‏د ترکیې پلازمینې انقره کې د هوایي چلند پر ادارې وسله وال برید شوی چې له امله یې مرګ ژوبله اوښتې ده.

د ترکيې حريت ټلويزيون ویلي، چې وسله والو کسانو چې يوه پکې ښځه هم ده، د ترکيې پر هوايي چلند شرکت بريد کړی او ګڼو خلکو ته یې مرګ ژوبله اړولې.

دغه ټلویزیون زیاته کړې چې تر اوسه ۱۰ کسه وژل شوي او ۱۳ نور ټپيان دي.

وسله وال په ځايي وخت مازيګر له يو ټکسي موټر د دې شرکت مخې ته کوز شوي او په لومړي قدم کې د ساتونکو په ويشتلو سره توانېدلي ودانۍ ته ننوځي.

د دغه برید مسولیت تر اوسه کومې ډلې په غاړه نه دی اخیستی.

د ایران د بشري حقونو سازمان وایي چې په تېرو دوه اوونیو کې ایران ۱۰ افغانان اعدام کړي دي.

د دې سازمان مشر محمود امیری مقدم ویلي چې د اکتوبر په میاشت کې لږ تر لږه لس افغانان د ایران په زندانونو کې اعدام شوي دي.

نوموړي زیاته کړې چې د روان میلادي کال له پیله تر اوسه په ایران کې ۴۵ افغانان اعدام شوي دي.

مقدم په ایران کې د افغانانو د اعدام شمېر زیاتېدو ته په کتو اندېښنه څرګنده کړې.

پاکستاني رسنۍ وایي، چې د اسلام‌اباد سترې محکمې ددغه هېواد د پخواني لومړي وزیر عمران خان د مېرمنې بشرا بي‌بي د ضمانت په بدل کې د خوشې کېدو امر کړی دی.

د عمران خان په مشرۍ د پاکستان تحریک انصاف ګوند هم ویلي چې محکمې د عمران خان د مېرمنې د خوشې کېدو حکم صادر کړی او پر ضد یې کومه دوسیه نشته.

د یادونې ده چې په عمران خان تور دی چې د خپلې دندې پرمهال یې د بهرنیو مشرانو له خوا ترلاسه شوي سوغاتونه د قانوني پړاوونو له تېرېدو پرته ضبط کړي او دا يې له قانونه سرغړونه بلل شوې ده.

هېره دې نه وي چې له دې مخکې عمران خان او مېرمن یې د فساد یوې دوسیه کې په ۱۴ کلن بند محکوم شوي وو.

په ملګرو ملتونو کې د افغانستان دایمي استازي نصیر احمد فایق د دغه سازمان د عمومي اسامبلې په غونډه کې د افغانستان د وضعیت د هواري لپاره د نړیوالې ټولنې د پرېکنده او متحد اقدام غوښتنه وکړه.

نصیر احمد فایق له هېوادونو هم وغوښتل چې د نړیوالو قوانینو له مخې د افغانستان د جنسیتي توپیر پر وړاندې ودرېږي.

نوموړي دې غونډې ته په خپله وینا کې د افغانستان وضعیت خورا د اندېښنې وړ وباله.

ښاغلي فایق وویل چې د طالبانو تر واک لاندې افغانستان د بشري حقونو او د ټولنیز، اقتصادي او سیاسي وضعیت په برخو کې له ژور بحران سره مخ دی.

فایق همداراز ویلي، چې د طالبانو تعلیمي سیستم د ریښتینې روزنې پر ځای په افراطیت او د طالبانو لپاره د نویو ځواکونو په روزلو تمرکز کوي چې دا به په افغانستان او سیمه کې د لا زیاتې بې ثباتۍ لامل شي.

د امریکا استخبارات وایي، چې روسیه، چین او ایران د امریکا د ولسمشرۍ د انتخاباتو په درشل کې د امریکایانو ترمنځ نقاق ته لمن وهي.

دې چارواکو د نوم نه ښودلو په شرط ویلي، د دې دریو هېوادونو اجنټانو د امریکا له تېرو انتخاباتو څخه زده‌کړه کړې ده.

دوی دغه راز ویلي چې دغه روزل شوي کسان ښه چمتووالی لري چې په را روانو انتخاباتو کې لاسوهنه وکړي.

د دوی په وینا ښايي دا اجنټان د فزیکي ګواښونو او تشدد هڅه وکړي او ډېر امکان شته چې د انتخاباتو په بهیر کې د ناسمو معلوماتو د خپرولو عملیات ترسره کړي.

یادو هېوادونو د امریکا دغه تورونه رد کړي دي.

