د ایران ولسمشر مسعود پزشکیان د دغه هېواد د ستر مذهبي مشر علي خامنهيي د مړینې خبر تایید کړی او ویلي یې دي چې دا «لوی جنایت» به بېځوابه پاتې نه شي.
پزشکیان په یوه خبرپاڼه کې ویلي چې د خامنهيي وینه به داسې توپان راولاړ کړي چې د اسرائیلو او امریکا د ظلمونو او جنایتونو ریښې به وباسي.
نوموړي د خامنهيي مړینه د ایران لپاره ستره ضایعه بللې او ټینګار یې کړی چې هېواد به د خپلو مشرانو د وینې بدل واخلي.
د جمهوري نظام د کورنیو چارو وزارت امنیتي مرستیال جنرال خوشال سادات ویلي چې که څه هم پر بګرام د پاکستان بمبار کومه واقعي لاسته راوړنه نه ده، بلکې یوه نمایشي او تبلیغاتي هڅه ښکاري؛ خو اساسي پوښتنه دا ده چې افغانستان د څه ډول ځواب ورکولو جوګه دی.
ښاغلي سادات په خپله ایکسپاڼه لیکلي، چې طالبان جنګي الوتکې نه لري، خو متعهد او په دیني ذهنیت سمبال ځواکونه لري.
د هغه په خبره، د تېرو شلو کلونو جګړې تجربو ښودلې چې په لویو ښارونو کې د لږ شمېر جنګیالیو له خوا د پېچلو عملیاتو ترسره کول د دوی د قوت مهم ټکی دی او دا ډول بریدونه ژور رواني اغېز لرلی شي.
نوموړي زیاته کړې چې که پر افغانستان د بمبارونو لړۍ ونه درېږي، امکان لري طالبان له همدې تاکتیکونو کار واخلي او پاکستان ته لوی سرخوږی جوړ کړي.
ایراني رسنیو د اسلامي انقلاب د ساتونکو ځواکونو د عامه اړیکو څانګې له قوله راپور ورکړی چې شېبه وروسته به د ایران د وسلهوالو ځواکونو د تاریخ تر ټولو سخت عملیات پیل شي.
د راپورونو له مخې، یاد ځواکونه وایي چې دغه عملیات به په منځني ختیځ کې د امریکا پر یو شمېر پوځي اډو ترسره شي.
سرچینې زیاتوي چې دا ګواښونه د وروستیو پوځي تحولاتو او بریدونو او دغه راز د ایران د مذهبي مشر علي خامنهیي د مړینې په غبرګون کې مطرح شوي دي.
تر اوسه د امریکا له لوري په دې تړاو رسمي غبرګون نه دی خپور شوی، او د سیمې وضعیت له کړکېچ سره مخ بلل کېږي.
د ایراني دولتي رسنیو د راپور له مخې، د علي خامنهيي له مړینې وروسته به د هېواد چارې د لنډمهالې مشرتابه له خوا په ګډه پر مخ وړل کېږي.
راپور کې ویل شوي چې لوړپوړي چارواکي محمد مخبر اعلان کړی چې د انتقالي پړاو مسوولیتونه به د دولت د مهمو څېرو له لوري په ګډه اداره کېږي، څو نوی مذهبي مشر په رسمي ډول وټاکل شي.
د لنډمهالې مشرتابه په ډله کې به د ایران ولسمشر مسعود پزشکیان، د قضائیه قوې مشر غلامحسین محسني اژهاي، او د نګهبان شورا یو لوړپوړی فقیه شامل وي.
ویل کېږي چې دغه ډله به تر هغې د هېواد چارې پر مخ وړي، څو نوی رهبر په رسمي توګه وټاکل شي.
ایراني رسنیو راپور ورکړی چې د دغه هېواد د مذهبي مشر علي خامنهيي له مړینې وروسته په ایران کې ۴۰ ورځې ملي ماتم او اووه ورځې عمومي رخصتي اعلان شوې ده.
د راپورونو له مخې، د یکشنبې په سهار د ایران حکومت په رسمي ډول ومنله چې پر دغه هېواد د امریکا او اسرائیل په بریدونو کې خامنهيي خپل ژوند له لاسه ورکړی دی.
ایراني چارواکو ویلي چې په هېواد کې به د ملي ماتم مراسم ترسره شي او د حکومتي ادارو ډېری چارې به د ټاکلې مودې لپاره ځنډول کېږي.
تر دې وړاندې د خامنهيي د وضعیت په اړه ضد او نقیض راپورونه خپرېدل، خو دولتي رسنیو د حکومت له قوله د هغه مړینه تایید کړې ده.
د ایران د بهرنیو چارو وزارت ویاند اسماعیل بقایي هغه راپورونه رد کړي چې پکې ادعا شوې وه د ایران مذهبي مشر علي خامنهاي وژل شوی دی.
