د طالبانو حکومت د مشر شیخ هبت‌الله اخوندزاده د فرمان پر اساس، یو شمېر ټاکنې شوې دي.

د طالبانو مرستیال ویاند حمدالله فطرت ویلي، چې په دغو ټاکنو کې د کورنیو چارو وزارت د سرحدي پولیسو مخکنی رییس شیر محمد شریف د زابل والي، د زابل مخکنی والي حزب الله افغان د سرحدي پولیسو رییس او د تخار مخکنی امنیه قومندان جان محمد حمزه د کابل د کرنې، اوبو لګولو او مالدارۍ رییس ګومارل شوی دی.

دغه راز بیا د سرپل د استخباراتو مخکنی رییس سیف الله د حیرتان بندر کمیسار، د کابل د کرنې مخکنی رییس عبیدالله د بلخ د امر بالمعروف او نهې عن المنکر رییس او د حیرتان بندر مخکنی کمیسار حسین الله زاهد د جوزجان د اقچې ولسوال ګومارل شوی دی.

دا ټاکنې داسې مهال کېږي، چې د طالبانو به اداراتو کې په لوړه کچه تنقیض هم پیل شوی دی.

د ایراني رسنیو د راپورونو له مخې، د عباس بندر په شهید رجايي بندر کې د زورورو چاودنو له کبله د ټپیانو شمېر ۴۰۶ تنو ته رسېدلی دی.

د هرمزگان والي ویلي، چې د چاودنې دقیق علت لا هم نه دی معلوم؛ خو مختلف سناریوګانې د اړوندو چارواکو له لوري څېړل کېږي او د دقیقو پایلو له لاسته راوړلو وروسته به رسمي اعلان وشي.

د والي په وینا، د وسله‌والو ځواکونو، هلال احمر او نورو ارګانونو هیلي‌کوپټرونه چمتو دي څو ټپیان اړینو روغتونونو ته انتقال کړي.

د چارواکو په خبره، اوس د سیمې د وضعیت د عادي کېدو لپاره هڅې دوام لري.

د ایران په عباس بندر کې د چاودنې له کبله د ټپیانو شمېر ۱۹۵ تنو ته رسېدلی.

تسنیم خبري اژانس ویلي چې ایراني مسوول چارواکي د دغې پېښې د علت معلومولو په هڅه کې دي.

ټولنیزو رسنیو کې لیدل کېږي، چې چې دغې چاودنو ګڼ زیانونه اړولي دي.

د ایران په عباس بندر کې د چاودنې له کبله ۴۷ تنه ټپیان شوي.

تسنیم خبري اژانس د مسوولو چارواکو له قوله راپور ورکړی، چې د دغې پېښې د علت معلومولو هڅې روانې دي.

ټولنیزو رسنیو کې لیدل کېږي، چې سیمې ته یو شمېر امبولانسونه او د اور وژنې ادارې اړوند موټر هم رسېدلي دي.

د سپاه پاسداران اړوند تسنیم خبري آژانس د ایران په جنوب کې د بندر عباس د پېښې په اړه راپور ورکړی چې د بندر رجايي د سون توکو یوه زېرمتون کې د نامعلوم لامل له امله څلور چاودنې شوې دي.

د دغه آژانس په وینا، د پېښې وروسته د چټک غبرګون ډلې سمدلاسه سیمې ته استول شوې دي.

اوس مهال د بندر فعالیتونه درول شوي، څو وضعیت ژر تر ژره د امنیتي او ژغورنې ځواکونو تر کنټرول لاندې راشي.

د پاکستان لومړي وزیر شهباز شریف د خیبر پښتونخوا په کاکل سیمه کې د یوې پوځي ناستې پر مهال ویلي، چې پاکستان هڅه کوي له افغانستان سره ښې او پایداره اړیکې وساتي.

هغه زیاته کړې، چې د طالبانو حکومت مشرتابه ته واضح پیغام استول شوی دی او ویل شوي چې اسلام‌آباد د سولې پر بنسټ د اړیکو غوښتونکی دی.

