یوې باوري سرچینې حماسه میډیا ته د نوم نه ښودلو په شرط ویلي، چې د طالبانو د حج او اوقافو وزیر یو پاکستانی متقاعد خطیب ددې وزارت د ژباړونکي او ترجمان په توګه ټاکلی دی.
نوموړي چې ددې خطیب د نوم او تنخوا په اړه څه ونه ویل؛ خو زیاته یې کړه چې د هغه زامن له ۲۰۰۸ کال راهیسې په بلوچستان کې په پاکستاني پوځ کې دنده ترسره کړې.
سرچینې ویلي، په داسې حال کې چې ګڼ شمیر افغانان بې دندې دي او په حساسو ځایونو کې د پاکستانیانو مقررول ددې هېواد او خلکو سره ظلم دی.
د طالبانو حکومت په افغانستان کې د داعش د فعالیتونو په اړه د افغانستان د بیارغونې لپاره د امریکا د ځانګړې څارونکې ادارې (سیګار) راپور رد کړ.
د طالبانو حکومت مرستیال ویاند حمدالله پر خپله ایکسپاڼه لیکلي، چې داعش په افغانستان کې ځپل شوی او نور جدي ګواښ نه ګڼل کېږي.
هغه دغه راز ویلي، چې د داعش د حضور په اړه اندېښنې یوازې د دې ډلې په ګټه تبلیغات دي.
فطرت زیاته کړې، چې دا ډول راپورونه حقیقت نه لري او د ځانګړو موخو لپاره خپرېږي.
د یادونې ده چې سیګار په خپل راپور کې ویلي وو، چې داعش، القاعده او ټي ټي پي لا هم د افغانستان او سیمې لپاره یو ستر ګواښ دی.
د امریکا ولسمشر ډونالډ ټرمپ ویلي، چې بګرام هوایي اډه اوس د چین په لاس کې ده.
ټرمپ زیاتوي، که دی په واک کې وی؛ نو حتمي به یې دا اډه ساتلې وه.
نوموړی وایي، دا د شرم وړ خبره وه، چې امریکایان ان د بګرام له هوایي اډې هم ووتل.
هغه زیاته کړې، د دوی په ګډوډ ډول له وتلو وروسته روسیه پر اوکراین ور زړوره شوه.
د یادونې ده چې ټرمپ پخوا هم ویلي چې بګرام د دوی لپاره یوه مهمه هوایي اډه وه.
ایران کې د افغانستان پخواني سفیر عبدالغفور لېوال استانبول کې له یو شمېر مشرانو د پاکستان د استخباراتي ادارې د یو جګ پوړي مشر لیدنې ته غبرګون کې لیکلي:«چې د افغانستان ملي ګټو د اړتیا له مخې د یوه ملي و منتخب حکومت له خوا رسمي واک و مسئولیت ورسپارل شوی نهوي او په خپل سر له پاکیستاني یا د هربل دوښمن هېواد له استخباراتي سازمانونو سره ګوري و خبرې کوي،
هغوی وطن و ولس ته خاینان دي.»
نوموړی دا څرګندونې داسې مهال کوي چې ویل کېږي د پاکستان د استخباراتي سازمان يا ای ايس ای يو جګپوړي پلاوي په استانبول کې له يو شمېر جهادي مشرانو صلاح الدين رباني، عبدالرشيد دوستم، عبد رب الرسول سياف، محمد محقق او کريم خلیلي سره د افغانستان پر راتلونکي خبرې کړې دي.
د هېواد پخواني ولسمشر حامد کرزي د کرکټ په ډګر کې د افغان نجونو له شتون څخه خوښي څرګنده کړې.
ښاغلي کرزي پر خپله ایکسپاڼه لیکلي، هیله لري چې د نجونو د کرکټ لوبډله هم د خپلو وروڼو په څېر په نړیوالو سیالیو کې د خپل هېواد لپاره ویاړ وګرځي.
