یو شمېر سرچینو ویلي، چې د بادغیس لپاره د طالبانو د مرستیال والي مولوي غلام محمد احمدي زوی بدرالدین یوسف یو له هغو دریو جنګیالیو څخه دی، چې د خیبر پښتونخوا د دیره اسماعیل خان په کلاچي سیمه کې د پاکستاني پوځیانو په عملیاتو کې وژل شوي دي.

د سرچینې په وینا بدرالدین یوسف د پاکستاني طالبانو په یوه روزنیز مرکز کې روزونکی و.

سرچينې زياته کړې چې هغه د پنجشنبې په ورځ د پاکستاني ځواکونو د بې پيلوټه الوتکې په بريد کې د تحريک طالبان پاکستان له دوو وسله والو سره وژل شوی.

د طالبانو حکومت تر اوسه په دې اړه څه نه دي ویلي.

د امریکا د بهرنیو چارو وزیر مارکو روبیو ویلي، چې د امریکا حکومت کوم خیریه بنسټ نه دی چې له هر چاسره په مرستې کوي.

نوموړي له نړۍ سره د امریکا د مرستو د بندېدو په اړه په یوه مرکه کې ویلي، دوی فکر ورباندې کوي چې کومې پروژې به امریکا خوندي، پیاوړې یا سوکاله کړي.

دا په داسې حال کې ده چې ډونالډ ټرمپ واک ته له رسېدو وروسته له اسرائیل او مصر پرته پر ټولې نړۍ مرستې بندې کړې.

د ناروې د کډوالو شورا مشر یان ایګلند وايي، د هیوادونو استازي دې د میرمنو د حقونو د مبارزې لپاره باید کابل او کندهار ته سفر وکړي.

ایګلنډ له فرانسې خبري اژانس سره په مرکه کې ویلي، چې نړیوالې ټولنې په افغانستان د طالبانو تر بیا واکمنېدو وروسته د دغه هیواد خلکو ته شا کړې.

نوموړي دغه راز ویلي، چې يواځې د محدودو اروپايي هیوادونو استازي افغانستان ته سفر کوي.

نوموړي دغه راز زیاته کړې، چې له نادولتي موسسو څخه د ښځو د ایستلو او د پروژو د ځنډېدو لامل د بودیجې نشتوالی دی.

د لغمان په الیشنګ ولسوالۍ کې ناچاودې مرمۍ دې ماشومان وژلي دي.

د لغمان د طالبانو د امنیې قومندانۍ ویاند، یونس یوسفزي ویلي، چې د دې ولسوالۍ په اړینې سیمه کې ماشومانو یوه ناچاوده مرمۍ موندلې او له ټکولو وروسته یې پرې چاودنه کړې.

نوموړي زیاته کړې چې، دا پېښه نن
له غرمې مخکې رامنځته شوې او په وینا یې وژل شوي ماشومان د بېلابېلو کورنیو غړي وو چې لس، یوولس او دیارلس کاله عمرونه یې درلودل.

د بښنې نړیوال سازمان له هېواده تر وتلو وروسته میدان ته د افغان ښځینه کرېکټ لوبډلې د راستنېدو په غبرګون کې ویلي، چې له کلونو جلا وطنۍ وروسته د دغو لوبغاړو بیا یوځای کېدل د سپورت او د ښځو د حقونو لپاره ښه خبر دی.

یاد سازمان پر خپله ایکس‌پاڼه لیکلي، چې د کرکټ نړیواله ټولنه باید د دې لوبغاړو ملاتړ وکړي ترڅو دوی وکولی شي په لوړه کچه سیالۍ ترسره کړي.

دغه سازمان له نړیوالو ورزشي بنسټونو غوښتي چې په رسمي سیالیو کې د دغو ورزشکارانو د ګډون لپاره شرایط برابر کړي او د نړۍ په کچه د دوی د لوبېدو له حقه ملاتړ وکړي.

د یادونې ده چې د افغانستان لپاره د ملګرو ملتونو ځانګړي راپور ورکونکي ریچارډ بینیټ هم ویلي، چې افغان کرکټ ښځینه لوبډلې په میلبورن کې په هرې منډې سره ښکاره پیغام ورکړ چې دوی به غلې نشي.