هغه ویلي، چې د دوستانه اړیکو هدف تر هغه نه شي ترلاسه کېدای، څو چې د افغانستان خاوره د ترهګرو له خوا د پاکستان پر ضد ونه کارول شي.

د طالبانو حکومت چارواکو هم تر دې وړاندې ویلي، چې غواړي له پاکستان سره ښې اړیکې ولري او ټینګار یې کړی، چې د افغانستان خاوره به د هېڅ هېواد پر ضد نه کارول کېږي.

د ښځو د حقونو فعالې او د پاکستان استازو جرګې پخوانۍ غړې بشرا ګوهر د پاکستان د دفاع وزیر خواجه اصف په وروستیو څرګندونو تونده نیوکه کړې.

نوموړې د پاکستان حکومت په دغه هېواد کې د اسامه بن لادن د حضور مسول وباله او ویلي یې دي، چې دفاع وزیر باید په دې اړه سپیناوی ورکړي، چې نوموړی چا دلته راوست او ولې پناه ورکړل شوه.

هغې دغه راز زیاته کړې، چې په سیمه کې د امریکا د ترهګرو قراردادونه چا لاسلیک کړل او ایا اوس به دولت د حقیقت موندلو لپاره یو کمېسیون جوړ کړي که نه؟

دا په داسې حال کې ده، چې تېره ورځ خواجه اصف ویلي وو چې دېرش کاله یې د امریکا او غرب لپاره د ترهګرو ملاتړ وکړ.

د امریکا عدلیې وزارت ویلي، چې د امریکا حکومت له لوري نیول شوي پخواني طالب قومندان حاجي نجیب الله پر خپلو جرمونو اعتراف کړی.

هغه، په ۲۰۰۸ او ۲۰۰۹ میلادي کالونو کې امریکايي ورځپاڼې د خبریال او د دوه افغانو وګړو په تښتولو تورن وو.

یاد وزارت ویلي، چې نوموړي په افغانستان کې امریکايي پوځیان هم په نښه کړي دي.

د سرچینې د معلوماتو له مخې، هغه پر خپل جرم اعتراف کړی او اوس به د خپل جرم سزا وویني.

د افغانستان د ملي امنیت پخواني رییس رحمت الله نبیل د پاکستان دفاع وزیر خواجه اصف څرګندونو ته په ځواب کې لیکلي، چې د ترهګرۍ مډال دې یو وخت د ویاړ په توګه غاړه کې اچوو.

خواجه اصف لیکلي، چې اسامه بن لادن د روس او امریکا ترمنځ د جګړې لپاره پاکستان ته راوړل شوی وو او وروسته، چې معلومه شوه؛ نو پاکستان په سپین ډګر پرېښودل شو او اوس د ترهګرۍ قرباني دی.

تر دغه ټویټ لاندې ورته نبیل لیکلي، چې«ګران خواجه اصف نه قدرتونو ګټه درلوده، او نه د خدای فضل پاتې شو؛ اوس ستا په غاړه کې د ترهګرۍ هماغه زنځیر پاتې دی، کوم چې تا به یو وخت د مډال په توګه په غاړه کې اچولی وو.!»

د یادونې ده، چې اصف تېره ورځ هم ویلي و، چې درې لیسیزې یې د امریکا په خوښه ناپاک کارونه وکړل.

د پاکستان د بهرنیو چارو وزارت ویاند شفقت علي وايي، کابل له اسلام اباد سره پخوانۍ اړیکې لري او د یو ښه دوست په توګه غواړي، چې د دواړو لوریو اړیکې بهترې وي.

هغه ویلي، کابل ته د اسحق ډار د سفر پر مهال د یاد هېواد له بهرنیو چارو وزارت سره په بېلابېلو برخو کې هوکړې شوې دي.

نوموړی زیاتوي، د کډوالو ستونزو ته له رسېدنې، بیا د سیاسي او سوداګریزو اړیکو تر پراختیا پورې؛ ټول مسائل په دغه سفر کې بحث شوي دي.