یحیی السنور وواژه.

نتنیاهو زیاته کړې، چې زموږ ماموریت لا پای ته نه دی رسېدلی او موږ باید په غزه کې اسرائیلي بندیان آزاد کړو.

هغه ویلي، چې موږ به د یرغمل شویو کسانو د بیرته ستنولو لپاره خپلو هڅو ته دوام ورکړو.

تر دې وړاندې د اسرائیل پوځ د غزې تړانګې په جنوب کې د چهارشنبې په ورځ په عملیاتو کې یو جسد وموند او د DNA له معایناتو وروسته یې اعلان وکړ چې د حماس مشر یحیی السنوار یې وژلی دی.

د ټولنیزو رسنیو یو شمېر کارونکي په طالبانو نېوکه کوي چې د هندوستان هېواد له لوري تېر جمهوري‏ نظام سره مرسته شوي ملي بسونه رنګ کړي او اوس یې دا د افغانستان د تولید په نامه نومولي.

دوی ویلي، چې دروغ او تبلیغات هم حد لري، کمپني او شرکت یې نشته او ملي بس یې جوړ کړی دی.

دوی د پوښتنې په شکل ویلي، چې دا ملي بس د کومې کمپنۍ او کوم سرمایه ګزار په پانګونې جوړ شوی دی؟

دوی لیکلي:”یو شمیر ملي بسونه د جمهوریت وروستیو میاشتو کې د ترانسپورټ وزارت لخوا د عامو ښاریانو دپاره را وارد شوي وه، چې د طالبانو چسپکي ماینونو له امله ودرول شول، ترڅو عام ښاریان قرباني نشي، اوس طالبانو په داسې حال کې د ایران په پوله د ۳۰۰ تنو شهیدان او ټپي شوو او د همدې خبر کمرنګه کولو او تبلیغاتو موخه دا نشر کړی.”

دوی ویلي، که دومره لویې کمپنۍ افغانستان کې د طالبانو حکومت کې فعاله وی بیا ځوانان ولې په قاچاقي لارو تګ ته مجبورېدل او د پردیو هېوادونو له لوري په بې رحمانه ډول وژل کېدل.

د ایران په سراوان سرحدي سیمه کې د ایراني پوله ساتو ځواکونو لخوا په افغان کډوالو د برید نږدې درې ورځې تېرېږي؛ خو د طالبانو حکومت تر اوسه په دې اړه هېڅ ډول تحقیقات وړاندې کړي نه دي.

د ټولنیزو رسنیو ګڼ کاروونکي د طالبانو په حکومت نېوکه کوي، چې ګواکې طالبان د ایراني چارواکو سره پخه ملګرتیا لري او د همدې په اساس د ایران له لوري مرګوني برید ته د ګنګوسې نوم ورکوي.

د یادونې ده، چې د طالبانو حکومت رئیس الوزرا ملا محمد حسن اخوند یو ټیم د تحقیقاتو لپاره لېږلی؛ خو تر دې دمه یې هیڅ راپور رسنیو ته نه دی ورکړی.

اسرائیلي رسنۍ وایي، چې د اسرائیلو په برید کې د حماس ډلې مشر یحیی سنوار وژل شوی دی.

د اسرائیل پوځ ویلي، چې په غزه کې یو جسد یې موندلی و او د DNA له معایناتو وروسته معلومه شوې چې یحیی سنوار وژل شوی دی.

د حماس ډلې تر اوسه په دې اړه څه نه دي ویلي.

د افغان سولې لپاره د امریکا پخوانی ځانګړی استازی زلمی خلیلزاد وایي، چې د ایران په سراوان کې د ایراني پوله ساتو ځواکونو له لوري د افغان کډوالو د وژلو راپورونه که رېښتیا شي؛ نو دا به د ایران لپاره ډېرې بدې پایلې ولري.

زلمي خلیلزاد په خپله ایکس‌پاڼه لیکلي، چې مونږ باید د باوري څېړنو پایلو ته په تمه شو.

په ورته وخت کې بیا د افغانستان لپاره د ایران د ولسمشر استازي حسن کاظمي قمي د ایراني پوله ساتو ځواکونو له لوري د افغانانو وژنه یو توجیه شوی عمل وباله او دفاع یې وکړه.

که څه هم د ایران په سراوان سیمه کې د ایراني ځواکونو له لوري د ۲۶۰ افغانانو وژلو په نړۍواله کچه توند غبرګونونه راپارولي؛ خو د طالبانو حکومت ویاند ذبیح الله مجاهد تېره ورځ په خپله ایکس پاڼه لیکلي وو چې د دغې ګنګوسې په تړاو تحقیقات ترسره کوي.