د یادونې ده چې د افغان کرکټ ښځینه لوبډله ګڼو نړیوالو بنسټونو ستایلې او دا یې د افغانو ښځو د غږ پورته کولو لپاره یو ښه اقدام ګڼلی.
په سویس کې د افغانستان اماني صندوق کې د ټرمپ د لاس وهنې په اړه د یاد صندوق د مدیره هیت غړی انوار الحق احدي وایي، چې دا صندوق خپلواک او هیڅوک پکې د لاسوهنې حق نه لري.
نوموړی زیاتوي د امریکا حکومت د خپل قانون پر اساس دغه صندوق کې د لاسوهنـې حق نه لري؛ خو استازی یې له دوی سره پلاوي کې شامل دی.
د یادونې ده چې سویس کې د افغانستان اماني صندوق کې اوس مهال نږدې ۴ میلیارده ډالر شته.
د اسراییل او حماس ترمنځ د شوي اوربند په ترڅ کې به نن حماس درې نور اسراییلي یرغمل خوشې کړي.
ددغه درې بندیانو په بدل کې اسراییل هم لسګونو فلسطیني بندیان خوشې کوي.
تراوسه له لسو زیات اسراییلي اوپنځه ټایلنډي یرغمل خوشې شوي؛ خو د اسراییلي چارواکو په وینا تراوسه له اتیاوو زیات یرغمل له حماس سره دي.
حماس ډلې اسراییلو ته د هغو درې یرغملو نوملړ سپارلی چې ټاکل شوې دا ډله یې په غزه کې د نافذ شوي اوربند په ترڅ کې نن خوشې کړي.
د افغانستان اماني صندوق د مدیره هیئت غړي انوار الحق احدي ویلي، چې د افغانستان د کرنسۍ ارزښت ساتلو لپاره له کمې طلا پرته هیڅ “پشتبانه” نشته.
د هغه په خبره، د اماني صندوق د افغانیو لپاره ښه ملاتړ کېدی شي؛ خو طالبانو تر اوسه په دې اړه له دوی څخه کومه غوښتنه نه ده کړې.
نوموړی زیاتوي، دا وضعیت خورا سخت دی او نه پوهیږي چې طالبان به یې د اوږدې مودې لپاره څه ډول کنټرول کړي.
دا په داسې حال کې ده چې اوس مهال د افغانستان بازارونو کې د افغانیو ارزښت د ډالرو پر وړاندې را لوېدلی دی.
پر نړۍ د امریکا د پراختیایي مرستو له بندېدو سره، یو جمهوري غوښتونکي سناتور رندپال ویلي چې تر دې وړاندې یې له دموکراتانو هم طالبانو ته د مرستو بندولو غوښتنه کړې وه.
رند پال ویلي، د طالبانو له بیا واکمنۍ وروسته امریکا افغانستان سره ۳.۳ میلیارده ډالره مرسته کړې چې یوه برخه یې د طالبانو لاسته لوېدله.
هغه د طالبانو په اړه د دموکراتانو پر پالیسي هم سخته نیوکه کړې او ویلي یې دي چې د مرستو بندېدو په اړه د دموکراتانو له مخالفت سره مخ وو.
امریکا سر له نن څخه د کاناډا او مکسیکو پر واردېدونکو توکو ۲۵ سلنه او پر چینایي توکو لس سلنه تعرفه لګوي.
د امریکا ولسمشر ډنالډ ټرمپ وایي، چې دغه درې واړه هېوادونه د دې تعرفې پر وړاندې کوم اقدام نشي کولای.
ټرمپ زیاته کړې چې که مکسیکو او کاناډا د ناقانونه کډوالۍ او نشه یي توکو د قاچاق مخنیوي لپاره ګامونه پورته نه کړي؛ نو دا تعرفې به نورې هم لوړې شي.
د یادونې ده چې ټرمپ هڅه کوي کاناډا او مکسیکو د خپل هېواد برخه وګرځوي؛ نو ځکه پرې فشارونه زیاتوي.