د اوکراین ولسمشر ولادمیر زیلنسکي وايي، ټرمپ ته احترام لري؛ خو بخښنه به ورنه هیڅ وخت ونه غواړي.
هغه له فاکس نیوز سره په خبرو کې ویلي، فکر نه کوي، چې کومه تېر وتنه یې کړې وي.
نوموړي زیاته کړې، چې له هر چا زیات د اوکراین جګړې د پای ته رسولو غوښتونکی دی.
د یادونې ده، چې د ټرمپ، د هغه د مرستیال او زیلنسکي ترمنځ لفظي شخړه اوس د رسنیو سر ټکی ګرځېدلی دی.
د افغانستان د ولسمشرۍ وروستی مرستیال امرالله صالح وایي، روسیې ته په کار ده چې د اکراین جګړه کې ترلاسه شوې بریا په سمه توګه اداره کړي.
امرالله صالح پر خپله ایکسپاڼه لیکلي، چې د خپلې تیرې لیکنې په استناد اوس ډاډه دی چې اکراین په دې جګړه کې ماتې خوړلې او اړتیا ده چې کنټرول شوې خاوره وساتي.
نوموړي لیکلي چې ولسمشر پوتین هغه څه چې د اکراین له جګړې غوښتل ترلاسه کړي دي.
په سپینه ماڼې کې د ولسمشر ټرمپ سره د خبرې ناستې وروسته د اوکراین ولسمشر ولادیمیر زلنسکي په خپله ایکس پاڼه د امریکا د هغه ملاتړ له امله مننه کړې چې له دې هېواد سره یې ترسره کړې.
ولسمشر زلنسکي لیکلي اوکراین عادلانه او تلپاتې سولې ته اړتیا لري، او موږ په سمه توګه د دې لپاره کار کوو.
ګڼو امریکایانو په تبصرو کې د ولسمشر زلنسکي سره د امریکایي ولسشمر چلند غندلی او دایې یو شرمونکی عمل بللی.
په سپینه ماڼۍ کې د ټرمپ او زلنسکي ترمنځ لفظي شخړه
د امریکا ولسمشر ټرمپ او مرستیال یې پرته لدې چې د اوکراین د ولسمشر زلنسکي میلمه پالنه وکړي د هغه سره سخته لفظي شخړه وکړه.
ولسمشر ټرمپ وایي، اوکرایني ولسمشر د سولې خبرو ته چمتو نه دی.
د اوکراین ولسمشر زلنسکي د ټرمپ له لورې روسیې ته په نږدې والي نیوکه وکړه او ټرمپ یې په بې احترامۍ تورن کړ.
د امریکا ولسمشر وویل چې اوکراین په روانه جګړه کې ماتې خوړلې او باید د قربانۍ کارت لوبولو ډډه وکړي.
ښاغلي ټرمپ ولسمشر زلنسکي وګواښه چې امریکا د اوکراین له ملاتړ څخه لاس په سر کیږي.
د طالبانو حکومت سږ کال د روژې لومړۍ نیټه له سعودي عربستان سره یو ځای اعلان کړه.
د طالبانو حکومت سترې محکمې د سعودي عربستان د روژې له اعلان څو شېبې وروسته اعلان وکړ چې سبا شنبه په افغانستان کې د روژې لومړۍ ورځ ده.
سعودي عربستان اعلان کړی، چې سبا شنبه د روژې لومړۍ ورځ ده.
بل لورته افغانستان کې لاهم د طالبانو حکومت په دې اړه څه نه دي ویلي.
د طالبانو حکومت پېښور کې د دارالعلوم حقانیې مدرسې د سرپرست مهتمم وژل کېدل په کلکو ټکو غندلي او له خدایه یې هیله کړې، چې په دغه برید کې له لاس لرونکو بدل واخلي.
د طالبانو حکومت یوې خپرې کړې اعلامیه کې ویلي، چې د حامدالحق حقاني مړینه د علمي حلقو لپاره یوه کلکه ضایع ده.
اعلامیه کې د حامدالحق شاګردانو او کورنۍ ته تسلیت ویل شوی.
مولانا حامدالحق چې د طالبانو معنوي پلار هم بلل کېده، نن د خیبر پښتونخوا په اکوړه خټک حقاني مدرسه کې د یو ځانمرګي برید په پایله کې ووژل شو.
جمهوري حکومت کې د ملي دفاع وزارت سرپرست شاه محمود میاخېل د دغه تصویر په اړه لیکلي، چې دې نجونو د طالبانو له لوري د زده کړو پر بندیز اعتراض کړی.
ښاغلی میاخېل زیاتوي، چې د کرکټ له میدانه دا خپور شوی پیغام د هغو درجنو ګران بیه او د بهرنیو له لوري تموېلېدونکو کنفرانسونو او غونډو څخه بهتره دی، چې د ښځو د حقونو د ملاتړ تر نوم لاندې قومي نفاق ته وده ورکوي.
نوموړی وایي، دغه بهرني کنفرانسونه د افغان ښځو پر وړاندې بندیز ته کوم پام نه کوي.
د یادونې ده چې دا تصویر نن د افغانستان او اسټرالیا ترمنځ د لوبې پر مهال اخیستل شوی.
د خیبر پښتونخوا په اکوړه خټک حقاني مدرسې کې د شوي ځانمرګي برید مسولیت داعش خراسان ډلې منلی.
داعش ډلې په یاد برید کې د متهمم مولانا حامدالحق حقاني په ګډون د ۱۶ کسانو د وژلو ادعا کړې.
د یادې ډلې د ISKP څانګې ویلي:«چا چې هم د خراسان په خاوره کې د کفارو او مرتدینو مرسته او ملاتړ کړی وي، هغوی دې خپل انجام ته د رسېدو لپاره تیار شي، ځکه چې حساب به د ټولو واخیستل شي.»
د یادونې ده چې د اکوړه خټک حقاني مدرسې سرپرست حامدالحق حقاني وژل کېدو د پاکستان او افغانستان د دیني حلقو سخت غبرګونونه را پارولي او دا یې د انساني او اسلامي اصولو خلاف عمل ګڼلی.
د ملي امنیت پخواني رئیس رحمت الله نبیل د اکوړه خټک حقاني مدرسې سرپرست حامدالحق حقاني د انسان په جامه کې شیطان بللی.
ښاغلي نبیل په خپله ایکسپاڼه لیکلي:«د انسان په جامه کی یو شیطان وو. نوموړی او د هغه پلار دواړه د مرګ سوداګران وو!»
بل خوا د سیاسي چارو شنونکي نجیب ننګیال پر خپله ایکسپاڼه د حامدالحق حقاني هغه وینا لیکلې چې ویلي وو: «د پاکستان د دفاع جنګ به افغانستان کې کوو.»
دا په داسې حال کې ده چې نن ورځ د جمعې لمانځه پرمهال په یو ځانمرګي برید کې د اکوړه خټک حقاني مدرسې سرپرست مشر حامدالحق حقاني ووژل شو.