د ایران مشر ایتالله علي خامنهيي په یوه بیان کې د حماس او حزب الله ستاینه کړې ده.
خامنهیي ویلي، چې د سنوار له لاسه ورکول د مقاومت لپاره له درده ډکه پېښه ده.
نوموړي زیاته کړې، چې حماس د مشرانو له شهادت سره بیا هم له پرمختګ لاس نه دی اخیستی.
د یادونې ده چې یحیی سنوار پر اسراییل د ۲۰۲۳م کال د اکټوبر د اوومې نېټې د برید طراح و چې دا حمله د غزې په تړانګه کې د جګړې سبب شوه.
هېره دې نه وي چې اسراییلي ځواکونو د اکټوبر په ۱۶مه په غزه کې یحیی سنوار وواژه.
امریکا وایي، چې اسراییل دې په بیروت کې او د بیروت شاوخوا خپل بریدونه څه کم کړي.
د امریکا دفاع وزیر لویډ اسټن ویلي، چې د ملکي تلفاتو شمېر خورا لوړ دی.
نوموړي هیله څرګنده کړې چې د خبرو له لارې دې ته زمینه برابره شي چې په دواړو لوریو کې ملکیان بېرته خپلو کورونو ته ستانه شي.
نوموړی دا څرګندونې داسې مهال کوي چې تېره ورځ د غزې روغتیا وزارت ویلي، چې د اسرائیل د یرغل له کبله تر اوسه ۴۲ زره او ۵۱۹ تنه وژل شوي.
د سرچینې د معلوماتو له مخې، په دغو بریدونو کې تر اوسه نږدې سل زره کسان ټپیان شوي، چې د جګړې قربانیان تر ډېر ماشومان او ښځې دي.
د ایران د کورنیو چارو وزارت د کډوالو رییس ویلي، که ملګري ملتونه د کډوالو په برخه کې بودجه ور زیاته نه کړي؛ نو دوی به په دې برخه کې خپل سیاست ته تغیر ورکړي.
نادر یار احمدي په جینوا کې د ملګرو ملتونو د عالي کمېشنرۍ له کمېشنر فلیپو ګراندي سره په لیدنه کې ویلي، چې دوی ته ورکړل شوې بودجه له ا ړتیا زیاته کمه ده.
دوی دا غوښتنه په داسې حال کې کوي چې اوس مهال یې پر افغان کډوالو د ژوند کړۍ تر ټولو ډېره تنګه کړې ده.
څو ورځې وړاندې یې هم د ایران په سراوان سیمه کې ۲۶۰ افغان کډوال وژلي وو.
د افغانستان د ژغورنې لپاره د مقاومت شورا غړی او د پوهنتون استاد حبیب الرحمن سیاف وایي، چې نن د افغانستان ازادي تر سوال لاندې ده او افغانستان د تروریستي ګروپونو له لوري اشغال شوی دی.
هغه ویلي، نن افغانستان کې له بد امنیتي وضعیت څخه خلک خپل هېواد پرېږدي، چې ځینې یې په سرحدونو کې ووژل شول، ځینې یې په سمندر کې ډوب شول او ځینې یې په نورو هېوادونو کې په بندخونو کې شپې سبا کوي.
د ښاغلي سیاف په خبره، افغانستان خپل نړیوال ارزښت بایللی او ان وزیر ته یې خلک د عکس اخیستلو اجازه نه ورکوي.
نوموړي د جنرال عبدالرازق د شپږم تلین په مناسبت ویلي، د خپلو شهیدانو د وینو ارزښت ته د قدرداني په موخه اړتیا ده، چې په یوځای مبارزه وشي.
هغه یو وار بیا پر ټولو سیاسي جریانونو غږ کړی، چې په افغانستان کې د ناورین د مخنیوي لپاره باید یوه ملي او داسې پراخه برنامه باندې کار وشي، چې د ټولو افغانانو لپاره ټول منلې وي.
د اسراییل لومړی وزیر بنیامین نتنیاهو وایي، چې د حزبالله دا هڅه چې ما او زما مېرمنه ووژني، لویه اشتباه کوي.
بنیامین نتنیاهو ویلي، چې د حزبالله ډلې زما د وژلو هڅه وکړه؛ خو هېڅکله به بریالي نه شي.
د یادونې ده چې تېره ورځ د اسرائیل په مرکزي سیمه قیساریه کې د نتنیاهو د کور سره د لبنان یوې ډرون الوتکې ټکر وکړ؛ خو نتنیاهو او مېرمن یې هغه شېبه په کور کې نه وو او چاته زیان نه دی اوښتی.
