د طالبانو حکومت د استخباراتو اړوند المرصاد د خپلو باوري سرچینو له قوله لیکلي، چې د هیواد په درېیو ولایتونو غور، کابل او کونړ کې طالب سرتېرو د داعش خلاف عملیاتو کې ۴ داعشیان وژلي او یو شمېر نور یې ژوندي نیولي دي.

المرصاد زیاته کړې، چې طالبانو په غور کې د داعش دوه غړي وژلي او یو یې ژوندی نېولی او په کابل کې په ترسره شویو عملیاتو کې د یوه بهرني وګړي په شمول (چې هویت یې تراوسه لا معلوم نه دی) دوه داعشیان وژل شوي او دوه نور ژوندي نیول شوي دي.

یادې سرچینې دغه راز ویلي، چې له دې عملیاتو سره هممهاله، په کونړ کې هم د داعش ډلې یو غړی وژل شوی دی.

المرصاد د امنیتي سرچینو له قوله ویلي چې په روان کال کې افغانستان کې ټولو تخریبي کړنو کې هغو کسانو لاس درلود چې په پاکستان کې یې روزنه لیدلې او له هماغه ځایه افغانستان ته را استول شوي دي.

د ډونالډ ټرمپ د بریا په اړه د طالبانو خپرې شوې اعلامیې ته په غبرګون کې د ملي مقاومت جبهې د دارالافتاء رییس حبیب الله حسام لیکلي، دین او دیانت د داسې تکفیري او قومي تعصب لرونکو ډلو لپاره یوازې یو وسیله ده، چې د امریکا د نیابتي پروژې او امنیتي بازو په توګه کار کوي.

ښاغلي حسام په خپله ایکس‌پاڼه لیکلي، دوی هر هغه څوک چې د دوی له فکر سره مخالف وي، کافر بولي او جهاد یې پر وړاندې اعلانوي.

د هغه په خبره د دوی د تېرې ۳۰ کلنې پالیسۍ بنسټ په همدې اصل ولاړ و؛ خو اوس دوی په خپله له خپلې پخوانۍ ادعا څخه په شا شوي او د هغو خلکو سره یې همکاري پیل کړې چې په تېر کې یې کافر ګڼل.

رویټرز خبري اژانس خبر ورکړی، چې د اوکراین په کورسک سیمه کې د شمالي کوریا او اوکرایني پوځیانو ترمنځ نښته شوې.

سرچینې په دې اړه نور جزیات نه دي ورکړي.

دا په داسې حال کې ده چې وړمه ورځ د اوکراین دفاع وزارت هم د روسیې په ملاتړ د شمالي کوریا له پوځیانو سره د نښتې خبر ورکړی وو.

د یادونې ده چې د اوکراین چارواکي ادعا کوي چې د شمالي کوریا ځواکونه د روسیې د ملاتړ لپاره د دوی له ځواکونو سره جنګېږي.

د پخواني ولسمشر لومړي مرستیال امرالله صالح د ټرمپ د بیا واکمني په اړه ویلي، چې د یو ۷۸ کلن کس انتخاب د هغه هېواد په ټاکنو کې، چې بهرنی سیاست یې له تناقضونو ډک دی، باید د لویو بدلونونو هیله په خلکو کې راونه پاروي.

د صالح په خبره، دا کس “ټرمپ” چې اوس بریالی شوی، حتا د ځینو هېوادونو او مشرانو نومونه هم په سمه توګه نشي ویلی او حتمي به داسې کسان خپل کاري ټیم کې وټاکي چې د نړۍ په اوسنیو بحرانونو کې لاس لري او د خپلو ګټو لپاره یې په دغه بحرانونو کې رول لوبولی وي.

صالح زیاتوي، زموږ په ذهن کې هیڅ څوک باید د پیغمبر مقام ته ونه رسوو، ځکه چې نبوت څوارلس پیړۍ وړاندې پای ته رسېدلی.