د امریکا ولسمشر جوبایډن د دغه هېواد ټاکنو ته نوماند ډونالډ ټرمپ دیموکراسي ته ګواښ بللی.

بایډن ویلي، ټرمپ باید له سیاسي پلوه بندي شي.

هغه تور پور کړې، چې نوموړي په نیو همشییر کې د ټاکنیز کمپاین پر مهال پر ډیموکراتانو نامناسبې نیوکې کړې دي.

د بایډن په خبره، ټرمپ غواړي د امریکا د اساسي قانون خوندیتوب له پامه وغورځوي.

د اسرائیل پوځ ویلي، چې د لبنان د حزب الله د وژل شوي مشر حسن نصرالله احتمالي ځای ناستی هاشم صفی الدین لا دمخه د دغه هېواد د پوځ په یوه برید کې وژل شوی دی.

د رویټرز خبري اژانس د راپور له مخې د اسراییلو پوځ ویلي چې هاشم صفی الدین درې اونۍ مخکې د بیروت په جنوبي ښارګوټي کې په یوه برید کې وژل شوی دی.

دا په لبنان کې د حزب الله د مشر احتمالي ځای ناستي هاشم صفي الدین د مړینې لومړنی رسمي تایید دی.

تر دې مخکې اسرایلو ویلي و، چې ښايي نوموړی د بیروت په څنډه کې د خپلو ځواکونو په بریدونو کې وژل شوی وي.

قزاقستان د ترکمنستان-افغانستان-پاکستان-هند د ګازو د نل‌لیکې (ټاپي) په جوړولو کې ګډون ته لېوالتیا ښودلې.

اذرنیوز خبري اژانس د قزاقستان د لومړي وزیر له قوله ویلي چې له ترکمنستان سره مذاکرات روان دي څو د دې پروژې په برخه کې د قزاقستان ممکنه ونډه وارزول شي.

د TAPI ګاز نل‌لیکه ټولټال ۱،۸۱۴ کیلومتره اوږده ده او د څلورو هېوادونو له خاورې تېرېږي: ترکمنستان – ۲۱۴ کیلومتره، افغانستان – ۷۷۴ کیلومتره، پاکستان – ۸۲۶ کیلومتره، چې بیا د هند تر پولو پورې رسېږي.

په ملګرو ملتونو کې د افغانستان پخواني استازي محمود صیقل د قطر او اندونیزیا ترمنځ د تحصیلي بورسونو د هوکړه لیک د لاسلیک په تړاو ویلي، چې دغه هوکړه لیک په داسې حال کې شوی چې ګواکي افغانستان په قطر پورې تړاو لري.

ښاغلي صیقل ویلي، چې قطر د افغانستان د اوسني وضعیت مسوول دی او همدوی افغانستان د ښځو په زندان او د ترهګرو په ځاله بدل کړی دی.

نوموړي زیاته کړې، چې قطر طالبان بیا ځلې واک ته ورسول او اوس د افغانستان په استازیتوب له اندونیزیا سره تحصیلي هوکړه لیک لاسلیکوي.

صیقل دغه راز ویلي چې په افغانستان پورې اړوند هر ډول هوکړه لیک کې باید د د دغه هېواد د مشروع حکومت د استازي لاسلیک هم وي.

د یادونې ده چې دوه ورځې وړاندې د قطر او د اندونیزیا ترمنځ دغه هوکړه لیک لاسلیک شوی، چې په اساس یې یو شمېر افغان محصلین به په اندونیزیا کې تحصیلي بورسیې ترلاسه کړي.

د افغانستان کرکټ بورډ غوراوي کمېتې، د بنګله‌دېش پر وړاندې د درې یو ورځنیو لوبو لپاره د لوبغاړو نوملړ اعلان کړ.

کرکټ بورډ د دې لوبو لپاره د حشمت‌الله شهیدي په لوبډلمشرۍ ۱۹ لوبغاړي انتخاب کړي دي.

ټاکل شوې، چې یادې سیالۍ د روان کال د نومبر میاشتې په ۶مه نېټه د متحده عربي اماراتو په شارجه لوبغالي کې پیل شي.

د لوبغاړو نوملړ کې حشمت الله شهیدي، رحمت شاه، رحمن الله ګربز، اکرام عليخیل، عبدالمالک، ریاض حسن، درویش رسولي، صدیق اتل، عظمت الله عمرزی، محمدنبي، ګلبدین نائب، راشدخان، ننګیال خروټی، الله محمدغضنفر، نوراحمد لکڼوال، فضل الحق فاروقي، بلال سمیع، نوید ځدراڼ او فریداحمد ملک ټاکل شوي دي.