د برېټانیا لومړی وزیر کيیر سټارمر وايي، چې د اوکراین د احتمالي اوربند لپاره نظامي پلان د عملي کېدو پړاو ته داخل شوی دی.
نوموړی ویلي، چې د هېوادونو نظامي چارواکي به د پنجشنبې په ورځ لندن کې راټول شي؛ ترڅو په دې اړه یو قوي پلان جوړ کړي.
نوموړی دا څرګندونې په اوکراین کې پر ۳۰ ورځني اوربند له هوکړې وروسته کوي.
هغه تر دې وړاندې ویلي وو، چې که پوتین په ریښتیا هم اوربند غواړي؛ نو باید دا ډول وحشیانه بریدونه پای ته ورسوي.
د امریکا ولسمشر ډونالډ ټرمپ د امریکا غږ په ګډون د یاد هېواد د دولتي رسنیو کارکونکي په اجباري ډول رخصت کړي دي.
ټرمپ ویلي، چې دا کارکوونکي باید تر بلې خبرتیا پورې په تمه پاتې شي؛ خو ویلي یې دي، چې د یادو کارکوونکو معاشونه به ورکول کېږي.
د رویټرز د خبر له مخې، نوموړي همدارنګه د ازادۍ راډیو بودیجه هم لغوه کړې ده.
نوموړي تر دې وړاندې امریکا غږ د محافظهکارانو پر ضد په تعصب تورنه کړې وه.
د طالبانو د حکومت د کابل امنیه قومندانۍ پخواني ویاند «جنرال» مبین د منیر شاکر د مړینې په اړه د یو شمېر طالبانو او ملایانو خوښیو ته په اشارې لیکلي چې د مغفرت دعاګانو پر ځای د مسلمانانو په مړینه خوښي ښودل کېږي.
«جنرال» مبین لیکلي، زمونږ حالت ډیر بد دی، چې د یو مسلمان په مړینه خوښي ښکاره کوو.
د یادونې ده چې د مفتي شاکر د مړینې په اړه یو شمېر طالبانو او ځینې ملایانو خوښي ښودلې او هغه ته یې د اسلام د دوښمن خطاب کړی.
د افغانستان د ملي پوځ پخوانی جنرال او د متحدې جبهې مشر سمیع سادات وایي، مفتي منیر شاکر د افغانانو د معاصر تاریخ ترټولو غرتمند او صادق عالم و.
ښاغلي سادات ویلي، زموږ په سیمه کې افراطي ملایانو د افغانستان ویاړونه ویجاړ او د وطن صادق بچي یې په یوه او بله پلمه ووژل او دا لړۍ روانه ده.
هغه د مفتي شاکر د وژلو په غبرګون کې زیاته کړې چې افغانان دې نور په دې پوی شي چې د ملایانو په موجودیت کې هیڅ هستي او افتخار نه پاتې کېدونکی دی.
د افغانستان د وروستي جمهوري نظام لومړي مرستیال امرالله صالح د دیني عالم مفتي منیر شاکر په مړینه خواشینې ښودلې او هغه یې یو دیني عالم او ملتپال شخصیت یاد کړ.
ښاغلي صالح په ایکس پاڼې لیکلي چې مفتي شاکر غوښتل په ټولنه کې د پاکستاني ریاست شیندلي زهر له منځه یوسي.
نوموړي ویلي، مفتي شاکر د پاکستاني استخباراتي ملاتړو مدرسو چې موخه یې په سیمه کې د ترهګرۍ روزل، ترویج او ملاتړ وو سخت مخالف وو.
امرالله صالح لیکلي مفتي شاکر په خپل رغنده او ښکاره نیوکو د پاکستاني استخباراتي ادارې له مخې نقاب لیرې کړ او ښکاره یې کړه چې همدوی د ترهګرو او تروریزم ملاتړي دي.
دیادونې وړ ده چې دیني عالم مفتي منیر شاکر د پښتونخوا په یو ځایي جومات کې د ماذیګر لمانځه پرمهال په هدفي ماین چاودنه کې خپل ژوند د لاسه ورکړ.
د پښتون ژغورنې غورځنګ مخکښه غړې وړانګه لوڼۍ وایي، مفتي منیر شاکر پر پښتونخوا وطن د پردي جنګ خشاک وګرځېد.
اغلې وړانګه لوڼۍ په خپله ایکس پاڼه لیکلي چې دا وطن د یو عالمي جنګ میدان دی او په وینا یې د دغې میدان کرایه یواځې د پاکستان ریاست اخلي.
دا په داسې حال کې ده چې نن ورځ یو پښتون عالم مفتي منیر شاکر د ماذدیګر لمانځه پرمهال په بمي چاودنه کې ووژل شو.
د پښتون ژغورنې غورځنګ مشر منظور پښتين د مفتي منیر شاکر د مړینې په اړه لیکلي، چې د ظلم او جبر پر خلاف یو قوي غږ مفتي منیر شاکر په شهادت ورسول شو.
نوموړي پر یادې پېښې ژوره خواشیني ښودلې او زیاته کړې یې ده چې دوی د شاکر له کورنۍ سره دې غم کې ځان شریک بولي.
د منظور په خبره، کله به چې د وخت حاکم د رښتیا ویلو په سزا سرونه پرې کول، په هماغو وختونو کې د پښتنو مشرانو او ځوانانو، د هر ډول مزاحمتي وسیلو د نشتون باوجود، د حق او رښتیا غږ په جرئت پورته کاوه او مبارزه یې کوله.
منظور پښتین د منیر شاکر د مړینې په اړه زیاتوي چې د پښتنو مشرانو سرونه یې پرې کړل؛ خو ټیټ نه شول.
د مفتي منیر شاکر زوی عبدالله شاکر وایي، تر هغې خپل پلار نه خښوي؛ ترڅو ورته پاکستاني حکومت ځواب نه وي ورکړی.
نوموړی وایي، څو ځله یې امنیتي مسؤلینو سره خبره شریکه کړې وه، چې دوی ته خطر دی؛ خو هغوی ورته هیڅ پام نه دی کړی.
هغه ویلي، پاکستاني مولایان هم د یو بل غوښو خوړلو ته ناست او ښایي راتلونکي کې دوی هم د ده د پلار په برخلیک اخته شي.
د جلال اباد ښار یو شمېر جوماتونو کې مفتي منیر شاکر ته د “خدای او د خدای درسول د دښمن” خطاب شوی.
حماسه میډیا ته سیمهییزو سرچینو ویلي، د یو شمېر جوماتونو ملا امامانو په لاډیسپیکرونو کې اعلانونه وکړ چې :«د پېغمبر او اسلام دښمن مردار شو، او ټول مسلمانان دې دوه دوه رکعته د شکرانې لمونځونه وکړي.»
د یادونې ده چې مفتي منیر شاکر په دین کې د بیلابیلو لارو او د دین څخه د تجارت او سوداګرۍ مخالف وو
د ننګرهار پخواني والي ضیاءالحق امیرخېل د مفتي منیر شاکر په مړینه خواشیني ښودلې.
هغه ویلي، چې د خدای په کور کې پر یو دیني عالم برید خواشینونکی دی.
نوموړي د منیر شاکر کورنۍ ته تسلیت ویلی.