د طالبانو حکومت د اوبو او انرژۍ وزارت وایي، د کابل په شکر درې ولسوالۍ کې د “شاه و عروس” بند چارې بشپړېدو ته نږدې شوي دي.

یاد وزارت ویلي، چې دغه بند د کابل د ځمکې لاندې اوبو سرچینو پیاوړتیا او د سېلابونو کنټرول کې مهم رول لري.

ویل کېږي، چې ددې بند په بشپړېدو سره به نه یوازې دا چې هر کال ۳۰ میلیونه متر مکعب اوبه مدیریت شي؛ بلکې د کابل ښاریانو ته ۵ میلیونه متر مکعب د څښاک اوبه هم برابروي او د دې ترڅنګ د ۱.۲ میګاواټه برېښنا تولید ظرفیت هم لري.

اسټرالیا حکومت داسې قوانین وضع کوي، چې له مخې به یې تر ۱۶ کلونو کم عمره ماشومان له ټولنیزو رسنیو کارولو منع شي.

د اسټرلیا لومړي وزیر البانیسي ویلي، دا قانون به په راتلونکې اوونۍ کې د دې هېواد پارلمان ته وړاندې شي.

دا قانون د هغو زیانونو د مخنیوي لپاره وضع کېږي، چې د ټولنیزو رسنیو له کبله ماشومانو ته اوړي.

د یادونې ده چې د ټولنیزو رسنیو له کبله د نړۍ د ګڼو هېوادونو ماشومان له رواني او نورو ستونزو سره مخ دي.

د اسرائیل دفاع وزارت وایي، له بوئینګ شرکت سره یې د ۲۵ ایف ۱۵ جنګي الوتکو قرارداد کړی.

د سرچینې د معلوماتو له مخې، دا قرارداد د ۵.۲ میلیاردو ډالرو په ارزښت شوی.

د اورشلیم راپور د معلوماتو پر اساس، دا الوتکې پر مهمو وسایطو سمبالې دي.

د اسرائیل دفاع وزیر دا د خپل هوایي ځواک د پیاوړتیا لپاره د پام وړ اقدام بللی.

د ککړې هوا له کبله پنجاب کې ښوونځي رخصت شوي دي.

د پنجاب ایالت چارواکو ویلي، ټاکل شوې چې زده کوونکو ته به د اکتوبر تر اوولسمې نېټې پورې ان لاین زده کړې ورکړل شي.

پاکستان کې د هوا ککړتیا سبب د بې کیفیته سون توکو کارول ګڼل کېږي.

د اټومي انرژۍ د نړیوالې ادارې مشر رافایل ګروسي وايي، راتلونکو څو ورځو کې به ایران ته ولاړ شي او هلته به له ایراني چارواکو سره د اټومي پرواګرام په اړه خبرې وکړي.

هغه په روم کې خبریالانو ته ویلي، تمه لري، چې ټرمپ سره هم په دې برخه کې رغنده همکاري ولري.

که څه هم ایران او امریکا اټومي تړون هم درلود؛ خو ټرمپ پر خپله تېره دوره کې له دغه تړون څخه ووت او لاهم نامعلوم پاتې.

ایراني چارواکي د اټومي انرژۍ نړیوالې ادارې متخصصین نه پرېدي، چې د دغه هېواد له یورانیمو لیدنه وکړي.

تېره اکتوبر میاشت په پاکستان، پښتونخوا او بلوچستان کې د شویو بریدونو له کبله ۱۸۰ تنو ته مرګ ژوبله اوښتې.

د پاکستان د سولې انسټیټیوټ ویلي، چې تېره اکټوبر میاشت په دغه هېواد کې ۴۸ مرګوني بریدونه ترسره شوې، چې ۱۰۰ تنه پکې وژل شوي او ۸۰ نور ټپیان دي.

د سرچینې د مالوماتو له مخې، په دغو بریدونو کې ۵۲ تنه د پاکستان امنیتي ځواکونه، ۳۶ ملکي وګړي او ۱۲ وسله وال وژل شوي دي.