بل لورته حزبالله ډلې هم منلې چې دا برید د دوی کار و.
د غزې روغتیا وزارت ویلي، چې د اسرائیل د یرغل له کبله تر اوسه ۴۲ زره او ۵۱۹ تنه وژل شوي.
د سرچینې د معلوماتو له مخې، په دغو بریدونو کې تر اوسه نږدې سل زره کسان ټپیان شوي، چې د جګړې قربانیان تر ډېر ماشومان او ښځې دي.
د غزې جګړه تر یو کال اوړي؛ خو لاهم ورځ نه بلې ته شدت پیدا کوي.
اسرائیل وايي، دا جګړه به تر هغې ونه دروي، ترڅو یې حماس په بشپړ ډول له منځه نه وي وړي.
ایران کې د افغان کډوالو د وژنې پېښې په اړه د طالبانو ټاکل شوي پلاوي لاهم داسې شواهد نه دي موندلي، چې وښیي ۲۶۰ افغانان د ایرانیانو له لوري وژل شوي.
بل لورته د طالبانو ویاند ذبیح الله مجاهد هم وایي، تر اوسه په دې اړه یې داسې پایلې نه دي تر لاسه کړي، چې ګواکې افغانان د ایراني پوله ساتو په ډزو وژل شوي.
د یادونې ده چې دغې پېښې ګڼ کورني او بهرني غبرګونونه راپارولي؛ خو طالبان وایي، دوی په دې اړه څېړنې کوي.
بل لورته یو شمېر سیاسیون وایي چې طالبان په لوی لاس دا پېښه پټوي او نه غواړي چې د ایران سره یې اړېکې کړکېچنې شي.
د طالبانو د اطلاعاتو او فرهنګ وزارت مرستیال عتیق الله عزیزي وايي، د هغو ځایونو او څلور لارو نومونه بدلوي، چې د افرادو په نوم نومول شوي.
عزیزي ویلي، په یاد وزارت کې د ځایونو لپاره د نوم اېښودنې کمېسیون دا پرېکړه د روانې میزان میاشتې په اته ویشتمه کړې.
د نوموړي په خبره، دا چاره د نفاق او بدبیني د له منځه وړلو لپاره کوي.
که څه هم تر اوسه نه ده مشخصه چې دا چاره به یوازې کابل او که ټول هېواد کې کېږي، خو طاللان وايي، چې پر ځایونو به دیني او ملي ارزښت لرونکي نومونه کېږدي.
د یادونې ده چې واک ته د طالبانو تر رسېدو وروسته د ګڼ شمېر ځایونو او څلور لارو نومونه بدل شوي.
سیمهییزې سرچینې وایي، چې د طالبانو حکومت د لوړو زدهکړو سرپرست وزیر ندامحمد ندیم خوست ته تللی.
سرچینو ویلي، چې ندا محمد ندیم د خوست شېخ زاید پوهنتون په یوې غونډه کې د ګډون لپاره یاد ولایت ته تللی.
سرچینو زیاته کړې چې طالبانو په دې غونډه کې تصویري رسنیو ته د ګډون بلنه نه وه ورکړې او خبریالانو ته یې ویلي چې یوازې د دې غونډې ليکلي راپورونه جوړ کړئ.
دا په داسې حال کې ده چې څه موده وړاندې د طالبانو حکومت د ساه لرونکو په عکسونو بندیز ولګاوه.
جنوبي کوریا ادعا کړې چې، شمالي کوریا، روسیې ته ځانګړي ځواکونو استولي او لا هم دغه چاره دوام لري.
د جنوبي کوریا د ملي استخباراتو ادارې، NIS په یوه بیان کې ويلي چې، د اکتوبر له ۸ تر ۱۳مې نېټې یې د شمالي کوریا د پوځ خوځښتونه څارلي او داسې تصویرونه یې اخیستي، چې ښيي د دې هېواد ځانګړي ځواکونه د روسیې په ټرانسپورټي کښتۍ کې د روسیې خاورې ته لېږدول کېږي.
دا ادعا داسې مهال کېږي چې، د اوکراین ولسمشر ولادمیر زیلینسکي پر پیونګ یانګ ورته تورونه ولګول، چې د اوکراین په وړاندې جګړه کې یې سرتیري او وسلې روسیې ته لېږلي.
د یادونې ده چې دا له ۱۹۹۰ کال راهیسې لومړی ځل دی چې د روسیې کښتۍ د شمالي کوریا اوبو ته ننوځي او هغه په جګړه کې د شمالي کوریا د پوځ د ښکېلتیا پیل تأییدوي.