د طالبانو د مشر شیخ هبت الله اخوندزاده حکم طالبان په دوو ډلو ویشلي دي.
د طالبانو حکومت د لوړو زده کړو وزیر ندا محمد ندیم، د امربالمعروف وزیر، د خوست او د ننګرهار واليان په کنفرانسونو او غونډو کې خبریالانو ته د د عکس او ویډیو اخیستلو اجازه نه ورکوي؛ خو د رییس الوزرا سیاسي مرستیال، د کورنیو چارو وزیر، د خوست مرستیال والي او په کابل کې ګڼ شمیر نورې حکومتي ادارې له بهرنیو چارواکو او افغانانو سره د خپلو غونډو عکسونه او ویډیوګانې خپروي.

عام افغانان پوښتنه کوي، چې دین ولې د طالبانو لپاره په مختلفو ځایونو کې بېلابېل تفسیرونه لري؟

دوی زیاتوي چې د ملا هبت‌الله اخوندزاده امر ولې ځینې طالب چارواکي پر ځای کوي او ځینې ترې سرغړونه کوي او نه یې مني؟

په دې وروستیو کې یو شمېر ولایتونو ته د طالب چارواکو تګ راتګ زیات شوی دی.

درې ورځې وړاندې د طالبانو حکومت د کورنیو چارو سرپرست وزیر سراج الدین حقاني میدان وردګ ته تللی و؛ خو وړمه ورځ بیا پکتیا ته ورسېد.

له هغه سره په یو وخت د طالبانو د رییس الوزرا سیاسي مرستیال مولوي عبدالکبیر وړمه ورځ بامیان ته تللی وو؛ خو نن بیا د پکتیا میرزکې ولسوالۍ ته رسېدلی دی.

یو شمېر شنونکي باور لري، چې د افغانستان په اړه د واشنګټن بدلېدونکو سیاستونو طالبان وېرولي او هڅه کوي چې اوس عام افغانان پر ځان راټول کړي.

د طالبانو رییس الوزرا سیاسي مرستیال مولوي عبداکبیر نن د میرزکې د خلکو ستونزې اورېدلي او د حل ډاډ یې ورکړی

د طالبانو حکومت د بهرنیو چارو وزارت سیاسي مرستیال شېر محمد عباس ستانکزی په بهرنیو هېوادونو کې په مېشتو افغانانو غږ کړی چې، د دښمن په لاس کې له لوېدو نه، ځان وژغوري او خپل هېواد ته راشي.

عباس ستانکزي نن په کابل کې یوې غونډې ته ویلي، چې د افغانستان غېږ او د طالبانو د حکومت غېږ د دوی پر مخ باندې خلاصه ده.

هغه ویلي، چې د طالبانو حکومت د پام وړ پرمختګ کړی او په وینا یې دا لاسته راوړنې پرته له کومې نړیوالې مرستې ترلاسه شوي، حتی که ډیری هیوادونه زموږ مخالفت کوي.

نوموړي زیاته کړې چې د هیوادوالو ترمنځ د یووالي او عدالت تامین مهم دی او د دوی حکومت د هیوادوالو د ټولو شرعي حقوقو تأمین ته ژمن دی.

د طالبانو حکومت تر کنټرول لاندې د هوا پېژندنې ادارې نن د هېواد په ۲۳ ولایتونو کې د شړکنده باران، تالندې برېښنا، تېز باد او سېلابونو د راوتو اټکل کړی.

د هوا پېژندنې ادارې په یوه خپره شوې خبرپاڼه کې ویلي، چې دغه وړاندوېنه د بدخشان، نورستان، کونړ، ننګرهار، لغمان، کاپیسا، پروان، کابل، لوګر، پکتیا، خوست، پنجشېر، تخار، بغلان، بامیان، سرپل، دایکندي، غور، غزني، روزګان، هلمند، کندهار او زابل ولایتونو لپاره شوې ده.

یادې ادارې ویلي، چې په بېلابېلو سیمو کې د باران کچه ( له ۱۵تر ۳۰) ملي مترو پورې اټکل شوې ده.