د روسیې ټاس خبري اژانس د روسیې د ولسمشر د ویاند دیمیتري پیسکوف له قوله ویلي، چې د امریکایي الوتکې د غورځېدو وروسته د ټرمپ او پوتین ترمنځ هیڅ ډول خبرې نه دي شوي.

هغه ویلي، چې امریکا کې د الوتکو له غورځېدو وروسته ټرمپ او پوتین هېڅ ډول خبرې نه دي کړې.

تر دې وړاندې، د امریکا ولسمشر ډونالډ ټرمپ د الوتکې د غورځېدو په اړه د هغه او پوتین ترمنځ د ټېلېفوني خبرو اترو په اړه د خبریال د پوښتنې په ځواب کې وویل، «په دې اړه هیڅ بحث نه دی شوی، نه، نه، نه.»

ټاس ویلي، چې خبریالانو دا ځواب داسې تعبیر کړى و چې ممکن ټېلېفوني خبرې شوی وي، خو د الوتکې د غورځېدو په اړه نه وي.

د اسراییل هوایي ځواکونو د لبنان په ختیځ کې د حزب الله پر تاسیساتو بمباري کړې ده.

د اسراییل پوځ په یوه بیان کې ویلي، چې په البقاع سیمه کې یې د ترهګرو پټنځایونه په نښه کړي دي.

دوی زیاته کړې، چې په نښه شویو هدفونو کې د ترځمکې لاندې تاسیسات چې د ایران ملاتړې حزب الله ورڅخه د وسلو د تولید او پراختیا لپاره کاراخیست او هم د سوریې ـ لبنان د پولې په اوږدو کې نور تاسیسات چې دې ډلې ورڅخه د وسلو د قاچاق لپاره کاراخیست، شامل دي.

یاد پوځ دغه راز ویلي، چې په سیمه کې اوربند ته ژمن دي؛ خو د ترهګرو هیڅ ډول فعالیتونه نشي زغملی.

د افغانستان لپاره د ملګرو ملتونو ځانګړی راپور ورکونکی ریچارډ بینیټ وایي، افغان ښځینه لوبغاړې په کور دننه او ټوله نړۍ کې په سپورټ پورې تړلې دي.

ښاغلي بینیټ پر خپله ایکس‌پاڼه لیکلي، چې افغان کرکټ ښځینه لوبډلې په میلبورن کې په هرې منډې سره ښکاره پیغام ورکړ چې دوی به غلې نشي.

نوموړي زیاته کړې، په داسې حال چې افغان ښځې په جلاوطنۍ کې لوبې کوي، په افغانستان کې ښځې په بشپړدول له سپورټ څخه منع دي.

د یادونې ده چې افغان ښځینه لوبډلې پرون په میلبورن کې د اسټرالیا د بې پولې ښځینه کرکټ لوبډلې په وړاندې د دوو منډو په توپیر لوبه وبایلله.

ایران په تیره یوه میاشت کې د بېلا بېلو جرمونو په تور لس افغانان اعدام کړي دي.

د ایران د بشري حقونو د سازمان مشر محمود امیري مقدم ویلي، چې د هغوو شمیرو له مخې چې موږ یې لرو، د ۲۰۲۵ کال د جنورۍ په میاشت کې لس افغانان، شپږ یې د قتل او څلور یې د مخدره مواد قاچاق په تور اعدام شوي دي.

هغه ویلي، چې ایران په ۲۰۲۴ کال کې په بیلابیلو تورونو ۵۳ افغانان اعدام کړي دي.

د یادونې ده چې د طالبانو حکومت د سترې محکمې یوه پلاوي څه موده مخکې تهران ته د یو سفر په ترڅ کې له ایرانه غوښتي وو چې د افغان بندیانو لیست، په ځانګړې توګه د هغو بندیانو چې په اعدام محکوم شوي له دوی سره شریک کړي.

د امریکا د بهرنیو چارو وزیر مارکو روبیو وایي، چې د ګرینلند اخیستلو لپاره د ټرمپ لېوالتیا یوه جدي موضوع ده، چې په مستقیم ډول د امریکا ګټو پورې نغښتې ده.

نوموړی زیاتوي چې ټرمپ په دې برخه کې ان له نظامي قوت هم درېغ نه کوي.

د یادونې ده چې ټرمپ په انتخاباتي منډو ترړو کې هم د ګرینلنډ په الحاق ټینګار کړی و.