بقایې ویلي چې د خامنهاي د مرګ اړوند خپاره شوي خبرونه بېاساسه دي او دا ډول ادعاوې ناسم معلومات دي.
دا څرګندونې وروسته له هغې کېږي چې د امریکا ولسمشر ډونالډ ټرمپ وویل چې پر ایران یې بریدونه هدفمند وو او په پایله کې یې خامنهیي ژوند له لاسه ورکړ.
تر دې وړاندې د ایران چارواکو ټینګار کړی و چې خامنهیي ژوندی دی.
د موضوع په تړاو لا هم ضد او نقیض راپورونه خپرېږي، خو تهران په رسمي توګه د هغه د وژل کېدو خبر رد کړی دی.
په پاکستان کې د طالبانو حکومت پخواني سفیر مولوي عبدالسلام ضعیف ویلي چې پر ایران د امریکا او اسرائیلو بریدونو په ټول منځني ختیځ او نږدې اسیا کې نوې اندېښنې راپارولي دي.
هغه ویلي، که ایران مقاومت ته دوام ورکړي، دا امکان شته چې نور نړیوال ځواکونه هم په جګړه کې ښکېل شي او شخړه لا پراخه شي.
ضعیف همداراز ټینګار کړی چې د ایران احتمالي سقوط به د چین او روسیې لپاره جدي ګواښ وي.
د ننګرهار پخواني والي ضیاءالحق امرخېل ویلي، قومي مشران باید په جرګو او مرکو کې، علما په جوماتونو کې، او د کورنیو مشران په خپلو کورونو کې هره ورځ دا موضوع وڅېړي او پرې بحث وکړي چې افغانستان یو «ازلي دښمن» لري او هغه د پاکستان نظامي اداره ده.
هغه ویلي چې په تېرو څلوېښتو کلونو کې دغې ادارې له بېلابېلو لارو چارو کار اخیستی څو افغانستان کمزوری او وځپي، او زیاته کړې یې ده چې له دې خاورې سره ژوره دښمني لري.
امرخېل په پای کې د قرآن کریم دا آیت هم لیکلی: «فَاعْتَبِرُوا يَا أُولِي الْأَبْصَارِ» (ای د بصیرت خاوندانو، عبرت واخلئ).
د اسرائیل او امریکا له لوري نن سهار پر ایران د ترسره شویو بریدونو وروسته، د بریتانیا حکومت ویلي چې په دغو عملیاتو کې یې هېڅ رول نه درلود، خو ټینګار یې کړی چې ایران ته باید د اټومي وسلې د جوړولو اجازه ور نه کړل شي.
د برېتانیا لومړي وزیر کییر سټارمر په رسمي بیان کې ویلي، له یادو بریدونو وروسته ایران په سیمه کې بېتفریقه بریدونه کړي چې ځینې هدفونه یې هغه هېوادونه دي چې د روانې شخړې برخه نه ګڼل کېږي.
سټارمر دغه بریدونه غندلي او له خپلو سیمهییزو شریکانو سره یې د ملاتړ او همغږۍ اعلان کړی دی.
نوموړي ویلي، چې ایران په خپل هېواد کې زرګونه کسان وژلي، مخالفتونه یې په زور ځپلي او په سیمه کې یې د بېثباتۍ هڅې کړې دي.
هغه زیاته کړې، چې ایران آن په برېتانیا کې د مخالفینو او یهودي ټولنې پر وړاندې مستقیم ګواښ بلل کېږي او یوازې په تېر کال کې یې د شلو څخه د زیاتو احتمالي مرګونو بریدونو ملاتړ کړی دی.
نوموړي ویلي چې په منځني ختیځ کې یې دفاعي وړتیاوې پیاوړې کړې دي، برېتانوي الوتکې د سیمهییزو دفاعي عملیاتو برخه دي او پوځي اډې او پرسونل تر ټولو لوړې کچې امنیتي چمتووالي ته لوړ شوي دي، چې همداراز، په سیمه کې له مېشتو برېتانوي وګړو سره اړیکې نیول شوي او د هغوی د خوندیتوب لپاره اقدامات روان دي.
د بریتانیا دغه لومړي وزیر ویلي، چې له اروپایي متحدینو او د سیمې له مشرانو سره یې سلا مشورې کړې دي او ټینګار یې کړی چې باید د کړکېچ د پراخېدو مخه ونیول شي او بېرته ډیپلوماټیک بهیر ته لاره هواره شي.
د ایران د مذهبي مشر علي خامنهیي سیاسي مشاور علي شمخاني د امریکا او اسرائیل په هوایي بریدونو کې وژل شوی.
د رویټرز د راپور له مخې، علي شمخاني نن په هوایي پوځي بریدونو کې په نښه شوی او وژل شوی دی.
دا په داسې مهال کې ده چې له دې مخکې د ایران د سپاه پاسداران د مهم نوي قومندان محمد پاکپور د مرګ خبر هم خپور شوی و.