د افغانستان لپاره د روسیې د ولسمشر ځانګړی استازی ضمیر کابلوف نن پاکستان ته په یو رسمي سفر ځي.

د پاکستان د بهرنیو چارو وزارت په یوه خبرپاڼه کې ویلي، چې ضمیر کابلوف به د پاکستان د بهرنیو چارو د وزارت له لوړ پوړو چارواکو سره د افغانستان پر روانو حالاتو خبرې وکړي.

په خبرپاڼه کې راغلي چې دواړه لوري به د سیمې د سولې او ثبات په ښه کولو کې د افغانستان د ګاونډیو هېوادونو د رول په اړه هم بحثونه وکړي.

د شمالي وزیرستان د میرعلي په تپې سیمه کې پر څو کورونو د چاودنې له امله درې ښځې او دوه ماشومان وژل شوي.

یاده پیښه تیره شپه رامنځته شوې چې تردې مهاله یې علت نه دی څرګند شوی.

خو له سیمې څخه یو شمیر خبریالان وایي، چې د میرعلي په تپې سیمه کې پر ځینو کورونو زوروره چاودنه شوې چې له امله یې درې ښځې او دوه ماشومان وژل شوي او ۱۵ نور ټپیان شوي.

تر اوسه پورې پاکستاني امنیتي ادارو په دې اړه رسمي څه نه دي ویلي.

د خوړو نړیوال سازمان وایي، چې فرانسه ۳.۳ میلیونه ډالر له افغانانو سره بشري مرسته کوي.

د سرچینې د مالوماتو له مخې، دغه مرستې به له امېندوارو او شېدو لرونکو میندو ته د رسېدنې لپاره ورسول شي.

دا مرستې به د خوړو نړیوال سازمان له لوري ولږول شي.

له دغو مرستو څخه به ۱۵ زره افغانان برخمن شي.

دا په داسې حال کې ده چې اوچا ویلي، چې اوس مهال افغانستان کې ۲۲ میلیونه کسان مرستو ته اړتیا لري.

د امریکا د بهرنیو چارو وزیر انتوني بلېنکن اوکراین ته د مرستو ډاډ ورکړی.

انتوني بلنکین تېره ورځ بروکسل کې د ناټو له سرمنشي سره د لیدنې پر مهال ویلي، چې د ټرمپ اداره به له اوکراین څخه ملاتړ او د ناټو د پیاوړي کولو هڅې زیاتې کړي.

بلنکین دا ډاډ داسې مهال ورکوي چې د اوکراین جګړه ختمول د ټرمپ د انتخاباتي منډو ترړو ګرمه موضوع وه.

د برېټانیا د بهرنیو چارو پخواني وزیر ویلیم هیګ ویلي، چې د امریکا له خوا د اوکراین پر وړاندې شاتګ به د افغانستان څخه د امریکایي ځواکونو د وتلو تجربه وي.

هغه ویلي، که امریکا له اوکراین سره مرسته نه کوي؛ خو اروپا باید له اوکراین څخه ملاتړ ته دوام ورکړي.

هغه ویلي، امریکا باید نوره د افغانستان په څېر تېروتنه تکرار نه کړي.

د یادونې ده، چې تر دې وړاندې د منګولیا ولسمشر ویلي وو چې ښایي اروپا د اوکراین ملاتړ ته یوازې پاتې شي.

واشنګټن پوسټ ویلي چې، اسراییل به د راتلونکي زېږیز کال په پیل کې ډونالډ ټرمپ ته په لبنان کې د اوربند هوکړه ډالۍ کړي.

واشنګټن پوسټ زیاتوي، چې د اسراییل د سټراټیژیکو چارو وزیر روانه اونۍ د امریکا له نوي منتخب ولسمشر ډونالډ ټرمپ سره کتلي او لبنان کې یې د اوربند په اړه خبرې کړې دي.

د یادونې ده چې تېره ورځ د اسرائیل د بهرنیو چارو وزیر جدعون سار هم ویلي، چې حزب الله ډلې سره د جګړې د ختمېدو برخه کې د خبرو په اړه پرمختګ شوی دی او په وینا یې اسراییل په دې برخه کې له امریکا سره په ګډه کار کوي.